រោគសញ្ញាទូទៅបំផុតនៃជម្ងឺកូវីដ-១៩ គឺពិតជារំពឹងពីជំងឺផ្លូវដង្ហើម៖ គ្រុនក្តៅ ក្អកជាប់រហូត អស់កម្លាំង និងឈឺសាច់ដុំ។ ប៉ុន្តែ យោងតាមមជ្ឈមណ្ឌលត្រួតពិនិត្យ និងបង្ការជំងឺ (CDC) បានអោយដឹងថា មនុស្សជាច្រើនដែលមានជំងឺកូវីដ-១៩ មានរោគសញ្ញានៃក្រពះពោះវៀនដូចជា ចង្អោរ ក្អួត ឬរាគ ជាដើម ពេលខ្លះវាកើតឡើងនៅមុនពេលវិវត្តរោគសញ្ញាផ្លូវដង្ហើម។បើនិយាយឱ្យចំទៅ ការក្អួតមានទំនាក់ទំនងជាមួយកូវីដ-១៩ ។
ការស្រាវជ្រាវ បានរកឃើញបញ្ហាក្រពះពោះវៀន រួមទាំងចង្អោរ និងក្អួត ដែលជារោគសញ្ញា នៃការព្យាបាលជំងឺកូវីដ-១៩ បន្ថែមលើរោគសញ្ញាផ្លូវដង្ហើមផ្សេងៗទៀត។ ការស្រាវជ្រាវដំបូងៗ មួយចំនួនស្តីពីបញ្ហាក្រពះពោះវៀនទាក់ទងទៅនឹង កូវីដ-១៩ បានមកពីប្រទេសចិន ហើយត្រូវបានគេបោះពុម្ភផ្សាយនៅក្នុង BMJ’s Gut កាលពីខែមីនា។ អ្នកនិពន្ធការសិក្សាពីសាកលវិទ្យាល័យ Zhejiang បានរកឃើញថា ក្នុងចំណោមអ្នកជំងឺ ៦៥១ នាក់ បានចូលសម្រាកព្យាបាលនៅមន្ទីរពេទ្យក្នុងខេត្ត Zhejiang ប្រទេសចិន ចន្លោះពីថ្ងៃទី១៧ ខែមករា ដល់ថ្ងៃទី៨ ខែកុម្ភៈ អ្នកជំងឺ ៧៤នាក់ ឬស្មើនឹង ១១,៤ភាគរយ ដែលមានរោគសញ្ញាក្រពះពោះវៀន យ៉ាងហោចណាស់មួយ ដែលមានអាការៈចង្អោរ ក្អួត ឬរាគ។
ការស្រាវជ្រាវផ្សេងទៀត ពីទីក្រុងប៉េកាំង ដែលបានចុះផ្សាយក្នុងទស្សនាវដ្តី Alimentary Pharmacology & Therapeutics ក្នុងខែឧសភា បានវិភាគ រាល់ការសិក្សាល្អិតល្អន់ និងរបាយការណ៍ ករណីទាំងអស់ទាក់ទងនឹងបញ្ហារំលាយអាហារ ដែលត្រូវបានចេញផ្សាយចន្លោះខែធ្នូ ឆ្នាំ ២០១៩ ដល់ខែកុម្ភៈ ឆ្នាំ២០២០ កូវីដ-១៩ មានអាការៈក្អួតចង្អោររួមជាមួយបញ្ហាក្រពះពោះវៀនដទៃទៀត ដូចជាបាត់បង់ចំណង់អាហារ ចង្អោរ ឈឺពោះ និងសូម្បីតែឈាមក្រពះ ពោះវៀនជាដើម។ ការសិក្សាក៏បានបង្ហាញថាការក្អួតចង្អោរច្រើនកើតលើកុមារដែលមានជម្ងឺកូវីដ-១៩ ច្រើនជាងមនុស្សពេញវ័យដែល ៦,៥ ភាគរយទៅ ៦៦,៧ ភាគរយនៃកុមារដែលមានរោគសញ្ញា។
