ភាគច្រើននៃពួកយើងសុទ្ធតែដឹងថា ការស្ថិតក្រោម ឬត្រូវកម្ដៅថ្ងៃលើសលុបពេកអាចបង្កហានិភ័យនៃជំងឺមហារីកស្បែក រួមទាំងបញ្ហានៃភាពចាស់ជាងវ័យ ស្នាមជ្រីវជ្រួញ ជាំ និងស្នាមអាចម៍រុយជាដើម។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) វាជាការពិត! ប៉ុន្តែអ្នកក៏ប្រឈមមុខនឹងបញ្ហាសុខភាពគួរឱ្យព្រួយបារម្ភផងដែរ ប្រសិនបើមិនត្រូវកម្ដៅថ្ងៃសោះ។ ហើយវីតាមីន D ជាមូលហេតុចម្បងបំផុតមួយដែលធ្វើឱ្យពន្លឺព្រះអាទិត្យមានតួនាទីចាំបាច់សម្រាប់សុខភាពល្អប្រសើរ។ ថាតើរាងកាយនឹងទទួលបានអត្ថប្រយោជន៍អ្វីខ្លះទៅនៅពេលទទួលបានពន្លឺព្រះអាទិត្យមិនគ្រប់គ្រាន់? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីផលល្អៗនៃកម្ដៅថ្ងៃចំពោះសុខភាព ៖

១. សម្អាតឈាម

កម្ដៅថ្ងៃ ឬពន្លឺព្រះអាទិត្យអាចជ្រាបចូលតាមស្បែកទៅក្នុងឈាមនិងសសៃឈាម។ ពន្លឺព្រះអាទិត្យអាចសម្អាតឈាមនិងធ្វើឱ្យចរន្តឈាមរត់កាន់តែមានភាពប្រសើរឡើង។

២. កាត់បន្ថយហានិភ័យនៃជំងឺមហារីក

ទោះជាការត្រូវកំដៅថ្ងៃច្រើនហួសពេកពេក គឹអាចធ្វើឱ្យអ្នកប្រឈមមុខខ្ពស់នឹងហានិភ័យនៃជំងឺមហារីកស្បែក។ ប៉ុន្តែតើអ្នកធ្លាប់ដឹងទេថាការមិនត្រូវពន្លឺថ្ងៃសោះក៏អាចជាមូលហេតុចម្បងបំផុតមួយនៃការកើតជំងឺមហារីកដែរ? យោងតាមការសិក្សាស្រាវជ្រាវបែបវិទ្យាសាស្ត្រជាច្រើនបានឱ្យដឹងថា វីតាមីន D នៃកំដៅថ្ងៃជាសារធាតុចិញ្ចឹមដ៏ចាំបាច់ដែលមានតួនាទីជួយការពារអ្នកពីបញ្ហានៃជម្ងឺមហារីកមួយចំនួនបាន។

៣. កាត់បន្ថយជម្ងឺលើសសម្ពាធឈាម

ជាធម្មតារាងកាយផលិតនូវ​ហ្គាសមួយប្រភេទហៅថា អុកស៊ីតនីទ្រិក (nitric oxide) មានឥទ្ធិពលធ្វើឱ្យសសៃឈាមរីកដែលសំខាន់ណាស់សម្រាប់ការររក្សាបាននូវសម្ពាធឈាមប្រក្រតី។ ហើយកម្ដៅព្រះអាទិត្យ គឺជួយផ្ដល់នូវអុកស៊ីតនីទ្រិកបន្ថែមដល់រាងកាយ។ ដូច្នេះហើយទើបការទទួលបានពន្លឺថ្ងៃគ្រប់គ្រាន់អាចជួយទប់ស្កាត់ហានិភ័យនៃជំងឺលើសសម្ពាធឈាមនិងជំងឺបេះដូង។

