កូរ៉េខាងត្បូងបានចេញមកអំពាវនាវអោយប្រជាជនបញ្ឈប់ការជួបជុំអបអរដំណាច់ឆ្នាំ ដោយសារតែផ្ទុះករណីកូវីដ-១៩ខ្ពស់បំផុតសារជាថ្មី រយៈពេល២ថ្ងៃជាប់គ្នានេះ ដោយការឆ្លងនៅក្នុងគុក មណ្ឌលថែទាំមនុស្សចាស់ និងព្រះវិហារបន្តកើនឡើង។
មនុស្ស១.១៣២នាក់បន្ថែមទៀតបានឆ្លងកូវីដ-១៩ កាលពីថ្ងៃសុក្រម្សិលមិញ ដែលកាលពីមួយថ្ងៃមុននេះមាន១.២៤១នាក់បានឆ្លងវីរុសនេះផងដែរ។ នេះបើយោងតាមទីភ្នាក់ងារគ្រប់គ្រង និងបង្ការជំងឺកូរ៉េ។
រដ្ឋមន្ត្រីសុខាភិបាល បានប្រាប់កិច្ចប្រជុំមួយថា «វីរុសកំពុងរីករាលដាល តាមចិត្តរបស់វា។នៅពេលយើងកំពុងឈរនៅត្រង់ផ្លូវបំបែកនៃរលកទី៣នេះ ការបញ្ឈប់ការឆ្លងរាលដាលនេះវាអាស្រ័យលើថាតើយើងនឹងចំណាយពេលបុណ្យឆ្នាំសកលថ្មីយ៉ាងណា»។
រដ្ឋាភិបាលកូរ៉េ ក៏បានបញ្ជាក់ពីផែនការប្រជុំមួយនៅថ្ងៃអាទិត្យស្អែកនេះ ដើម្បីពិភាក្សាសំរេចថា តើនឹងត្រូវរឹតបន្តឹងច្បាប់គម្លាតសង្គមអោយកាន់តែតឹងតែងបន្ថែមទៀតឬយ៉ាងណា។ បើច្បាប់ត្រូវអនុម័ត នោះហាងប្រមាណ១,២លានទៀតនឹងត្រូវបិទ។
ការផ្ទុះកូវីដ-១៩ បច្ចុប្បន្ន កើតមាននៅក្នងគុកនៅសេអ៊ូលខាងកើត ដោយអ្នកទោសនិងបុគ្គលិក៥១៤នាក់បានឆ្លង។ រីឯតួលេខឆ្លងផ្លូវការរបស់កូរ៉េខាងត្បូងពេលនេះ កើនឡើងដល់ ៥៤.៧៧០នាក់ ហើយ៧៧៣នាក់បានស្លាប់៕