ការដុសសម្អាតធ្មេញ គឺពិតជាចាំបាច់ណាស់ ប៉ុន្តែភាគច្រើននៃពួកយើងប្រហែលជាមិនធ្លាប់ដឹងទេថាតើគួរដុសសម្អាតធ្មេញមុន ឬក្រោយពេលទទួលទានអាហារពេលព្រឹកទើបប្រសើរ? (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) កុំបារម្ភ! ខាងក្រោមវេបសាយសុខភាព Health.com.kh នឹងបកស្រាយចម្ងល់របស់ុលោកអ្នក ៖

  • ពេលវេលាដ៏ល្អបំផុតសម្រាប់ការដុសសម្អាតធ្មេញ

មនុស្សភាគច្រើនកំណត់ពេលវេលាជាក់លាក់មួយដើម្បីដុសសម្អាតធ្មេញរាល់ថ្ងៃដោយប្រកាន់ខ្ជាប់ជាទម្លាប់។ ហើយជាធម្មតាពួកគេតែងដុសសម្អាតធ្មេញនៅរាល់ព្រឹកក្រោយភ្ញាក់ពីគេង និងរាល់យប់មុនពេលចូលគេង។ ប៉ុន្តែថាតើការដុសសម្អាតធ្មេញនៅព្រឹកគួរដុសមុន ឬក្រោយពេលញ៊ាំអាហារពេលព្រឹក? អ្នកជំនាញបានអះអាងថា អ្នកគួរតែងតែដុសសម្អាតធ្មេញនៅមុនពេលញ៊ាំអាហារពេលព្រឹកទើបប្រសើរ។

  • អត្ថប្រយោជន៌នៃការដុសសម្អាតធ្មេញមុនញ៊ាំអាហារពេលព្រឹក

នៅពេលគេងបាក់តេរីក្នុងមាត់នឹងកើនឡើង។ ហើយបាក់តេរីនេះ គឺទទួលខុសត្រូវលើការបង្កជាកំណកកំបោរជាប់ធ្មេញដែលជាមូលហេតុធ្វើឱ្យអ្នកតែងក្រោកមកមានក្លិនខ្យល់ដង្ហើមមិនល្អ ព្រមជាមួយរសជាតិអាក្រក់ក្នុងមាត់។ ប្រសិនបើអ្នកដុសសម្អាតធ្មេញភ្លាមៗក្រោយពេលក្រោកពីគេង ធ្មេញរបស់អ្នកនឹងទទួលបាននូវរបាំងការពារពីសារធាតុ fluoride មុនពេលទទួលទានអាហារ។ សារធាតុ fluoride ជួយកម្ចាត់ ក៏ដូចជាទប់ស្កាត់កំណកកំបោរ និងបាក់តេរី។

  • កំណត់សម្គាល់

ទោះជាយ៉ាងណាអ្នកគួររងចាំសម្រាប់រយៈពេលយ៉ាងហោចណាស់ ៣០ នាទីសិន សឹមដុសសម្អាតធ្មេញក្រោយពេលទើបទទួលទានអាហារ ឬភេសជ្ជៈដែលមានផ្ទុកជាតិអាស៊ីត ដូចជាកាហ្វេ និងទឹកក្រូចស្រស់។ ការដុសសម្អាតធ្មេញភ្លាមៗក្រោយពេលទទួលទានអាហារអាចជះផលប៉ះពាល់ដល់កាចាធ្មេញ។

  • គន្លឹះសម្រាប់អ្នកដែលនៅតែចង់ដុសសម្អាតធ្មេញក្រោយញ៊ាំអាហារពេលព្រឹក

១. រងចាំសម្រាប់រយៈពេលយ៉ាងហោចណាស់ ៣០ នាទី ក្រោយទទួលទានអាហារ។

២. ដើម្បីសម្អាតធ្មេញនិងរសជាតិអាក្រក់ក្នុងមាត់ ចូរទទួលទានទឹកធម្មតា ១កែវ ឬទំពារស្ករកៅស៊ូគ្មានជាតិស្ករ។

៣. ប្រយ័ត្នក្នុងការទទួលទានអាហារនិងភេសជ្ជៈមួយចំនួនមានផ្ទុកជាតិអាស៊ីតរួមបញ្ចូលទាំងនំប័ុង ផ្លែឈើក្រៀម ផ្លែឈើប្រភេទ citrus និងទឹកក្រូចស្រស់។ ប្រសិនបើទទួលទានកំឡុងពេលអាហារពេលព្រឹក ចូរប្រាកដថាអ្នកបានរងចាំយូរបន្តិចទើបដុសសម្អាតធ្មេញ៕