៤. ជួយឱ្យស្រកទម្ងន់

អុកស៊ីតនីទ្រិកដែលយើងទទួលបានពីពន្លឺព្រះអាទិត្យ គឺមិនត្រឹមតែជួយរាងកាយទប់ស្កាត់ហានិភ័យនៃជំងឺលើសឈាមប៉ុណ្ណោះទេ ប៉ុន្តែក៏ជួយកម្ចាត់សម្រកទម្ងន់ដែលលើសបានយ៉ាងប្រសើរផងដែរ។ សារធាតុហ្គាសនេះបង្កើននិងរក្សាដំណើរការនៃការដុតរំលាយអាហារក្នុងរាងកាយ។

៥. កាត់បន្ថយហានិភ័យជម្ងឺបាក់ទឹកចិត្ត (Depression)

អ្នកជំនាញផ្នែកសុខភាពខួរក្បាលបានឱ្យដឹងថា អាការៈនៃជំងឺធ្លាក់ទឹកចិត្តអាចបណ្ដាលមកពីការត្រូវពន្លឺថ្ងៃមិនបានគ្រប់គ្រាន់។ នោះក៏ព្រោះតែវីតាមីន D ដែលផ្ដល់ឱ្យដោយពន្លឺព្រះអាទិត្យ គឺចាំបាច់ណាស់សម្រាប់ការផលិតអ័រម៉ូនរីករាងក្នុងខួរក្បាល។

៦. ពង្រឹងប្រព័ន្ធភាពស៊ាំ

ភាគច្រើននៃពួកយើងសុទ្ធតែដឹងថា វីតាមីន c គឺមានសារៈសំខាន់ណាស់សម្រាប់ពង្រឹងប្រព័ន្ធភាពស៊ាំនៃរាងកាយ។ ប៉ុន្តែប្រហែលជាមិនធ្លាប់ចាប់អារម្មណ៍ទេថា ប្រព័ន្ធភាពស៊ាំនៃរាងកាយក៏ត្រូវការវីតាមីន D ដើម្បីរក្សាបាននូវភាពរឹងមាំទប់ទល់នឹងការឆ្លងជំងឺផ្សេងៗផងដែរ។ អ្នកនឹងសម្គាល់ឃើញថាខ្លួនឯងងាយនឹងឆ្លងជំងឺផ្សេងៗញឹកញាប់ជាងធម្មតា ប្រសិនបើមិនចេញទៅក្រៅសោះ។

៧. កាត់បន្ថយហានិភ័យនៃជំងឺពុកឆ្អឹង

ក្នុងបរិមាណ ឬកម្ដៅល្មម ពន្លឺព្រះអាទិត្យ គឺពិតជាមានអត្ថប្រយោជន៍ណាស់ចំពោះសុខភាពរាងកាយទាំងមូល រួមទាំងឆ្អឹងល្អប្រសើរ។ រាងកាយអាចទទួលបាននូវវីតាមីន D តាមរយៈការស្ថិតក្រោម ឬប៉ះពាល់នឹងពន្លឺព្រះអាទិត្យ។ វីតាមីន D ជាវីតាមីនដែលជួយបង្កើនលើកកម្ពស់ឆ្អឹងក្នុងការស្រូបយកនូវជាតិកាល់ស្យូម។ បរិមាណនៃជាតិកាល់ស្យូមគ្រប់គ្រាន់ គឺជួយអោយឆ្អឹងរក្សាបាននូវសុខភាពល្អរឹងមាំ ជៀសឆ្ងាយពីជំងឺពុកឆ្អឹង។

សម្គាល់ ៖ ដើម្បីអាចជៀសផុតពីបញ្ហាសុខភាពផ្សេងៗអ្នកគួរអនុញ្ញាតឱ្យរាងកាយត្រូវពន្លឺព្រះអាទិត្យសម្រាប់រយៈពេលពី ១០ ទៅ ១៥ នាទីក្នុងមួយថ្ងៃ។ ហើយចន្លោះម៉ោង ១០ ព្រឹក និង ម៉ោង ៤ ល្ងាច គឺជាពេលវេលាដ៏ប្រសើរបំផុត៕