មហារីកកូនកណ្តុរ(lymphoma) ច្រើនតែបណ្តាលមកពីកោសការមានការលូតលាស់ដោយមិនអាចគ្រប់គ្រងបាន ហើយមិនព្រមស្លាប់។ កោសិការក្នុងរាងកាយធម្មតាមានទម្លាប់លូតលាស់ បំបែកខ្លួន និងចាស់ស្លាប់។អ្នកវិទ្យាសាស្ត្រជាច្រើនមិនបានដឹងច្បាស់ថាអ្វីទៅជាមូលហេតុនៃជំងឺមហារីកកូនកណ្តុរនោះទេ ប៉ុន្តែពួកគេបានសម្គាល់ឃើញពីកត្តាប្រឈមមុខផ្សេងៗគ្នាជាច្រើនដូចជា៖
ហ្សែន
ជំងឺមហារីកកូនកណ្តុរអាចកើតឡើងដោយសារតែការត្រៀមទុករបស់ហ្សែនដែលធ្វើអោយសមាជិកគ្រួសារកើតជំងឺដូចគ្នា។ វាពិតជារឿងអាចកើតមាន ចំពោះហ្សែនដែលបំបែកខ្លួនធ្វើអោយកើតជាជំងឺមហារីកនៅពេលណាមួយនៃជីវិត។
ភ្នាក់ងារបង្កមហារីក
ភ្នាក់ងារបង្កមហារីកគឺជាសារធាតុមួយក្រុមដែលឆ្លើយតបដោយផ្ទាល់ក្នុងការបំផ្លាញ DNA សម្រាប់បង្កើតជាមហារីក។ ការប៉ះពាល់ទៅនឹងថ្នាំសម្លាប់សត្វល្អិត ថ្នាំសម្លាប់ស្មៅ និងសារធាតុរំលាយមួយចំនួនដូចជា បង់ហ្សែន សុទ្ធតែអាចអោយមានជំងឺមហារីកកូនកណ្តុរបាន។ ចំណែកឯ ថ្នាំលាបសក់អោយខ្មៅក៏មានជាប់ពាក់ព័ន្ធនឹងជំងឺមហារីក NHL ក្នុងអត្រាមួយខ្ពស់ដែរ។ នៅពេលរាងកាយរបស់យើងប្រឈមនឹងសារធាតុបង្កមហារីក វានឹងបង្កើតអោយមានរ៉ាឌីកាល់សេរី ( Free Radicals ) ដែលវាទៅផ្តាច់អេឡិចត្រុងចេញពីមូលេគុលផ្សេងៗក្នុងរាងកាយ។ សារធាតុ Free Radicals ទាំងនេះទៅបំផ្លាញកោសិកា ដែលប៉ះពាល់ទៅនឹងលទ្ធភាពនៃការបំពេញមុខងារធម្មតា ហើយក្រោយមកដុះចេញជាមហារីកតែម្តង។
កត្តាជំងឺផ្សេងៗ
បើយើងគិតទៅតាមអាយុ វានឹងមានការប្រឈមនឹងការបំបែក DNA កាន់តែខ្លាំងដែលចេញទៅជាជំងឺមហារីក។ ការប្រឈមនឹងជំងឺប្រភេទ NHL គឺនៅវ័យចំណាស់ ហើយ HL ច្រើនតែនៅចន្លោះពី ១៦ ទៅ៣៤ ឆ្នាំ និង ៥៥ឆ្នាំឡើងទៅ។ លើសពីនេះទៅទៀត បញ្ហាជំងឺដែលធ្វើអោយប្រឈមនឹងមហារីកកូនកណ្តុរកាន់តែខ្លាំងមាន ជំងឺអេដស៍ ជំងឺ Human T-Lymphocytic Virus Type 1 (HTLV-1), Epstein-Barr Virus, Helicobacter Pylori, ឬ ជំងឺរលាកថ្លើមប្រភេទ B, C ជំងឺប្រព័ន្ធភាពស៊ាំមិនប្រក្រតី ជំងឺដែលត្រូវការព្យាបាលទបស្កាត់ប្រព័ន្ធភាពស៊ាំ និងជំងឺខ្សោយប្រព័ន្ធភាពស៊ាំផ្សេងៗទៀត៕
