ភ្នំពេញ:ដើម្បីងាយស្រួលក្នុងការស្វែងរកអ្នកពាក់ព័ន្ធ បានឆាប់រហ័ស និងទប់ស្កាត់ការចម្លងក្នុងសហគមន៍ ក្រសួងសុខាភិបាល បានប្រកាសនៅព្រលប់ថ្ងៃទី០៤ ខែធ្នូ ឆ្នាំ២០២០នេះថានឹងចាប់ផ្តើមបង្ហាញអត្តសញ្ញាណអ្នកវិជ្ជមានជំងឺកូវីដ-១៩ ។
សេចក្តីប្រកាសក្រសួងបានបញ្ជាក់ថាៈ ក្រសួងនឹងធ្វើការបញ្ចេញអត្តសញ្ញាណ អ្នកដែលវិជ្ជមានមេរោគកូវីដ-១ ៩តាមចំណារឯកភាពដ៏ខ្ពង់ខ្ពស់របស់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។
ក្រៅពីបញ្ចេញអត្តសញ្ញាណអ្នកដែលត្រូវរកឃើញវិជ្ជមានកូវីដ-១៩ នោះដើម្បីបង្កើនប្រសិទ្ធភាព ក្នុងការទប់ស្កាត់ការចម្លងជំងឺកូវីដ-១៩ នៅក្នុងសហគមន៍ក្រសួងសុខាភិបាល ក៏តម្រូវឱ្យគ្រប់អ្នកដំណើរដែលចូលមកប្រទេសកម្ពុជា ត្រូវធ្វើចត្តាឡីស័ករយពេល១៤ថ្ងៃពេញលេញ។ អ្នកដំណើរទាំងអស់ក៏ត្រូវមានវិញ្ញាបនបត្របញ្ជាក់សុខភាព ( Health Certificate) ចេញដោយអាជ្ញាធរសុខាភិបាលទទួល ស្គាល់ប្រទេសសាមីបញ្ជាក់ថា គ្មានកូវីដ-១៩ មានសុពលភាពរយៈពេល៧២ម៉ោង មុនពេលចេញដំណើរ។
សូមបញ្ជាក់ថាវិធានការខាងលើនេះ បានធ្វើឡើងបន្ទាប់ពីកម្ពុជាបានរកឃើញករណីឆ្លងវីរុសកូវីដ-១៩ ចូលក្នុងសហគមន៍ជាលើកដំបូងកាលពីថ្ងៃទី២៨ ខែវិច្ឆិកា ឆ្នាំ២០២០ ដែលមិនមានប្រភពចម្លងមេរោគនេះច្បាស់លាស់។ ការរីករាលដាលក្នុងសហគមន៍នេះ បានកើនឡើងកាន់តែច្រើន ដែលជំរុញឱ្យរាជរដ្ឋាភិបាលដាក់ចេញវិធានការនានាជាបន្តបន្ទាប់៕
