ជាមួយនឹងការឆ្លងឆ្នាំដែលរំកិលកាន់តែកៀកនេះ មនុស្សជាច្រើនអន្ទះសារក្នុងការធ្វើដំណើរ ហើយឆ្ងល់ថាតើវាមានសុវត្ថិភាពឫទេក្នុងអំឡុងកូវីដ-១៩ ។
ដំណឹងអាក្រក់? មិនមានចម្លើយ បាទ/ចាស ពិតប្រាកដចំពោះសំណួរថា តើវាមានសុវត្ថិភាពក្នុងការធ្វើដំណើរឥឡូវនេះទេ? ប៉ុន្តែ មុនពេលដែលអ្នកនិងក្រុមគ្រួសាររបស់អ្នកសម្រេចចិត្តកក់វិស្សមកាលឆ្នាំនេះ មានការពិចារណាដ៏សំខាន់មួយចំនួន ដែលអ្នកត្រូវគិតជាពិសេស ថាតើវាមានសុវត្ថិភាពក្នុងការស្នាក់នៅសណ្ឋាគារឫទេ។
ការចូលស្នាក់នៅសណ្ឋាគារពិតជាបង្កើនឱកាសរបស់អ្នកក្នុងការទាក់ទងជាមួយមេរោគឆ្លង។ ការណែនាំរបស់ CDC សម្រាប់ការធ្វើដំណើរក្នុងពេលមានរោគរាតត្បាតនិយាយថា “ការស្នាក់នៅផ្ទះ គឺជាវិធីល្អបំផុត ដើម្បីការពារខ្លួនអ្នកនិងអ្នកដទៃពីជម្ងឺ” ។ ហើយ វាព្រមានថា អ្នកមិនគួរធ្វើដំណើរទៅណាទេ ប្រសិនបើអ្នកឈឺ ប្រសិនបើនរណាម្នាក់នៅជាមួយអ្នកឈឺ ឬប្រសិនបើអ្នកនៅក្បែរនរណាម្នាក់ដែលមានជម្ងឺកូវីដ-១៩ នៅក្នុងរយៈ២សប្តាហ៍កន្លងមកនេះ។
នៅពេលនិយាយដល់សណ្ឋាគារ មានទង់ក្រហមមួយចំនួនដែលអ្នកត្រូវដឹង។ ទីមួយ៖ ឱកាសរបស់អ្នកក្នុងការទាក់ទងជាមួយមនុស្សផ្សេងទៀត។ សណ្ឋាគារមានភាពមមាញឹកខ្លាំង និងពោរពេញទៅដោយអ្នកដំណើរមកពីគ្រប់ទិសទី ដូច្នេះនៅពេលដែលអ្នកពិចារណាថាកូវីដ-១៩ ត្រូវបានរីករាលដាលជាចម្បងតាមរយៈការទាក់ទងពីមនុស្សម្នាក់ទៅមនុស្សម្នាក់ ជាមួយដំណក់ដង្ហើម ដែលឆ្លង អ្នកនឹងឃើញថាសណ្ឋាគារបង្កើនហានិភ័យនៃវីរុស។ ដូច្នេះ ការឃ្លាតឆ្ងាយពីសង្គម និងការពាក់ម៉ាស គឺសំខាន់ណាស់ប្រសិនបើអ្នកស្នាក់នៅសណ្ឋាគារ។
ការថែរក្សាសម្អាតនៅក្នុងបន្ទប់សណ្ឋាគារក៏អាចជាបញ្ហាដែរ។ ដោយសារតែអ្នក មិនមែនជាមនុស្សតែម្នាក់គត់ ដែលចូលបន្ទប់សណ្ឋាគាររបស់អ្នក នៅពេលអ្នកស្នាក់នៅទីនោះទេ នៅពេលណាដែលមាននរណាម្នាក់ចូលក្នុងបន្ទប់អ្នកអាចនឹងនាំមេរោគចូល។ នោះ ក៏ជាការពិតផងដែរ ប្រសិនបើអ្នកស្នាក់នៅក្នុងបន្ទប់ភ្លាមៗ បន្ទាប់ពីគ្រួសារផ្សេងទៀតស្នាក់នៅក្នុងបន្ទប់តែមួយ៕