ការកំណត់រោគវិនិច្ឆ័យដ៏សុក្រិតមានសារៈសំខាន់ណាស់សម្រាប់ការគ្រប់គ្រងដ៏ល្អបំផុតទៅលើជំងឺឈាមក្រក។ ការធ្វើតេស្តលើជំងឺនេះ គួរតែនៅឯមន្ទីរពិសោធន៍ដែលមានបទពិសោធន៍ ក៏ដូចជាឯកទេសខាងកំណកឈាម។ មន្ទីរពិសោធន៍ជាច្រើន ដែលមិនធ្លាប់ធ្វើតេស្តទាំងនេះជាញឹកញាប់ទេ ប្រហែលជាមិនអាចកំណត់រោគវិនិច្ឆ័យបានយ៉ាងសុក្រិនឡើយ។
មនុស្សភាគច្រើនដែលមានជំងឺឈាមក្រកកអាចធ្វើរោគវិនិច្ឆ័យដឹងតាំងពីវ័យក្មេង។ ទោះបីជាយ៉ាងណាក៏ដោយ អ្នកជំងឺដែលមានកម្រិតស្រាលប្រហែលជាមិនអាចធ្វើរោគវិនិច្ឆ័យដឹងឡើយលុះត្រាតែឈានដល់វ័យជំទង់ ហើយធ្លាប់មានអាការៈហូរឈាមមិនឈប់ពេលមានរបួស ឬវះកាត់។
ជំងឺឈាមក្រកកត្រូវបានគ្រូពេទ្យធ្វើរោគវិនិច្ឆ័យដឹងតាមរយៈការធ្វើតេស្តឈាមដើម្បីកំណត់ថាតើកត្តាធ្វើអោយកកឈាម (Clotting Factor) ត្រូវបានបាត់បង់ ឬមានចំនួនតិច ហើយតើមួយណាដែលបណ្តាលអោយមានបញ្ហា។ បើសិនជាអ្នកមានសមាជិកគ្រួសារកើតជំងឺឈាមក្រកក យកល្អគួរទែអោយគ្រូពេទ្យដឹងអំពី Clotting Factor ដែលសាច់ញាតិរបស់អ្នកបានបាត់។ អ្នកប្រហែលជានឹងបាត់បង់វាដូចគ្នាដែរ។
បើសិនជាអ្នកដឹងថាអ្នកផ្ទុកជំងឺឈាមក្រកកក្នុងខ្លួន ការធ្វើតេស្តរកជំងឺលើកូនរបស់អ្នកគួរតែធ្វើអោយលឿនបំផុតក្រោយពីសម្រាលរួច។ តេស្តទាំងនេះអាចធ្វើលើឈាមដែលចេញពីទងសុក ឬបូមចេញពីសរសៃវ៉ែន។ អ្នកប្រហែលជាត្រូវបានណែនាំអោយពន្យាពេលការងារវេជ្ជសាស្ត្រមួយចំនួនដូចជា ការកាត់ចុង រហូតដល់អ្នកដឹងថាកូនរបស់អ្នកមានជំងឺឈាមក្រកកឬក៏អត់។
គ្រួសារមួយចំនួនដែលមានជំងឺឈាមក្រកកប្រហែលជាចង់ស្នើរអោយធ្វើតេស្តកូនរបស់ពួកគេតាំងពីមិនទាន់កើតមកម្លេះ ឬធ្វើតេស្តមុនកើត។ តេស្តមួយនេះអាចធ្វើឡើងពេលមានផ្ទៃពោះភ្លាមៗ ដើម្បីអាចអោយគ្រួសារអ្នកធ្វើការសម្រេចចិត្ត និងត្រៀមខ្លួន។
បើសិនជាអ្នកមានផ្ទៃពោះ និងគិតថាអ្នកអាចផ្ទុកជំងឺនេះ ឬបើសិនជាអ្នកមានកូនហើយដឹងថាមានជំងឺ យកល្អគួរតែពិគ្រោះជាមួយអ្នកជំនាញខាងសម្ភព។
មានមធ្យោបាយបីយ៉ាងដើម្បីកំណត់អោយដឹងថាអ្នកមានផ្ទុកជំងឺឈាមក្រកកឬក៏អត់៖
- មែកធៀងគ្រួសារ៖ បើសិនជាអ្នកមានកូនប្រុសកើតជំងឺឈាមក្រកក ហើយមានកូនប្រុសម្នាក់ទៀត, បងប្អូនប្រុស, ឪពុក, ពូ, បងប្អូនជីដូនមួយប្រុស ឬជីតាមានបញ្ហា មានន័យថាអ្នកជាអ្នកផ្ទុកជំងឺនេះហើយ។ ដូច្នេះមិនចាំបាច់ធ្វើតេស្តអ្វីទៀតឡើយ។
- កត្តាធ្វើអោយកកឈាម (Clotting Factor)៖ បើសិនជា កម្រិត Clotting Factor ក្នុងឈាមទាបជាង ៥០ភាគរយនៃតម្លៃធម្មតា អ្នកប្រហែលជាផ្ទុកជំងឺ ហើយមានអាការៈជំងឺស្រាល។ បើសិនជា Clotting Factor លើស ៥០ភាគរយ អ្នកនៅតែជាអ្នកផ្ទុកដដែល ព្រោះជំងឺនេះអាចអោយ Clotting Factor ឡើងចំនួនបាន។ ដូច្នេះការធ្វើតេស្តផ្សេងៗទៀតប្រហែលជារឿងសំខាន់។
- តេស្ត DNA៖ ការធ្វើតេស្ត DNA អាចមើលឃើញការបំបែកកោសិការដែលបណ្តាលអោយមានជំងឺឈាមក្រកកលើកូនប្រុស ឬសាច់ញាតិម្នាក់ទៀត ហើយចូរប្រៀបធៀបវាជាមួយនឹង DNA របស់អ្នកទៅ៕