មិនពិបាកឡើយ! ប្រឆាំងភាពចាស់តាមវ័យ ជាមួយរូបមន្តធម្មជាតិងាយៗទាំងនេះ

ស្បែកជាញឹកញយត្រូវប៉ះផ្ទាល់នឹងកម្ដៅថ្ងៃ ខ្យល់ ធូលី និងភាពកខ្វក់ផ្សេងៗ ព្រមទាំងកត្តាបរិស្ថានជុំវិញដែលអាចនាំឱ្យស្រអាប់និងស្ងួត។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) នៅពេលបញ្ហានេះកើតឡើងសញ្ញានៃភាពចាស់តាមវ័យនៃស្បែកនឹងលេចឡើងជុំវិញភ្នែក មាត់ និងសូម្បីតែថ្ងាស។ ទោះជាយ៉ាងណាកុំបារម្ភ! ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីរូបមន្តបែបធម្មជាតិពន្យឺតភាពចាស់តាមវ័យនៃស្បែក ៖

១. ប្រទាលកន្ទុយក្រពើ

អ្វីដែលអ្នកត្រូវធ្វើ គឺគ្រាន់តែលាបម៉ាស្សាជែលប្រទាលកន្ទុយក្រពើស្រស់លើស្បែកនិងរងចាំសម្រាប់រយៈពេលពី ១៥ ទៅ ២០ នាទី។ លាងសម្អាតចេញជាមួយទឹកក្ដៅឧណ្ហៗ។ អនុវត្តសារឡើងវិញរាល់ថ្ងៃរហូតទទួលបានលទ្ធផលគាប់ចិត្ត។

២. ទឹកឃ្មុំ

ជួយរក្សាសំណើមស្បែកមុខនិងកម្ចាត់ស្នាមជ្រីវជ្រួញក៏ដូចជាស្នាមខ្សែនៅពេលអនុវត្តជាប្រចាំ។ អ្វីដែលអ្នកត្រូវធ្វើ គឺគ្រាន់តែលាបម៉ាស្សាទឹកឃ្មុំឆៅក្នុងចំនួនសមល្មមលើស្បែកមុខនិងកសម្រាប់រយៈពេលពី ២ ទៅ ៣ នាទី។ រងចាំសម្រាប់រយៈពេលពី ១៥ ទៅ ២០ នាទីសិន សឹមលាងសម្អាតចេញ។

៣. យ៉ាអួរ

អ្វីដែលអ្នកត្រូវធ្វើ គឺគ្រាន់តែលាយយ៉ាអួរ ២ ស្លាបព្រាបាយជាមួយទឹកឃ្មុំ ១ ស្លាបព្រាកាហ្វេ ទឹកក្រូចឆ្មារស្រស់ ១ ស្លាបព្រាកាហ្វេ និងរមៀត ១ ស្លាបព្រាកាហ្វេ ឱ្យសព្វចូលគ្នា។ រួចច្របាច់ ឬកាត់ថ្នាំគ្រាប់វីតាមីន E ចំនួន ១គ្រាប់ចូល។ កូរល្បាយឱ្យសព្វម្ដងទៀតសឹមលាបម៉ាស្សាលើស្បែកមុខ។ រងចាំសម្រាប់រយៈពេលពី ១០ ទៅ ១៥ នាទីសិន សឹមលាងសម្អាតចេញជាមួយទឹកធម្មតា។ អនុវត្តឱ្យបានយ៉ាងហោចណាស់ ៣ ដងក្នុងមួយសប្តាហ៍។

៤. ល្ហុងទុំ

កិនល្ហុងទុំប៉ុន្មានដុំឱ្យម៉ដ្ឋ ឬក្លាយជាល្បាយម៉ដ្ឋខាប់ៗ រួចសឹមលាបម៉ាស្សាលើស្បែកមុខនិងក។ អ្នកអាចបន្ថែមទឹកធម្មតាបន្តិចចូលបើចាំបាច់។ រងចាំសម្រាប់រយៈពេល ១០ នាទីសឹមលាងសម្អាតចេញ។ អនុវត្តឱ្យបាន ២ ដងក្នុងមួយសប្តាហ៍។

៥. ចេកទុំ

កិនចេកទុំ ២ ផ្លែឱ្យម៉ដ្ឋ សឹមលាយទឹកឃ្មុំចូលបន្តិច។ កូរឱ្យសព្វ សឹមលាបលើស្បែកនិងទុកចោលសម្រាប់រយៈពេល ៣០ នាទី។ សឹមលាងសម្អាតចេញជាមួយទឹកក្ដៅឧណ្ហៗ៕