វីតាមីន B1 ឬហៅថា Thiamine គឺជាជីវជាតិដ៏សំខាន់ដែលរាងកាយត្រូវការដើម្បីថែរក្សាសុខភាពសរសៃប្រសាទ សាច់ដុំ និងសុខភាពបេះដូង។ វីតាមីននេះមិនខុសពីវីតាមីន B ផ្សេងៗដែរ គឺជាប្រភេទវីតាមីនរលាយក្នុងទឹក ហើយក៏ដើរតួនាទីដ៏សំខាន់ក្នុងការរំលាយជាតិស្ករផងដែរ។ វីតាមីននេះជួយរាងកាយក្នុងការប្រែក្លាយកាបូអ៊ីដ្រាតទៅជាថាមពល។ (អាន:ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?)ជាមួយគ្នានេះដែរ វីតាមីន B1 គឺជាវីតាមីនដែលធ្វើការខ្លាំងក្លាមួយដែលរាងកាយត្រូវការ។ វីតាមីន B1 ត្រូវបានជាប់ទាក់ទងនឹងប្រយោជន៍ចំពោះសុខភាពមួយចំនួនចាប់ពីការរំលាយអាហារ និងពង្រឹងដល់ប្រព័ន្ធភាពស៊ាំដើម្បីបង្ការផលវិបាកដល់ប្រព័ន្ធសរសៃប្រសាទ សាច់ដុំ ខួរក្បាល បេអះដូង ក្រពះជាដើម។ ថាតើកង្វះវីតាមីន B1 មានរោគសញ្ញាដូចម្ដេចខ្លះ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអាការៈដែលអាចលេចឡើងនៅពេលរាងកាយខ្វះវីតាមីន B1 ៖
១. ខ្សោយកម្លាំង
មួយក្នុងចំណោមតួនាទីចម្បងនៃវីតាមីន B1 គឺបំលែងអាហារទៅជាថាមពលដែលអាចប្រើប្រាស់បាន។ ដូច្នេះហើយទើបកង្វះវីតាមីននេះក្នុងរាងកាយអាចបណ្ដាលឱ្យអ្នកមានអារម្មណ៍ខ្សោយកម្លាំង។ ទោះបីជាអ្នកបានទទួលទានអាហារដែលអាចផ្ដល់ថាមពលច្រើនប៉ុណ្ណាក៏ដោយ ក៏គ្មានន័យដែរប្រសិនបើរាងកាយមានផ្ទុកវីតាមីន B1 មិនគ្រប់គ្រាន់។
២. ខូចខាតសសៃប្រសាទ
នេះក៏ព្រោះតែវីតាមីន b1 ចាំបាច់ណាស់សម្រាប់រក្សាសុខភាពសសៃប្រសាទ។ នេះក៏ជាមូលហេតុចម្បងបំផុតមួយនៃបញ្ហាខូចសសៃប្រសាទដែលអាចកើតឡើងនៅពេលរាងកាយខ្វះវីតាមីន B1។ រោគសញ្ញាដំបូងបំផុតនៃបញ្ហាខូចសសៃប្រសាទរួមបញ្ចូលទាំងការស្ពឹកឈឺឆៀបៗ និងការឈឺចាប់ត្រង់ប្រអប់ដៃ ដើមដៃ ប្រអប់ជើង និងជើង។
៣. បញ្ហាភ្នែកផ្សេងៗ
ចាប់តាំងពីវីតាមីន b1 អាចជួយរក្សាសុខភាពសសៃប្រសាទមក កង្វះនៃវីតាមីននេះក៏អាចជះផលប៉ះពាល់ដល់សសៃប្រសាទអុបទិកដែលបង្កបញ្ហាផ្សេងៗលើការមើលឃើញផងដែរ។ យោងតាមការសិក្សាមួយចំនួនជំងឺទឹកដក់ក្នុងភ្នែកនិងជំងឺភ្នែកឡើងបាយ គឺជាបញ្ហាភ្នែកមួយចំនួនដែលអាចកើតឡើងចំពោះអ្នកដែលមិនទទួលបានវីតាមីន B1 គ្រប់គ្រាន់ពីរបបអាហារប្រចាំថ្ងៃរបស់ពួកគេ។
៤. ឆាប់ខឹងមួរម៉ៅ
វីតាមីន B1 ក៏ចាំបាច់សម្រាប់រក្សាសុខភាពខួរក្បាលផងដែរ។ ប្រសិនបើរាងកាយមានផ្ទុកវីតាមីននេះតាមរយៈរបបអាហារប្រចាំថ្ងៃមិនបានគ្រប់គ្រាន់ទេនោះ អ្នកនឹងប្រែជាមានអារម្មណ៍ឆាប់ខឹងមួរម៉ៅខុសធម្មតាមិនខាន។ ជំងឺបាក់ទឹកចិត្ត (Depression) ឬថប់បារម្ភក៏អាចកើតឡើងបានគួរឱ្យកត់សម្គាល់។ វេជ្ជបណ្ឌិតជាច្រើននិយាយថាកង្វះវីតាមីន B1 ក៏បណ្ដាលឱ្យខួរក្បាលខ្សោយការចងចាំផងដែរ។
៥. ប្រព័ន្ធភាពស៊ាំរាងកាយចុះខ្សោយ
កង្វះវីតាមីន b1 ក៏អាចនាំឱ្យប្រព័ន្ធភាពស៊ាំរាងកាយចុះខ្សោយ។ នេះក៏ព្រោះតែសារធាតុចិញ្ចឹមចាំបាច់សម្រាប់សុខភាពពោះវៀនដែលមានឥទ្ធិពលលើប្រព័ន្ធភាពស៊ាំរាងកាយរបស់មនុស្សម្នាក់ៗ៕