ហើយពេលខ្លះការក្អួត និងបញ្ហាក្រពះពោះវៀនផ្សេងទៀត គឺជាសញ្ញាតែមួយគត់នៃការឆ្លងមេរោគកូវីដ-១៩ ឬជាអ្នកឈានមុខគេក្នុងការឆ្លង។ យោងតាមការស្រាវជ្រាវដែលត្រូវបានចុះផ្សាយនៅក្នុងទស្សនាវដ្តីសុខភាពក្រពះរបស់អាមេរិកកាលពីខែមេសា បានអោយដឹងថា ជាង ៥០ភាគរយនៃអ្នកជំងឺកូវីដ-១៩ ចំនួន ២០៤ នាក់បានសម្រាកព្យាបាលនៅមន្ទីរពេទ្យក្នុងខេត្តហ៊ូប៉ី របស់ប្រទេសចិន នៅចន្លោះថ្ងៃទី១៨ ខែមករា ដល់ថ្ងៃទី ២៨ ខែកុម្ភៈ។ អ្នកជំងឺ ៦ នាក់ក្នុងចំណោមអ្នកជំងឺទាំងនោះមិនមានរោគសញ្ញាផ្លូវដង្ហើមអ្វីទាំងអស់។
ការស្រាវជ្រាវដែលត្រូវបានចេញផ្សាយនៅក្នុងទស្សនាវដ្តីសមាគមវេជ្ជសាស្ត្រអាមេរិកក៏បានកំណត់អ្នកជំងឺដែលមានជំងឺកូវីដ-១៩ ១៤នាក់ គឺរាគរូសនិងចង្អោរ មុនពេលពួកគេបង្ហាញរោគសញ្ញានៃគ្រុនក្តៅ ឬរោគសញ្ញាផ្លូវដង្ហើម។
ការស្រាវជ្រាវទាំងអស់នេះ និងភ័ស្តុតាងរួមបង្ហាញថាការក្អួតនិងបញ្ហាក្រពះពោះវៀនដទៃទៀតមិនគួរត្រូវបានគេព្រងើយកន្តើយក្នុងកំឡុងពេលជំងឺរាតត្បាតកូវីដ-១៩ ហើយរោគសញ្ញានេះអាចបញ្ជាក់ពីការធ្វើតេស្តដើម្បីដឹងថាតើអ្នកមានវីរុសឬអត់។
ប្រសិនបើអ្នកធ្លាប់ក្អួត ហើយត្រូវបានគេធ្វើតេស្តរកមើលកូវីដ-១៩ រឿងដែលល្អបំផុតដែលអ្នកអាចធ្វើបានគឺការផ្តាច់ខ្លួនអ្នកពីអ្នកដទៃ អំឡុងពេលអ្នករង់ចាំលទ្ធផល របស់អ្នកហើយព្យាបាលខ្លួនឯងនៅផ្ទះ។ CDC ណែនាំឱ្យរក្សាជាតិទឹកឱ្យបានគ្រប់គ្រាន់សម្រាកឱ្យបានច្រើន តាមដែលអាចធ្វើទៅបានជៀសវាងអាហារ ដែលធ្វើឱ្យក្រពះរបស់អ្នកឈឺចាប់ និងតាមដានរោគសញ្ញារបស់អ្នក។ ប៉ុន្តែប្រសិនបើអ្នកក្អួតអ្នកគួរតែស្វែងរកការព្យាបាលប្រសិនបើរោគសញ្ញារបស់អ្នកមានរយៈពេលយូរជាង ២៤ ម៉ោង ឬប្រសិនបើអ្នកកំពុងមានគ្រុនក្តៅខ្លាំង ឈឺពោះ ឬក្អួតមានឈាម ឬដុំខ្មៅ។ វេជ្ជបណ្ឌិត មានប្រសាសន៍ថាវាអាចជាសញ្ញាមួយនៃបញ្ហាធ្ងន់ធ្ងរដែលត្រូវការការមើលថែជាបន្ទាន់៕