ការរកឃើញនៃកាំរស្មី X និងការបង្កើតបាននូវម៉ាស៊ីនស្កានែ(CT Scanner)គឺជាផលប្រយោជន៏មួយដ៏សំខាន់នៅក្នុងវិស័យវេជ្ជសាស្ត្រ។ រូបភាពវេជ្ជសាស្ត្រនៃកាំរស្មី Xដែលត្រូវបានទទួលស្គាល់ថាជាឧបករណ៍វេជ្ជសាស្ត្រដ៏មានតម្លៃសម្រាប់ការស្វែងរករោគវិនិច្ឆ័យ និង ការធ្វើនីតិ វិធីវេជ្ជសាស្ត្រ។ កាំរស្មីX ត្រូវបានគេប្រើដើម្បី៖
- ជួយធ្វើរោគវិនិច្ឆ័យជំងឺ និងតាមដានការព្យាបាល
- ជាជំនួយក្នុងការព្យាបាលវេជ្ជសាស្ត្រ និងការវះកាត់
- ជួយបង្ហាញផ្លូវ ពេលដែលគ្រូពេទ្យត្រូវការបញ្ចូលទុយោ ឬឧបករណ៍ផ្សេងទៀតទៅក្នុងរាងកាយ ព្យាបាលដុំសាច់ ឬដើម្បីយកកំណកឈាម ឬអ្វីដែលស្ទះចេញ។
នៅក្នុងទិដ្ឋភាពវេជ្ជសាស្ត្រមានហានិភ័យដែលអាចមកពីការប្រើប្រាស់កាំរស្មី X ដែលទាក់ទងនឹងការប្រើវិទ្យុសកម្មដើម្បីបង្កើតរូបភាពនៃរាងកាយ។ វិទ្យុសកម្មគឺជាទម្រង់មួយថាមពលដែលមានសម្មត្ថភាពគ្រប់គ្រាន់ដែលអាចបណ្តាលអោយខូចខាតដល់DNAរបស់កោសិការ។ ហានិភ័យពីការប៉ះពាល់ទៅនឹងវិទ្យុសកម្មដែលជាកាំរស្មីXនេះរួមមានដូចជា
- ការកើនឡើងតិចតួចមួយដែលមនុស្សដែលបានប៉ះពាល់ទៅនឹងកាំរស្មី Xនឹងអាចមានមហារីកនៅពេលក្រោយមក។
- ប៉ះពាល់ដល់ជាលិកាដូចជាធ្វើអោយមានជំងឺភ្នែកឡើងបាយ ឡើងក្រហមលើស្បែក ជ្រុះសក់ដែលកើតឡើងនៅក្នុងកម្រិតខ្ពស់នៃវិទ្យុសកម្ម ហើយកម្រសម្រាប់ប្រភេទជាច្រើននៃការថតទាំងនេះ។ ឧទាហរណ៍ម៉ាស៊ីនស្កានែ( CT )ធម្មតាមិនបណ្តាលអោយ មានផលប៉ះពាល់ដល់ជាលិកានោះទេ ប៉ុន្តែក្នុងកម្រិតថាមពលខ្ពស់មួយគ្រប់គ្រាន់អាចបណ្តាលអោយមានផលប៉ះពាល់បែបនោះ។
ហានិភ័យផ្សេងទៀតនៃកាំរស្មី Xគឺជាប្រតិកម្មដែលជាប់ទាក់ទងនឹងការចាក់ថ្នាំតាមសសែ ឬសារធាតុពណ៌មួយចំនួនពេលខ្លះដែលត្រូវបានគេប្រើដើម្បីទទួលបានរូភាពកាន់តែច្បាស់។ ហានិភ័យនៃការវិវត្តទៅជាជំងឺមហារីកពីការប៉ះពាល់វិទ្យុសកម្មនៃកាំរស្មីXជាទូទៅតិចតួចណាស់ហើយវាអាស្រ័យលើ:
- កម្រិតវិទ្យុសកម្មដែលបានប្រើ៖ ហានិភ័យនៃជំងឺមហារីកកើនឡើងតាមកម្រិតដែលបានប្រើ និងចំនួនដងនៃការថតកាំរស្មី X ដែលអ្នកជំងឺបានថត។
- អាយុរបស់អ្នកជំងឺ៖ ហានិភ័យនៃជំងឺមហារីកនេះមានកាន់តែច្រើនសម្រាប់អ្នកជំងឺដែលបានទទួលកាំរស្មី Xនៅវ័យក្មេង ជាងអ្នកដែលមានវ័យចាស់។
- ភេទ៖ ស្ត្រីគឺមានហានិភ័យខ្ពស់ជាងបុរសសម្រាប់ការវិវត្តទៅជាជំងឺមហារីកដែលមកពីវិទ្យុសកម្មបន្ទាប់ពីបានថតដូចគ្នានៅអាយុដូចគ្នា។
- ផ្នែកនៃរាងកាយ៖ សរីរាង្គខ្លះមានការឆាប់ទទួលវិទ្យុសកម្មជាងសរីរាងដទៃទៀត៕
