ក្រុមហ៊ុនផលិតឱសថឥណ្ឌាចំនួនពីរ រួមទាំងក្រុមហ៊ុនផលិតវ៉ាក់សាំងធំបំផុតលើពិភពលោក កាលពីថ្ងៃចន្ទម្សិលមិញ បានស្វែងរកការអនុម័ត សម្រាប់វ៉ាក់សាំងការពារវីរុសកូរ៉ូណានៅក្នុងប្រទេស។
នាយកប្រតិបត្តិវិទ្យាស្ថានសេរ៉ាំនៃប្រទេសឥណ្ឌានិយាយថា ការយល់ព្រមសម្រាប់ការចែកចាយវ៉ាក់សាំងរបស់ក្រុមហ៊ុន AstraZeneca /Oxford ដែលក្នុងនោះក្រុមហ៊ុនកំពុងផលិតវ៉ាក់សាំង ៥០-៦០ លានដូស ក្នុងមួយខែរួចទៅហើយនោះ “នឹងជួយសង្គ្រោះជីវិតមនុស្សរាប់មិនអស់” ។ កាលពីខែមុន លោកបាននិយាយថា ដូសនីមួយៗ នឹងត្រូវលក់ឱ្យទៅរដ្ឋាភិបាលឥណ្ឌាក្នុងតម្លៃប្រហែល ២៥០ រូពី (៣ ដុល្លារ)។
នាយកប្រតិបត្តិខាងលើបានបន្ថែមទៀតថា “ដូចដែលបានសន្យាមុនដំណាច់ឆ្នាំ ២០២០ វិទ្យាស្ថានសេរ៉ាំបានដាក់ពាក្យស្នើសុំការអនុញ្ញាតឱ្យប្រើជាបន្ទាន់សម្រាប់វ៉ាក់សាំងផលិតនៅឥណ្ឌាទីមួយឈ្មោះ PAISHIELD”។
សារព័ត៌មាន និងប្រព័ន្ធផ្សព្វផ្សាយនានាក្នុងស្រុកនៃប្រទេសឥណ្ឌា បានរាយការណ៍ថា ក្រុមហ៊ុន Bharat Biotech ក៏បានដាក់ពាក្យសុំការអនុញ្ញាតឱ្យប្រើជាបន្ទាន់សម្រាប់វ៉ាក់សាំងដែលបង្កើតដោយខ្លួនឯងផងដែរកាលពីថ្ងៃចន្ទ។
វ៉ាក់សាំងរបស់ក្រុមហ៊ុន AstraZeneca របស់ឥណ្ឌាអាចរក្សាទុកនៅសីតុណ្ហភាពនៃទូទឹកកកធម្មតា ខណៈវ៉ាក់សាំងរបស់ក្រុមហ៊ុន Pfizer របស់អាមេរិកត្រូវរក្សាទុកនៅសីតុណ្ហភាពដក ៧០ អង្សាសេ៕