ការធ្វើតេស្ត Papanicolaou ដែលភាគច្រើន ត្រូវបានគេស្គាល់ថា ជាតេស្ត ភេបស្មៀ ( Pap smear or Pap test) គឺជាប្រភេទនៃការពិនិត្យជាប្រចាំ ចំពោះស្ត្រី ដើម្បីតានដានរកមើលពី សញ្ញារបស់ជម្ងឺមហារីក មាត់ស្បូន ។ ការធ្វើតេស្តពិនិត្យសុខភាពមួយនេះ គឺក្នុងគោលបំណងស្វែងរក ពីបម្រែបម្រួលមិនធម្មតា នៅក្នុងកោសិកា នៃមាត់ស្បូន ដែលអាចបង្ហាញប្រាប់ពី ស្ថានភាពត្រៀមកើតជម្ងឺមហារីក ឬ ជាជម្ងឺ មហារីកមាត់ស្បូន ។
ការធ្វើតេស្តភេបស្មៀ គឺមិនមែនជា ការធ្វើតេស្តដើម្បីធ្វើរោគវិនិច្ឆ័យនោះទេ ប៉ុន្តែវាគឺជាឧបករណ៍សម្រាប់ តាមដានមួយ។ ការធ្វើតេស្តពិនិត្យនេះ គឺនឹងអាចជួយអោយយើងកំណត់បានពី ភាពមិនប្រក្រតី នៅពេល ដែលអ្នកជម្ងឺ នៅមិនទាន់លេចចេញនូវរោគសញ្ញាអ្វីមួយ នៅឡើយ ដោយវាខុសពី ការធ្វើតេស្ត ដើម្បីកំណត់ពី រោគវិនិច្ឆ័យ ដើម្បីជួយក្នុងការ កំណត់អោយបានពីមូលហេតុ នៃរោគសញ្ញា នៅក្នុងទម្រង់ នៃការធ្វើរោគវិនិច្ឆ័យ នៃជម្ងឺណាមួយ ។ ការធ្វើតេស្តភេបស្មៀនេះ ក៏អាចជួយ ក្នុងការកំណត់បានថា តើ ស្ត្រីណាខ្លះ ដែលកំពុងប្រឈមនឹង ការវិវត្តន៍មាននូវ ជម្ងឺមហារីកមាត់ស្បូន ។ ដោយសារតែ វាមិនត្រូវបាន គេចាត់ទុកថា ជាការធ្វើតេស្តសម្រាប់ការធ្វើរោគវិនិច្ឆ័យ នោះវាជាការ ចាំបាច់បំផុត សម្រាប់ស្ត្រី គ្រប់រូប ក្នុងការធ្វើវា អោយបានជាទៀងទាត់ ។
នៅក្នុងករណីភាគច្រើន ជម្ងឺមហារីកមាត់ស្បូន គឺជាជម្ងឺមួយ ដែលមានដំណើរការ នៃការវិវត្តន៍ខ្លួន របស់វាយ៉ាងយឺត។ វាអាចនឹង ចំណាយពេលជាច្រើនឆ្នាំ សម្រាប់កោសិកាត្រៀមជាជម្ងឺមហារីក មុនពេល ដែលពួកវាត្រូវ វិវត្តខ្លួនក្លាយជា ជម្ងឺមហារីកនោះ ។ ដូច្នេះហើយ ការធ្វើតេស្តភេបស្មៀ ជាប្រចាំ គឺជា ការចាំបាច់បំផុត សម្រាប់ស្ត្រីរាល់រូប ។
តើការធ្វើតេស្តភេបស្មៀនេះ ត្រូវបានដំណើរការទៅបានយ៉ាងដូចម្តេចខ្លះ ?
ក្នុងអំឡុងពេលនៃការពិនិត្យ វេជ្ជបណ្ឌិត ឬ អ្នកផ្តល់សេវាថែទាំសុខភាពនឹងធ្វើការ យកចេញនូវ ជាលិកាតូចមួយ ចេញពីក្នុង មាត់ស្បូនរបស់អ្នក។ វាត្រូវបានធ្វើឡើងដោយការ ត្រដុសថ្នម ៗទៅលើមាត់ស្បូន ដោយប្រើនូវឈើត្បាល់ ដែលមានដុំសំឡីស្តេរីល តូចមួយ។ វានឹងចំណាយពេល ត្រឹមតែ ប៉ុន្មានវិនាទីប៉ុណ្ណោះ ក្នុងការយកបាននូវ គម្រូនៃជាលិកា ហើយវា នឹងមិនបណ្តាលអោយមាន ការឈឺចាប់អ្វីនោះទេ។ តែទោះជាយ៉ាងណាក្តី មានស្ត្រីមួយចំនួន អាចជួបនឹង អារម្មណ៍នៃការឈឺពោះ រមួលៗ ក្នុងកម្រិតស្រាល ដែលស្រដៀងគ្នាទៅនឹង ការឈឺពោះ ក្នុងពេលមករដូវផងដែរ នៅក្នុងអំឡុង ពេលនៃការធ្វើតេស្តនេះ ៕
