Join with Health.com.kh on Telegram

អាហារនិងភេសជ្ជៈមួយចំនួន គឺល្អណាស់សម្រាប់ស្ត្រីមានផ្ទៃពោះទទួលទានដើម្បីជាប្រយោជន៍ដល់ទាំងសុខភាពម្ដាយនិងកូនក្នុងផ្ទៃ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ថាតើភេសជ្ជៈអ្វីខ្លះដែលល្អសម្រាប់ស្ត្រីមានផ្ទៃពោះទទួលទាន? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីភេសជ្ជៈដែលស្ត្រីមានផ្ទៃពោះគួរទទួលទាន ៖

១. ទឹក

ទឹកជួយរាងកាយក្នុងការផលិតទឹកដោះនិងក្នុងដំណើរការនៃបញ្ចេញទឹកដោះ។ វាក៏ជួយក្នុងការរក្សាសុខភាពកោសិកាឈាមផងដែរ។ ចូរព្យាយាមទទួលទានទឹកឱ្យបានច្រើនគ្រប់គ្រាន់ដើម្បីរក្សាជាតិទឹកក្នុងរាងកាយ។

២. ទឹកដូង

ភេសជ្ជៈធម្មជាតិនេះជួយទប់ស្កាត់អាការៈខ្សោះជាតិទឹកក្នុងរាងកាយបានយ៉ាងប្រសើរ។ វាក៏ជួយបំពេញបន្ថែមនូវជាតិអំបិលខនិកធម្មជាតិរបស់រាងកាយផងដែរ។ ការទទួលទានទឹកដូងក៏ជួយរាងកាយក្នុងការផលិតទឹកដោះថែមទៀត។

៣. ទឹកផ្លែឈើស្រស់

ទឹកផ្លែឈើស្រស់ពីក្រូច ឪឡឹក និងផ្លែម្នាស់ជាដើមមានផ្ទៃជាតិសសៃនិងវីតាមីន C ដែលជួយឱ្យការសម្រាលកាន់តែស្រួល។ សារធាតុចិញ្ចឹមទាំងនោះក៏ល្អសម្រាប់ពង្រឹងប្រព័ន្ធភាពស៊ាំនៃគភ៌ផងដែរ ប៉ុន្តែត្រូវប្រាកដថាអ្នកជ្រើសរើសទឹកផ្លែឈើស្រស់និងសុទ្ធធម្មជាតិ។ ទោះជាយ៉ាងណាក្នុងកំឡុងពេល ៣ ខែដំបូងនៃការមានផ្ទៃពោះ ស្ត្រីមិនគួរទទួលទានផ្លែម្នាស់ ឬទឹកម្នាស់ស្រស់ឡើយដើម្បីចៀសវាងការរលូត។ នេះក៏ព្រោះតែផ្លែម្នាស់មានផ្ទុកសារធាតុ bromelain នាំឱ្យស្បូនទន់និងបង្កការកន្ត្រាក់។

៤. ទឹកបន្លែស្រស់

សម្រាប់អ្នកម្ដាយដែលមិនចូលចិត្តទទួលទានបន្លែ ប៉ុន្តែនៅតែចង់បានអត្ថប្រយោជន៍ពីបន្លែនោះ ចូរសាកល្បងកិនបន្លែឱ្យក្លាយជាទឹកស្រស់ៗដើម្បីទទួលទានជំនួសវិញ។

៥. ទឹកដោះគោស្រស់មានជាតិខ្លាញ់ទាប

ស្ត្រីត្រូវការ ១០០០ មីលីក្រាមនៃកាល់ស្យូមក្នុងមួយថ្ងៃកំឡុងពេលមានផ្ទៃពោះដើម្បីរក្សាសុខភាពខ្លួនឯងនិងការលូតលាស់នៃកូនក្នុងផ្ទៃ។ ហើយទឹកដោះគោមានផ្ទុកនូវសារធាតុចិញ្ចឹមចាំបាច់នេះ។ ម្យ៉ាងវិញទៀតទឹកដោះគោស្រស់ក៏ជាប្រភពដ៏ប្រសើរនៃប្រូតេអ៊ីនគុណភាពខ្ពស់ និងវីតាមីន b12 ដែលល្អសម្រាប់ចរន្តឈាម សាច់ដុំ ព្រមទាំងប្រព័ន្ធសសៃប្រសាទផងដែរ។

៦. ទឹកក្រូចឆ្មារ

រសជាតិជូរនៃក្រូចឆ្មារអាចជួយបំបាត់អាការៈចង្អោរចង់ក្អួត ឬចាញ់បានយ៉ាងប្រសើរ។ អ្នកគ្រាន់តែលាយទឹកក្រូចឆ្មារស្រស់បន្តិចជាមួយតែខ្ញីរួចទទួលទានជាការស្រេច។ អ្នកក៏អាចលាយទឹកក្រូចឆ្មារជាមួយទឹកធម្មតាបានដែរ។

៧. ទឹកលាយផ្លែឈើកក

ប្រសិនបើអ្នកចង់ឱ្យទឹកមានរសជាតិផ្លែឈើ អ្នកអាចបន្ថែមបន្ទះក្រូច ក្រូចឆ្មារ គីវី ឬផ្លែប៉េសដែលកកចូលក្នុងទឹក។

៨. តែខ្ញី

តែខ្ញីមិនថាក្ដៅ ឬត្រជាក់ គឺសុទ្ធតែជាជម្រើសនៃភេសជ្ជៈដែលល្អសម្រាប់ទទួលទានកំឡុងពេលមានផ្ទៃពោះ។ ខ្ញីមានលក្ខណៈសម្បត្តិប្រឆាំងការរលាកដែលជួយកាត់បន្ថយការរលាកផ្សេងៗដែលបង្កអាការៈចង្អោរចង់ក្អួត។ លើសពីនេះទៅទៀត ខ្ញីក៏ជាប្រភពនៃសារធាតុ gingerol ដែលមានឥទ្ធិពលយ៉ាងប្រសើរលើប្រព័ន្ធរំលាយអាហារ និងប្រព័ន្ធសសៃប្រសាទកណ្ដាលជួយសម្រាលអាការៈចង្អោរចង់ក្អួត ឈឺពោះ រាគ ព្រមទាំងជំងឺមួយចំនួនផ្សេងទៀតពាក់ព័ន្ធជាមួយការរំលាយអាហារបានយ៉ាងប្រសើរផងដែរ៕