ការឈឺត្រគាក គឺជាការត្អូញត្អែរទូទៅមួយ ដែលអាចបណ្តាលមកពី បញ្ហាផ្សេងៗគ្នាជាច្រើន។ ទីតាំង ជាក់លាក់នៃការឈឺចាប់នៅត្រង់ត្រគាក គឺអាចផ្តល់អោយនូវតម្រុយមួយដ៏មានតម្លៃ អំពីមូលហេតុ ប្រាកដ។
បញ្ហាដែលមានជាមួយនឹងការឈឺសន្លាក់ នៅក្នុងឆ្អឹងអាងត្រគាក គឺហាក់នឹងធ្វើអោយមានការឈឺចាប់ នៅខាងក្នុងត្រគាក ឬ ក្រលៀនរបស់អ្នក។ ការឈឺចាប់នៅត្រគាកដែលកើតមាន នៅផ្នែកខាងក្រៅ, កំភ្លៅផ្នែកខាងលើ ឬ ផ្នែកខាងក្រៅនៃកំប៉េះគូជ ជាធម្មតាគឺបណ្តាលមកពី បញ្ហាដែលជាប់ទាក់ទង ជាមួយនឹង សាច់ដុំ, សសៃចំណង, សសៃពួរសាច់ដុំ និង ជាលិកាទន់ដទៃៗទៀត ដែលនៅជុំវិញសន្លាក់ នៃឆ្អឹងត្រគាករបស់អ្នក ។
ការឈឺចាប់នៅនឹងត្រគាក ពេលខ្លះអាចបណ្តាលមកពី ជំងឺ និង ស្ថានភាពនៃផ្នែកផ្សេងៗទៀត របស់ រាងកាយរបស់អ្នក មានដូចជាចង្កេះផ្នែកខាងក្រោម ឬ ជង្គង់របស់អ្នក។ ភាគច្រើននៃការឈឺចាប់ ត្រគាក គឺអាចធ្វើការគ្រប់គ្រងបាន ជាមួយនឹងការថែរក្សាសុខភាព ដោយខ្លួនឯងនៅផ្ទះ។
តើនៅពេលណា ដែលអ្នកគួរទៅជួបនឹងគ្រូពេទ្យ?
អ្នកប្រហែលជាមិនចាំបាច់ត្រូវ ទៅជួបនឹងគ្រូពេទ្យនោះទេ ប្រសិនបើការឈឺចាប់នេះ មានកម្រិត ស្រាល។ អ្នកអាចព្យាយាមសាកល្បងនូវ គន្លឹះក្នុងការថែរក្សាសុខភាពដោយខ្លួនឯងទាំងនេះ ៖
- ប្រើថ្នាំបំបាត់ការឈឺចាប់។ ប្រភេទថ្នាំបំបាត់ការឈឺចាប់ ដែលមានដាក់លក់ ដោយមិនចាំបាច់ ត្រូវការវេជ្ជបញ្ជា មានដូចជា acetaminophen ( Tylenol ), aspirin, ibuprofen ( Advil, Motrin,) និង naproxen គឺប្រហែលជាអាចជួយបំបាត់ នូវការឈឺចាប់នៅត្រគាកនេះបាន។
- ធ្វើការសម្រាក។ ដាក់ជើងរបស់អ្នក អោយសម្រាកអោយបានច្រើន តាមដែលអាចធ្វើបាន។
- ប្រើទឹកកក។ ប្រើដុំទឹកកក ឬ កញ្ចប់នៃបន្លែដែលក្លាសេកក រុំនឹងកន្សែងរួចដាក់នៅលើត្រគាក ដើម្បីធ្វើការបំបាត់ការឈឺចាប់ដោយការប្រើវិធីត្រជាក់ស្អំ ។
- ប្រសិនបើការព្យាបាលដោយខ្លួនឯងនេះ នៅតែមិនអាចជួយអ្នកបាន នោះអ្នកត្រូវធ្វើការណាត់ជួបជាមួយ នឹងគ្រូពេទ្យ ដើម្បីធ្វើការពិនិត្យតាមដានអោយបានច្បាស់លាស់។
- ធ្វើការស្វែងរកជំនួយសង្គ្រោះបន្ទាន់ផ្នែកវេជ្ជសាស្ត្រអោយបានភ្លាមៗ ប្រសិនបើការឈឺចាប់ នៅនឹង ត្រគាក បានកើតឡើងដោយសារតែមានការរងរបួស និង កើតមានជាមួយនឹង ៖
- សន្លាក់ ដែលមើលទៅហាក់ដូចជាខុសទ្រង់ទ្រាយដើម។
- មិនអាចធ្វើចលនានូវនឹងជើង ឬ ត្រគាក។
- មិនអាចធ្វើការទ្រទម្ងន់ នៅនឹងជើងដែលមានរងផលប៉ះពាល់។
- មានការឈឺចាប់ ក្នុងកម្រិតធ្ងន់ធ្ងរ។
- មានការហើមប៉ោងកើតមានភ្លាមៗ ៕