ភាគច្រើននៃពួកយើងប្រហែលជាមិនធ្លាប់ដឹងទេថាវីតាមីន b12 ក្រៅពីល្អសម្រាប់សុខភាពខួរក្បាលហើយនោះក៏ចាំបាច់សម្រាប់សុខភាពរាងកាយទាំងមូលផងដែរ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ប្រភពធម្មជាតិដ៏ប្រសើរបំផុតនៃវីតាមីន b12 រួមមានសាច់គោ សាច់ជ្រូក សាច់មាន់ សាច់ត្រី ស៊ុត ទឹកដោះគោ បន្លែបៃតង និងថ្លើមសត្វជាដើម។ ប៉ុន្តែបើខ្វះវីតាមីននេះក្នុងរាងកាយវិញតើនឹងបង្ហាញរោគសញ្ញាអ្វីខ្លះ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអាការៈដែលអាចកើតឡើងនៅពេលខ្វះវីតាមីន b12 ៖
១. អស់កម្លាំង
នេះក៏ព្រោះតែវីតាមីន b12 ជួយបំលែងអាហារទៅជាថាមពល។ ដូច្នេះហើយទើបការទទួលទានអាហារមានផ្ទុកសម្បូរទៅដោយវីតាមីន b12 គ្រប់គ្រាន់ជួយកាត់បន្ថយភាពអស់កម្លាំងដែលនឹងធ្វើឱ្យអ្នកមានថាមពលប្រសើរជាងមុន។ វីតាមីននេះក៏ជួយធ្វើឱ្យដំណើរការនៃការដុតរំលាយអាហារក្នុងរាងកាយមានលក្ខណៈកាន់តែប្រសើរឡើងដែលអាចបង្កើននិងរក្សាថាមពលផងដែរ។ ដូច្នេះអ្នកអាចនឹងមានអារម្មណ៍ខ្សោយកម្លាំងនិងឆាប់អស់កម្លាំងនៅពេលរាងកាយខ្វះវីតាមីននេះ។ មិនត្រឹមតែរាងកាយប៉ុណ្ណោះទេ ប៉ុន្តែខួរក្បាលក៏ខ្សោយថាមពលតាមនោះដែរ។
២. អារម្មណ៍ឆាប់ប្រែប្រួល
ធ្លាប់ដឹងទេថាកង្វះវីតាមីន b12 អាចបណ្ដាលឱ្យមានបញ្ហាអារម្មណ៍មិនល្អ ឬឆាប់ខឹង? នោះក៏ព្រោះតែវីតាមីន b12 មានប្រសិទ្ធិភាពគ្រប់គ្រងអារម្មណ៍ល្អប្រសើរជួយរក្សាសុខភាពផ្លូវចិត្ត។ ម្យ៉ាងវិញទៀត វីតាមីន b12 ក៏ជួយរក្សាសុខភាពកោសិកាខួរក្បាល ព្រមទាំងបង្កើនថាមពលខួរក្បាលទប់ទល់នឹងភាពអស់កម្លាំងដោយសារបញ្ហាស្ត្រេសផងដែរ។ ហេតុនេះប្រសិនបើអ្នកចង់ចៀសផុត ឬទប់ទល់ជាមួយបញ្ហាធ្លាក់ទឹកចិត្ត (depression) និងថប់បារម្ភ ចូរព្យាយាមរួមបញ្ចូលអាហារមានផ្ទុកសម្បូរទៅដោយវីតាមីន b12 ក្នុងរបបអាហារប្រចាំថ្ងៃ។
៣. មានអារម្មណ៍ស្ពឹកៗដូចម្ជុលចាក់នៅដៃនិងជើង
វីតាមីន b12 ក៏ចាំបាច់ផងដែរសម្រាប់រក្សាសុខភាពប្រព័ន្ធសសៃប្រសាទ។ ប្រសិនបើរាងកាយខ្វះវីតាមីននេះអ្នកនឹងជួបប្រទះអាការៈស្ពឹកៗ ឬឈឺឆៀបៗដូចម្ជុលចាក់នៅប្រអប់ដៃនិងជើង។
៤. ដំបៅក្នុងមាត់
ឧស្សាហ៍ជួបប្រទះបញ្ហាដំបៅក្នុងមាត់ ឬពងបែកក្នុងមាត់ណាស់មែនទេ? អ្នកចាំបាច់គួរព្យាយាមរួមបញ្ចូលអាហារសម្បូរវីតាមីន b12 ក្នុងរបបអាហារប្រចាំថ្ងៃហើយ។ នេះក៏ព្រោះតែកង្វះវីតាមីន b12 ដែលបង្កបញ្ហាដំបៅពងបែកក្នុងមាត់និងបញ្ហាសុខភាពមាត់ធ្មេញដទៃទៀតផងដែរ។ វាក៏អាចនាំឱ្យអណ្ដាតរីកធំទៀតផង។
៥. ភាពខ្លីនៃដង្ហើម
កង្វះវីតាមីន b12 អាចនាំឱ្យអ្នកដកដង្ហើមបានខ្លីជាធម្មតា សូម្បីតែក្រោយពេលធ្វើសកម្មភាពរាងកាយបន្តិចបន្តួច។ នេះក៏ព្រោះតែរាងកាយមិនអាចទទួលបានកោសិកាគ្រាប់ឈាមក្រហមដែលដឹកជញ្ជូនអុកស៊ីសែនគ្រប់គ្រាន់។ អ្នកជំនាញជាច្រើននិយាយថាវីតាមីន b12 គឺជាសារធាតុចិញ្ចឹមដែលសំខាន់ណាស់សម្រាប់ការផលិតកោសិកាគ្រាប់ឈាមក្រហម។
៦. ភាពស្លេកស្លាំង
នេះក៏ព្រោះតែកង្វះវីតាមីន b12 អាចបណ្ដាលឱ្យរាងកាយខ្វះកោសិកាគ្រាប់ឈាមក្រហម។ ជាលទ្ធផលស្បែកនឹងប្រែជាស្លេកស្លាំងខុសធម្មតា ហើយច្រើនតែមានអារម្មណ៍ត្រជាក់នៅពេលប៉ះ។ ជួនកាលស្បែកអាចនឹងមើលទៅមានពណ៌លឿងផងដែរ អ្នកជំនាញនិយាយថាកង្វះវីតាមីន B12 អាចបណ្តាលឱ្យការផលិតកោសិកាគ្រាប់ឈាមក្រហមខុសប្រក្រតីងាយនឹងខូច ហើយបង្កើតសារធាតុ bilirubin លើសក្នុងរាងកាយ៕