ជំងឺភ្នែកស្ងួត គឺអាចកើតមានចំពោះមនុស្សគ្រប់វ័យ។ ជំងឺនេះកើតឡើងនៅពេលក្រពេញទឹកភ្នែកមិនបានធ្វើការផលិតទឹកភ្នែកគ្រប់គ្រាន់ ដើម្បីចិញ្ចឹមកញ្ចក់ភ្នែក។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ស្ថានភាពនេះអាចនាំឲ្យមានការឈឺចាប់ មិនស្រួលក្នុងភ្នែក ភ្នែកឡើងក្រហម ហើម រលាកក្រហាយ និងស្ងួត។ ប៉ុន្តែកុំបារម្ភ អ្នកអាចដោះស្រាយបញ្ហាភ្នែកស្ងួតបានដោយខ្លួនឯងជាមួយនឹងវិធីសាស្ត្របែបធម្មជាតិងាយៗមួយចំនួនខាងក្រោមនេះ ៖

១. បន្ថែមអាស៊ីតខ្លាញ់ក្នុងរបបអាហារប្រចាំថ្ងៃ

ការបន្ថែមអាស៊ីតខ្លាញ់អូមេហ្គា ៣ និងអូមេហ្គា ៦ ទៅក្នុងរបបអាហារ គឺអាចជួយសម្រាល ក៏ដូចជាព្យាបាលអាការៈនៃជំងឺភ្នែកស្ងួតបានប្រកបដោយប្រសិទ្ធិភាពខ្ពស់។ អាស៊ីតខ្លាញ់ល្អទាំង ២ នេះ មាននៅក្នុងអាហារដូចជា ត្រីសាលម៉ុន ត្រីសាឌីន គ្រាប់ធញ្ញជាតិ គ្រាប់ពូជ និងមានជាលក្ខណៈថ្នាំគ្រាប់ផងដែរ។

២. កុំរំលងត្រសក់

អ្វីដែលអ្នកត្រូវធ្វើ គឺគ្រាន់តែហាន់ត្រសក់ជាបន្ទះ ឬចំណិតៗ ហើយដាក់បិតលើភ្នែកជាការស្រេច។ អនុវត្តអោយបានយ៉ាងហោចណាស់ពី ២ ទៅ ៣ ដងក្នុងមួយថ្ងៃ។

៣. ព្រិចភ្នែកឲ្យបានញឹកញាប់

ការសម្លឹងមើលកញ្ចក់កុំព្យូទ័រ, ទូរស័ព្ទ ឬទូរទស្សន៍ ជាញឹកញយកាត់បន្ថយចំនួននៃការព្រិចភ្នែករបស់អ្នក។ ដូច្នេះព្យាយាមឧស្សាហ៍ព្រិចភ្នែក នៅពេលអ្នកសម្លឹងមើលអេក្រង់ទាំងនោះ ដើម្បីជៀសវាងបញ្ហាស្ងួតភ្នែក។ ហើយកុំភ្លេចបន្ថយពន្លឺគ្រឿងអេឡិចត្រូនិកប្រភេទនេះត្រឹមកម្រិតស្រាលមួយផង និងកុំប្រឹងបើកភ្នែកខំសម្លឹងពេក វិធីនេះជួយកាត់បន្ថយការហៀរទឹកភ្នែក។

៤. រក្សាសំណើមក្នុងរាងកាយ

គ្រប់ផ្នែកទាំងអស់នៃរាងកាយ រួមទាំងភ្នែក គឺត្រូវការទឹក ដើម្បីរក្សាបាននូវសុខភាពល្អប្រសើរ។ ការទទួលទានទឹកបានគ្រប់គ្រាន់នឹងជួយរក្សាបាននូវជាតិសំណើមដល់គ្រប់ផ្នែកនៃរាងកាយ។ ចូរទទួលទានទឹកឲ្យបានយ៉ាងហោចណាស់ពី ៨ ទៅ ១០ កែវ ក្នុងមួយថ្ងៃ។ ប្រសិនបើអ្នកមិនចូលចិត្តទឹកធម្មតាទេនោះ អ្នកអាចទទួលទានភេសជ្ជៈដទៃទៀតដែលគ្មានជាតិកាហ្វេអ៊ីន ឬជាតិអាល់កុល។ ព្យាយាមទទួលទានអាហារមួយចំនួនដែលមានផ្ទុកទៅដោយជាតិទឹកដូចជា ឪឡឹក និងត្រសក់ ជាដើម។ វិធីមួយដើម្បីដឹងថាតើអ្នកខ្សោះជាតិទឹកក្នុងរាងកាយឬយ៉ាងណា ចូរពិនិត្យមើលទឹកនោមរបស់អ្នក។ ប្រសិនបើវាមានពណ៌លឿងស្រាល ឬគ្មានពណ៌ អ្នកទំនងជាទទួលបានជាតិទឹកគ្រប់គ្រាន់ហើយ។

៥. ស្អំកម្ដៅ

ជាដំបូងចូរប្រើប្រាស់ក្រណាត់ស្អាតទន់មួយ ជ្រលក់ចូលទឹកក្ដៅឧណ្ហៗ ពូតទឹកចេញ ហើយដាក់ស្អំលើភ្នែករបស់អ្នកសម្រាប់រយៈពេល ១ នាទី។ អ្នកគួរអនុវត្តរូបមន្តនេះឱ្យបានពី ៣ ទៅ ៤ ដងក្នុងមួយថ្ងៃជាប្រចាំ ដើម្បីកាត់បន្ថយការរលាក បើទោះបីជាភ្នែករបស់អ្នកមានសភាពគ្រាន់បើហើយក៏ដោយ។

៦.​ ប្រេងអូលីវ

អ្វីដែលអ្នកត្រូវធ្វើ គឺគ្រាន់តែបន្តក់ប្រេងអូលីវប៉ុន្មានដំណក់លើចុងម្រាមដៃ រួចឈ្លីម៉ាស្សាថ្នមៗលើត្របកភ្នែក និងអនុញ្ញាតអោយជាតិប្រេងជ្រាបចូលក្នុងស្បែកភ្នែកជាការស្រេច៕