ក្លិនពីទ្វារមាសគឺជាក្លិនមិនធម្មតាដែលចេញពីទ្វារមាស។ ភាពមិនធម្មតានៃក្លិននេះជារឿយៗត្រូវបានគេពិពណ៌នាថាមានក្លិនឆ្អាប។ ភាពមិនធម្មតានៃក្លិនទ្វារមាសជារឿយៗត្រូវបានផ្សារភ្ជាប់ជាមួយនឹងរោគសញ្ញាដទៃទៀតដូចជា រមាស់ទ្វារមាស ឬរលាក និងហូរទឹកចេញពីទ្វារមាស។
មូលហេតុ
បាក់តេរីគឺជាមូលហេតុជួបញឹកញាប់បំផុត។ ជំងឺកាមរោគមួយចំនួនអាចបណ្តាលអោយមានក្លិននោះផងដែរ។ ការទុកសំលីអនាម័យរបស់ស្ត្រីយូរពេកក៏អាចបណ្តាលអោយមានក្លិនឆ្អាបនេះផងដែរ។ ជាការកម្រ, ក្លិនមិនល្អនៃទ្វារមាសអាចត្រូវបានផ្សារភ្ជាប់ទៅនឹងការធ្លាយចូលគ្នានៃរន្ធគូថ និងទ្វារមាស ដែលអនុញ្ញាតអោយលាមកហៀរចូលទៅក្នុងទ្វារមាស។
ជាទូទៅ, ក្លិននៃទ្វារមាសអាចត្រូវបានបង្កឡើងដោយៈ
– មេរោគបាក់តេរី (bacterial vaginosis)
– មេរោគក្លាមីដ្យា (chlamydia)
– មេរោគប្រមេះ
– ជំងឺរលាកក្នុងអាងត្រគាក
– កង្វះអនាម័យ
– ការទុកសំលីអនាម័យយូរពេក
– មេរោគទ្រីកូម៉ូណាស (Trichomoniasis)
– ការឆ្លងមេរោគផ្សិត
ជាការកម្រ, ក្លិនមិនល្អនៃទ្វារមាសអាចបណ្តាលមកពីៈ
– ជំងឺមហារីកកស្បូន
– ធ្លាយរន្ធគូថ និងទ្វារមាសចូលគ្នា
– ជំងឺមហារីកទ្វារមាស
នៅពេលណាដែលគួរទៅជួបនឹងគ្រូពេទ្យ
ប្រសិនបើអ្នកព្រួយបារម្ភអំពីក្លិនមិនធម្មតានៃទ្វារមាសរបស់អ្នក, សូមទៅជួបគ្រូពេទ្យ ជាពិសេសប្រសិនបើអ្នកមានរោគសញ្ញាផ្សេងៗទៀតដូចជា រមាស់, ក្រហាយ ឬហូរទឹកចេញមកនោះ។
មួយវិញទៀត, ដើម្បីបន្ថយក្លិនមិនល្អនោះ៖
– សម្អាតផ្នែកខាងក្រៅប្រដាប់ភេទៈ អំឡុងពេលលាងសម្អាតជាប្រចាំនោះ, សូមប្រើប្រាស់បរិមាណតិចនៃសាប៊ូ និងប្រើទឹកអោយបានច្រើន
– ជៀសវាងសម្អាតទ្វារមាសៈ គ្រប់ទ្វារមាសដែលមានសុខភាពល្អគឺមាននូវបាក់តេរី និងមេរោគដទៃទៀតមួយចំនួន។ ភាពអាស៊ីតធម្មតានៃទ្វារមាសទប់ទល់ការឈ្លានពាននៃបាក់តេរី និងផ្សិតដែលបង្កគ្រោះថ្នាក់។ ប៉ុន្តែការលាងសម្អាតទ្វារមាសអាចធ្វើអោយមានភាពទន់ខ្សោយដល់បាក់តេរី.
