សន្លាក់ គឺជាកន្លែងដែលឆ្អឹងពីរជួបប្រសព្វគ្នា ដើម្បីអាចធ្វើចលនាបាន ។ ការរលាកសន្លាក់ អាចបណ្តាលអោយសន្លាក់ ហើម ឈឺចាប់ តឹងនិង ក្រហម ។ការរលាកសន្លាក់អាចកើតមានទៅជាលិកានានាដែលនៅជុំវិញសន្លាក់នោះ ដូចជា សរសៃពួរ, សរសៃចង និង សាច់ដុំ ។
ចំពោះអ្នកជំងឺរលាកសន្លាក់រ៉ាំរ៉ៃខ្លះ ការរលាករ៉ាំរ៉ៃអាចបណ្តាលអោយខូចខាតដល់ឆ្អឹងខ្ចី, ឆ្អឹង, សរសៃចង ព្រមទាំងខូចទ្រង់ទ្រាយរបស់សន្លាក់នោះទៀតផង ។
ការខូចខាតសន្លាក់នេះអាចកើតឡើងយ៉ាងឆាប់រហ័ស និង វិវត្តទៅរកភាពធ្ងន់ធ្ងរ ។ ជាមួយគ្នានេះផងដែរ ការសិក្សាបានបង្ហាញថា ការខូចខាតសន្លាក់លឿនបែបនេះមិនទាក់ទងគ្នាទៅនឹងកំរិតនៃការឈឺចាប់, ការតឹងណែន ឬ ហើមសន្លាក់នោះទេ ។
ជំងឺរលាកសន្លាក់រ៉ាំរ៉ៃ គឺជាជំងឺសន្លាក់ដែលគេឧស្សាហ៍ជួបញឹកញាប់ ។ ជំងឺនេះកើតលើស្ត្រីបីដងច្រើនជាងបុរស (ប៉ុន្តែ មិនប្រកាន់ពូជសាសន៍នោះទេ) ។ ជំងឺរលាកសន្លាក់រ៉ាំរ៉ៃអាចកើតលើមនុស្សគ្រប់វ័យ សូម្បីតែក្មេងៗក៏ដោយ, ប៉ុន្តែ ជាធម្មតាច្រើនកើតលើមនុស្សដែលមានវ័យចន្លោះពី ៤០ ទៅ ៦០ ឆ្នាំ ។ នៅក្នុងគ្រួសារមួយចំនួន អាចមានសមាជិកគ្រួសារច្រើននាក់កើតជំងឺនេះ ដែលគេអាចគិតថាវាមកពីកត្តាតំណពូជ ។
មូលហេតុ
មូលហេតុ គឺ “មិនដឹង” ។ ទោះបីជាគេសង្ស័យទៅលើភ្នាក់ងារចម្លងរោគ ដូចជា វីរុស, បាក់តេរី, និង ផ្សិត - ប៉ុន្តែ វាគ្មានអំនះអំនាងច្បាស់លាស់នោះទេ ។ មូលហេតុនៃជំងឺរលាកសន្លាក់រ៉ាំរ៉ៃកំពុងក្លាយជាប្រធានបទដ៏រសើបមួយសម្រាប់អ្នកស្រាវជ្រាវមកពីគ្រប់តំបន់នៅលើពិភពលោក ។ អ្នកសិក្សាស្រាវជ្រាវភាគច្រើនជឿជាក់ថា ការវិវត្តទៅរកជំងឺរលាកសន្លាក់រ៉ាំរ៉ៃអាចបណ្តាលមកពីកត្តាហ្សេនេទិក ឬហៅម្យ៉ាងទៀតថា កត្តាតំណពូជ (hereditary) ។ យ៉ាងណាមិញ គេក៏គិតផងដែរថា ការឆ្លងមេរោគមួយចំនួន និង កត្តាបរិស្ថានក៏អាចចូលរួមចំណែកធ្វើអោយប្រព័ន្ធភាពស៊ាំរបស់យើងសង្ស័យទៅលើខ្លួនឯង (ដែលជាហេតុធ្វើអោយវាវាយប្រហារលើខ្លួនឯង) ។ នេះទើបបណ្តាលអោយមានការរលាកនៅតាមសន្លាក់ ហើយពេលខ្លះប៉ះពាល់ដល់សរីរាង្គផ្សេងៗទៀត ដូចជា ភ្នែក ឬ សួត ។
គេមិនបានដឹងថា អ្វីជាអ្នកចាប់ផ្តើមវាយប្រហារទៅជំងឺរលាកសន្លាក់រ៉ាំរ៉ៃនេះទេ ។
កត្តាបរិស្ថានអាចជាមូលហេតុនៃការកើតជំងឺរលាកសន្លាក់រ៉ាំរ៉ៃ ។ ឧទាហរណ៍ អ្នកវិទ្យាសាស្ត្របានរកឃើញថា ផ្សែងបារីបង្កើនការប្រឈមមុខទៅនឹងជំងឺរលាកសន្លាក់រ៉ាំរ៉ៃ ។