ជំងឺភ្នែកស្ងួត គឺអាចកើតមានចំពោះមនុស្សគ្រប់វ័យ។ ជំងឺនេះកើតឡើងនៅពេលក្រពេញទឹកភ្នែកមិនបានធ្វើការផលិតទឹកភ្នែកគ្រប់គ្រាន់ ដើម្បីចិញ្ចឹមកញ្ចក់ភ្នែក។ (អាន ៖ ចេះតែអស់កម្លាំង ឈឺសាច់ដុំ ដេកមិនលក់ អារម្មណ៍ភិតភ័យអាចដោះស្រាយបាន)ស្ថានភាពនេះអាចនាំឲ្យមានការឈឺចាប់, មិនស្រួលក្នុងភ្នែក, ភ្នែកឡើងក្រហម, ហើម, រលាកក្រហាយ និងស្ងួត។ ប៉ុន្តែកុំបារម្ភ អ្នកអាចដោះស្រាយបញ្ហាភ្នែកស្ងួតបានដោយខ្លួនឯងជាមួយនឹងវិធីសាស្ត្របែបធម្មជាតិងាយៗមួយចំនួនខាងក្រោមនេះ ៖
១. បន្ថែមអាស៊ីតខ្លាញ់ក្នុងរបបអាហារប្រចាំថ្ងៃ
ការបន្ថែមអាស៊ីតខ្លាញ់អូមេហ្គា ៣ និង អូមេហ្គា ៦ ទៅក្នុងរបបអាហារ គឺអាចជួយសម្រាល ក៏ដូចជាព្យាបាលអាការៈនៃជំងឺភ្នែកស្ងួតបានប្រកបដោយប្រសិទ្ធិភាពខ្ពស់។ អាស៊ីតខ្លាញ់ល្អទាំង ២ នេះ មាននៅក្នុងអាហារដូចជា ត្រីសាលម៉ុន, ត្រីសាឌីន, គ្រាប់ធញ្ញជាតិ, ប្រេងបន្លែ និងមានជាលក្ខណៈថ្នាំគ្រាប់ផងដែរ។
២. ព្រិចភ្នែកឲ្យបានញឹកញាប់
ការសម្លឹងមើលកញ្ចក់កុំព្យូទ័រ, ទូរស័ព្ទ ឬទូរទស្សន៍ ជាញឹកញយកាត់បន្ថយចំនួននៃការព្រិចភ្នែករបស់អ្នក។ ដូច្នេះព្យាយាមឧស្សាហ៍ព្រិចភ្នែក នៅពេលអ្នកសម្លឹងមើលអេក្រង់ទាំងនោះ ដើម្បីជៀសវាងបញ្ហាស្ងួតភ្នែក។ ហើយកុំភ្លេចបន្ថយពន្លឺគ្រឿងអេឡិចត្រូនិកប្រភេទនេះត្រឹមកម្រិតស្រាលមួយផង និងកុំប្រឹងបើកភ្នែកខំសម្លឹងពេក វិធីនេះជួយកាត់បន្ថយការហៀរទឹកភ្នែក។
៣. រក្សាសំណើមក្នុងរាងកាយ
គ្រប់ផ្នែកទាំងអស់នៃរាងកាយ រួមទាំងភ្នែក គឺត្រូវការទឹក ដើម្បីរក្សាបាននូវសុខភាពល្អប្រសើរ។ ការទទួលទានទឹកបានគ្រប់គ្រាន់នឹងជួយរក្សាបាននូវជាតិសំណើមដល់គ្រប់ផ្នែកនៃរាងកាយ។ ចូរទទួលទានទឹកឲ្យបានយ៉ាងហោចណាស់ពី ៨ ទៅ ១០ កែវ ក្នុងមួយថ្ងៃ។ ប្រសិនបើអ្នកមិនចូលចិត្តទឹកធម្មតាទេនោះ អ្នកអាចទទួលទានភេសជ្ជៈដទៃទៀតដែលគ្មានជាតិកាហ្វេអ៊ីន ឬជាតិអាល់កុល។ ព្យាយាមទទួលទានអាហារមួយចំនួនដែលមានផ្ទុកទៅដោយជាតិទឹកដូចជា ឪឡឹក និងត្រសក់ ជាដើម។ វិធីមួយដើម្បីដឹងថាតើអ្នកខ្សោះជាតិទឹកក្នុងរាងកាយឬយ៉ាងណា ចូរពិនិត្យមើលទឹកនោមរបស់អ្នក។ ប្រសិនបើវាមានពណ៌លឿងស្រាល ឬគ្មានពណ៌ អ្នកទំនងជាទទួលបានជាតិទឹកគ្រប់គ្រាន់ហើយ។
៤. ស្អំកម្ដៅ
– ប្រើប្រាស់ក្រណាត់ស្អាតទន់មួយ ជ្រលក់ចូលទឹកក្ដៅឧណ្ហៗ ពូតទឹកចេញ ហើយដាក់ស្អំលើភ្នែករបស់អ្នកសម្រាប់រយៈពេល ១ នាទី។
– ប្រើម្រាមដៃសង្កត់ថ្នមៗលើគែមនៃត្របកភ្នែក។ វិធីនេះអាចជួយច្របាច់ខ្លាញ់ ឬប្រេងដែលស្ទះចេញ។ សំណើមក្ដៅឧណ្ហៗអាចជួយបន្ធូរ ឬរំលាយខ្លាញ់ ឬប្រេងដែលកកស្ទះក្នុងក្រពេញ។
- ជ្រលក់ក្រណាត់ចូលទឹកម្ដងទៀតឲ្យបានញឹកញាប់ ដើម្បីរក្សាបានសំណើម ហើយក្ដៅឧណ្ហៗ។ អ្នកគួរស្អំកម្ដៅនេះឲ្យបានជាប្រចាំ ដើម្បីកាត់បន្ថយការរលាក បើទោះបីជាភ្នែករបស់អ្នកមានសភាពគ្រាន់បើហើយក៏ដោយ៕