ភាគច្រើននៃពួកយើងប្រហែលជាមិនធ្លាប់ចាប់អារម្មណ៍ទេថា ការងូតទឹកត្រជាក់អាចផ្ដល់ផលល្អៗចំពោះសុខភាព។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) មានអ្វីខ្លះទៅ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអត្ថប្រយោជន៍ដ៏ប្រសើរនៃការងូតទឹកត្រជាក់ចំពោះសុខភាព ៖
១. វាទប់ស្កាត់បញ្ហាស្បែកដែលបណ្ដាលមកពីភាពស្ត្រេស
ការងូតទឹកត្រជាក់អាចផ្ដល់ភាពរំញោចដល់ខួរក្បាលឱ្យបញ្ចេញនូវអ័រម៉ូនរីករាយ ឬ endorphins។ នៅពេលសារធាតុគីមីនេះត្រូវបានបញ្ចេញដោយរាងកាយ នោះកម្រិតនៃភាពស្ត្រេសនឹងថយចុះ ហើយអ្នកមិនងាយជួបប្រទះបញ្ហាស្បែកដែលបណ្ដាលមកពីភាពតានតឹងក្នុងអារម្មណ៍ដូចជារោគមុន ជំងឺស្បែក psoriasis និងជំងឺរលាកស្បែក dermatitis។
២. វាជួយបង្រួមរន្ធញើស
ខណៈដែលទឹកក្ដៅអាចជម្រះជាតិប្រេងធម្មជាតិដែលការពារស្បែក ទឹកត្រជាក់នឹងជួយបង្រួមរន្ធញើសរបស់អ្នក។ វាក៏ផ្ដល់ឱ្យអ្នកនូវស្បែកមុខដែលមានពន្លឺជាងមុនផងដែរ។ នេះក៏ព្រោះតែទឹកត្រជាក់អាចនាំឱ្យសសៃឈាមរួមតូច ហើយមុខនឹងមិនសូវមើលទៅហើម ឬឡើងក្រហម។
៣. ធ្វើឱ្យចរន្តឈាមរត់កាន់តែមានលក្ខណៈប្រសើរឡើង
អ្នកគួរដឹងថាទឹកត្រជាក់អាចបង្កើនលំហូរឈាមក្នុងរាងកាយដោយបូមឈាមកាន់តែច្រើនទៅក្នុងសរីរាង្គចាំបាច់សំខាន់ៗដែលមានអត្ថប្រយោជន៍ណាស់សម្រាប់ប្រព័ន្ធសសៃឈាមបេះដូង និងអាចជួយបញ្ចុះសម្ពាធឈាម ទប់ស្កាត់ការឡើងរឹងនៃសសៃឈាម និងការលេចឡើងនូវសសៃវ៉ែន។
៤. ទឹកត្រជាក់ល្អសម្រាប់ទប់ទល់អាការៈនៃជំងឺធ្លាក់ទឹកចិត្ត
នៅពេលអ្នកងូតទឹកត្រជាក់អ្នកនឹងមានអារម្មណ៍ប្រសើរជាងមុនដោយរំញោចបញ្ជូនចេញពីសរសៃប្រសាទរបស់អ្នកទៅខួរក្បាល។
៥. ទឹកត្រជាក់ពិតជាល្អសម្រាប់សក់និងស្បែក
ទោះបីជាការងូតទឹកក្ដៅជួយឱ្យអ្នកមានអារម្មណ៍ធូរស្រាល និងស្រួលខ្លួន ប៉ុន្តែវាអាចកម្ចាត់នូវបាក់តេរីល្អៗចេញពីស្បែកបានយ៉ាងងាយប្រសិនបើអ្នកងូតទឹកក្ដៅខ្លាំង ហើយជាពិសេសចំណាយពេលងូតទឹកយូរៗ។ នេះក៏ព្រោះតែវាបំផ្លាញស្រទាប់ការពារនៃស្បែកបណ្ដាលឱ្យស្បែកងាយនឹងស្ងួតរលាក។ ការងូតទឹកក្ដៅក៏មិនល្អសម្រាប់សក់ផងដែរដោយវាអាចធ្វើឱ្យស្បែកក្បាលស្ងួត ហើយសក់ប្រាកដជាងាយនឹងជ្រុះជាមិនខាន។ សក់ក៏អាចប្រែជាស្ងួត ហើយបែកចុងដោយងាយព្រោះទឹកក្ដៅផងដែរ។ ដូច្នេះកុំងូតទឹកក្ដៅពេក! ដូច្នេះដើម្បីជាការប្រសើរចូរឧស្សាហ៍ងូតទឹកត្រជាក់ និងលាងសម្អាតសក់ ព្រមទាំងស្បែកក្បាលជាមួយទឹកត្រជាក់។
៦. បង្កើតអត្រាដុតរំលាយអាហារក្នុងរាងកាយ
ពិតណាស់ការងូតទឹកត្រជាក់អាចជួយបង្កើនអត្រានៃការដុតរំលាយអាហារក្នុងរាងកាយដែលជម្រុញសមត្ថភាពរាងកាយក្នុងការដុតបំផ្លាញកាឡូរី។
៧. ផ្ដល់ភាពធូរស្បើយដល់សាច់ដុំ
ការងូតទឹកត្រជាក់អាចផ្ដល់ភាពធូរស្បើយដល់សាច់ដុំដោយអាចបំបាត់អាការៈឈឺចាប់ក្រោយពេលអ្នកធ្វើលំហាត់ប្រាណ ឬសកម្មភាពខ្លាំងក្លាណាមួយទៀតផង៕