Join with Health.com.kh on Telegram

ទឹកក្រូចឆ្មារ ជាភេសជ្ជៈដ៏ពេញនិយមបំផុតមួយជួយក្នុងបន្សាបជាតិពុល ឬសម្រកទម្ងន់ហើយ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ប៉ុន្តែអ្នកត្រូវដឹងថាអ្វីដែលលើសពេក គឺមិនល្អឡើយ! ដូច្នេះហើយទោះបីជាទឹកក្រូចឆ្មារអាចផ្ដល់អត្ថប្រយោជន៍ជាច្រើនចំពោះសុខភាពក៏ដោយ ប្រសិនបើអ្នកទទួលទានវាច្រើនពេក នោះអ្នកនឹងជួបប្រទះបញ្ហាមួយចំនួនជាក់ជាមិនខាន។  ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីផលប៉ះពាល់ធំៗការទទួលទានទឹកក្រូចឆ្មារច្រើនពេក​ ៖

១. អាការៈច្រាលទឹកអាស៊ីតក្រពះ ឬក្រហាយទ្រូង

ទឹកក្រូចឆ្មារអាចបង្កអាការៈច្រាលទឹកអាស៊ីតក្រពះ ឬធ្វើឱ្យស្ថានភាពនៃអាការៈកាន់តែអាក្រក់ឡើងសម្រាប់អ្នកដែលកំពុងជួយប្រទះបញ្ហានេះស្រាប់ (ពិសេសកំឡុងពេលមុនចូលគេង)។ នេះក៏ព្រោះតែភេសជ្ជៈនេះនៅតែមានផ្ទុកជាតិអាស៊ីតទោះបីមិនខ្ពស់ ដូច្នេះហើយទើបវាអាចបណ្ដាលឱ្យកើតមានបញ្ហាច្រាលទឹកអាស៊ីតក្រពះ ឬក្រហាយទ្រូងប្រសិនបើទទួលទានច្រើន។

២. ពងបែកក្នុងមាត់កាន់តែធ្ងន់ធ្ងរឡើង

នេះក៏ព្រោះតែទឹកក្រូចឆ្មារមានផ្ទុកជាតិអាស៊ីតដែលអាចបណ្ដាលឱ្យអាការៈពងបែក ឬដំបៅក្នុងមាត់កាន់តែអាក្រក់ឡើង និងយូរជាសះស្បើយ។

៣. ផលប៉ះពាល់លើកាចាធ្មេញ

ការទទួលទានអាហារ និងភេសជ្ជៈមានជាតិអាស៊ីតច្រើនពេកអាចជះឥទ្ធិពលគួរឱ្យព្រួយបារម្ភចំពោះសុខភាពធ្មេញ។ ការទទួលទានទឹកក្រូចឆ្មារច្រើនយូរទៅនឹងធ្វើ​ឱ្យកាចាធ្មេញសឹកដែលជាលទ្ធផលអាការៈស្រៀវធ្មេញនឹងលេចឡើង និងការកើនឡើងនូវហានិភ័យនៃជំងឺពុកធ្មេញថែមទៀតផង។ ទោះជាយ៉ាងណាអ្នកអាចកាត់បន្ថយផលប៉ះពាល់ដោយព្យាយាមប្រើប្រាស់ទុយោរបឺត ប្រសិនបើចង់ទទួលទានភេសជ្ជៈនេះ។ ហើយប្រញាប់ទៅជួបពិនិត្យជាមួយពេទ្យធ្មេញភ្លាម ប្រសិនបើអ្នកកំពុងមានបញ្ហាមាត់ធ្មេញស្រាប់។

៤. ខ្សោះជាតិទឹកក្នុងរាងកាយ

ក្រូចឆ្មារមានផ្ទុកសម្បូរទៅដោយវីតាមីន C ដែលជាថ្នាំបញ្ចុះទឹកនោមធម្មជាតិ។ នេះមានន័យថាវាបង្កើនការផលិតទឹកនោមដែលធ្វើឱ្យអ្នកនោមញឹកជាងធម្មតា។ ទោះជាវាមានប្រយោជន៍ ប៉ុន្តែអ្នកគួរតែកាត់បន្ថយការទទួលទានទឹកក្រូចឆ្មារភ្លាម នៅពេលអ្នកមានអារម្មណ៍ថាខ្សោះជាតិទឹកក្រោយទទួលទានវា។ ហើយអ្នកក៏គួរជួបពិគ្រោះជាមួយគ្រូពេទ្យជំនាញ ប្រសិនបើកើតមានបញ្ហាខុសប្រក្រតីណាមួយកើតឡើង ក្រោយទទួលទានទឹកក្រូចឆ្មារ៕