មានលុយល្មមៗចង់ទិញឡានមួយទឹកជិះ ក៏មិនមែនជារឿងងាយស្រួលដែរត្រូវចេះឆែកមើលគុណភាព ស៊េរីឆ្នាំ និងភាពពេញនិយម។ ឡានតម្លៃរាប់ពាន់ដុល្លារ និងខ្លះដល់ម៉ឺន បើទិញមកខុសខាតលុយមិនខាន។
អ្នកជំនាញមើលឡានមួយទឹកលោក សៅ រិទ្ធី បានបង្ហើបប្រាប់ពីបទពិសោធន៍មើលឡានមួយទឹកដែលពលរដ្ឋគួរទិញជិះ ឬមិនគួរទិញជិះ។
ឡានមួយទឹកដែលការាសដាក់លក់ ឬអ្នកគួកជេរតែងទិញមកលក់បន្តជាទូទៅចែកជា ៣ ប្រភេទគឺ Grade A ឡាននៅស្អាតល្អ Grade B ឡានកម្រិតមធ្យម និង Grade C ឡានដែលយកមកធ្វើជួសជុលបន្ថែម។
ឡានមួយទឹកប្រភេទ Grade A ជាឡានដែលមានទឹកថ្នាំស្អាត ជើងក្រោមនៅល្អ មិនមានច្រេះ មិនមានបុកខាងមុខ ខាងក្រោយ ម៉ាស៊ីនស្ងាត់ កង់ហ្ស៊ីន និងមានគ្រឿងតុបតែងមកពីនាយ។
ចំពោះប្រភេទ Grade B ជាឡានដែលស្ទើរម៉ាស៊ីន តួឡានសាច់ដែក និងបាតក្រោមមានច្រេះបន្តិចបន្តួច ចំពោះទឹកថ្នាំនៅស្អាតអាចទទួលយកបាន។
ចំណែកឡានប្រភេទ Grade C ជាឡានដែលនាំចូលមកមានបុក បាញ់ថ្នាំថ្មី មានពុកជើងក្រោមសាច់ដែកច្រេះ ឬជាឡានកាត់តជាដើម ហើយគេយកមកធ្វើថ្មី។
លោកប្រាប់ថា ឡានប្រភេទ Grade C ភាគច្រើនគេតែផុសលក់នៅលើហ្វេសបុកដាក់តម្លៃថោកៗ។ ឡានប្រភេទនេះមិនគួរទិញជិះឡើយ។ អ្នកទិញគួររកអ្នកជំនាញឲ្យទៅជួយមើល ដើម្បីទុកចិត្ត។ ចំពោះតម្លៃវិញប្រភេទ Grade A, B និង C ខុសគ្នាចន្លោះពី ២ ០០០ ទៅ ៣ ០០០ ដុល្លារ ។
លោកបន្ថែមថា ក្រៅពីមើលគុណភាពរូបរាងឡាន និងម៉ាស៊ីន ពណ៌ក៏ជាកត្តាសំខាន់មួយដែរ ព្រោះវាជាការពេញនិយម ភាពហ៊ឺហា ទាន់សម័យ មានទីផ្សារខ្ពស់ និងងាយស្រួលលក់ចេញវិញពេលចង់ប្ដូរស៊េរី។
ពណ៌ឡានដែលអ្នកប្រើប្រាស់តែនិយមជិះមាន ពណ៌ស ទឹកមាស និងពណ៌ទឹកប្រាក់។ ចំពោះតម្លៃ ខុសគ្នាប្រមាណជា ១ ៥០០ ទៅ ២ ០០០ ដុល្លារ ពីពណ៌ស ទៅពណ៌ទឹកមាស និងប្រមាណជា ១ ០០០ ទៅ ១ ៥០០ ដុល្លារ ពីពណ៌ទឹកមាស ទៅ ពណ៌ទឹកប្រាក់ សម្រាប់ស៊េរីឆ្នាំ គុណភាព និង Option តែមួយ ។
សម្រាប់ពណ៌មិនពេញនិយមក្រៅពីពណ៌ទាំង ៣ នេះ តម្លៃអាចខុសគ្នាប្រមាណជា ២ ៥០០ ទៅ ៣ ០០០ ដុល្លារ ឯណោះ។
លោកបានណែនាំអ្នកចង់ទិញឡានមួយទឹកជិះគួរគិតពីស៊េរីឆ្នាំ ព្រោះអាចទាក់ទងនឹងគុណភាពរបស់ឡាន។ សម្រាប់ Lexus គួរទិញចាប់ពីឆ្នាំ ២០០១ និង Highlander ចាប់ពីឆ្នាំ ២០០៣ ឡើងមានការកែប្រែគ្រឿងម៉ាស៊ីន និងប្រព័ន្ធសុវត្ថិភាពច្រើន ណាមួយគុណភាពក៏អាចនៅល្អផងដែរ៕
ប្រភព៖ sabay.com.kh