​ថ្ងៃទី​២១ ខែធ្នូ ឆ្នាំ​២០២០ ប្រធានាធិបតី​ជាប់ឆ្នោត Joe Biden បាន​ចាក់​វ៉ាក់សាំង Pfizer-BioNTech លើកដំបូង​នៅលើ​កញ្ចក់​ទូរទស្សន៍​ផ្ទាល់ កាលពី​រសៀល​ថ្ងៃ​ច័ន្ទ ហើយ​បាន​ធានា​ដល់​ជនជាតិ​អាមេរិក​អំពី​សុវត្ថិភាព​របស់​វា​។​

​គាត់​បានទទួល​វ៉ាក់សាំង នៅ​មន្ទីរពេទ្យ ChristianaCare ក្នុង​ទីក្រុង Newark រដ្ឋ Del បន្ទាប់មក​លោក Biden បាន​ប្រាប់​ប្រជាជន​កុំអោយ​ខ្លាច​វ៉ាក់សាំង​។ លោក​បាន​មានប្រសាសន៍ថា “​ខ្ញុំ​កំពុង​ធ្វើ​រឿងនេះ ដើម្បី​បង្ហាញថា​ប្រជាជន​គួរតែ​ត្រៀមលក្ខណៈ​នៅពេល​ទទួល​វ៉ាក់សាំង​” ។ “​គ្មាន​អ្វីដែល​ត្រូវ​ព្រួយបារម្ភ​ទេ​។ ខ្ញុំ​ទន្ទឹង​រងចាំ​ការចាក់​ជា​លើក​ទី​២​។​”

​លោក Biden បាន​កោតសរសើរ​ដល់​បុគ្គលិក​ថែទាំ​សុខភាព​ជួរមុខ​ដែល​បាន​យកចិត្តទុកដាក់​ចំពោះ​អ្នក​ជម្ងឺ និង​អ្នកវិទ្យាសាស្ត្រ ដែល​បាន​បង្កើត​វ៉ាក់សាំង​នៅ​ឆ្នាំនេះ​។ លោក​ក៏បាន​សាទរ​ចំពោះ​រដ្ឋបាល Trump និង​ការ​បង្កើនល្បឿន​នៃ​ដំណើរការ​អភិវឌ្ឍន៍​វ៉ាក់សាំង កូ​វីដ​-១៩ ។​

​លោក​បន្ថែមថា​ទោះយ៉ាងណា​ដំណើរការ​នៃ​ការចាក់​វ៉ាក់សាំង​កំពុង​ចាប់ផ្តើម ហើយ​វា​នឹង​ត្រូវការ​ពេលវេលា​។ ទន្ទឹមនឹងនេះ លោក​បាន​ជំរុញ​ឱ្យ​ប្រជាជន​ស្តាប់​មន្ត្រី​សុខាភិបាល​សាធារណៈ ពាក់​ម៉ាស​បិទមុខ ធ្វើតាម​គោលការណ៍​ណែនាំ​ក្នុងសង្គម និង​កុំ​ធ្វើដំណើរ​ក្នុង​រដូវ​វិស្សមកាល​៕​