គ្មាននរណាចង់មានស្នាមសំលាកលើរាងកាយឡើយ ពិសេសនោះគឺផ្ទៃមុខ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ភាគច្រើនស្នាមលើផ្ទៃមុខលេចឡើងក្រោយពេលកើតរោគមុន ឬរបួសណាមួយដែលយើងមិនបានយកចិត្តទុកដាក់ភ្លាមៗ។ ទោះជាយ៉ាងណាកុំបារម្ភ! ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីគន្លឹះងាយៗបែបធម្មជាតិ ប៉ុន្តែមានប្រសិទ្ធិភាពខ្ពស់ជួយកម្ចាត់ស្នាមមុន ឬស្នាមសំលាកផ្សេងៗបានយ៉ាងឆាប់រហ័ស ៖
១. ទឹកខ្មេះផ្លែប៉ោម
លាងសម្អាតមុខជាមួយផលិតផលលាងសម្អាតមុខកម្រិតស្រាលឱ្យស្អាតជាមុនសិន រួចជូតផ្ដិតៗថ្នមៗឱ្យស្ងួត។ លាយទឹកខ្មេះផ្លែប៉ោម ១ ភាគជាមួយទឹកធម្មតាពី ២ ទៅ ៣ ភាគ (អ្នកអាចលាយទឹកច្រើនជាងនេះប្រសិនបើស្បែកស្ដើង ឬឆាប់ប្រតិកម្ម)។ កូរឱ្យសព្វ សឹមលាបផ្ដិតល្បាយថ្នមៗលើស្នាមសំលាកដោយប្រើប្រាស់បន្ទះ ឬដុំសំឡី។ រងចាំបាច់សម្រាប់រយៈពេលពី ៥ ទៅ ៣០ វិនាទី។ លាងសម្អាតចេញជាមួយទឹកធម្មតា។ អ្នកអាចអនុវត្តរូបមន្តនេះបានដល់ទៅ ២ ដងក្នុងមួយថ្ងៃ។
២. ប្រទាលកន្ទុយក្រពើ
អ្វីដែលអ្នកត្រូវធ្វើ គឺជាដំបូងត្រូវលាងមុខឱ្យស្អាតជាមុនសិន សឹមលាបសាច់ប្រទាលកន្ទុយក្រពើលើកន្លែងដែលទទួលរងផលប៉ះពាល់។ ទុកចោលរហូតដល់ស្បែកស្រូបយកជាតិជែលពីប្រទាលកន្ទុយក្រពើ។ ចុងក្រោយលាងសម្អាតចេញជាមួយទឹកធម្មតាជាការស្រេច។
៣. ប្រេងដូង
អ្វីដែលអ្នកត្រូវធ្វើ គឺលាបប្រេងម៉ាស្សាប្រេងដូងបន្តិចលើតំបន់ស្បែកដែលមានបញ្ហា។ ទុកចោលសម្រាប់រយៈពេល ៥នាទី សឹមលាងសម្អាតចេញ។
៤. រមៀត
លាយម្សៅរមៀតកន្លះស្លាបព្រាបាយជាមួយជែលប្រទាលកន្ទុយក្រពើ ២ ស្លាបព្រាកាហ្វេ។ កូរឱ្យសព្វរហូតក្លាយជាល្បាយខាប់ៗ។ លាបល្បាយលើស្បែកដែលទទួលរងផលប៉ះពាល់ និងទុកចោលសម្រាប់រយៈពេល ៣០ នាទីសឹមលាង
សម្អាតចេញ។ អនុត្តឱ្យបានពី ២ ទៅ ៣ ដងក្នុងមួយសប្តាហ៍ដើម្បីទទួលបានលទ្ធផលកាន់តែប្រសើរ។
៥. ទឹកក្រូចឆ្មារស្រស់
អ្វីដែលអ្នកត្រូវធ្វើ គឺគ្រាន់តែលាបទឹកក្រូចឆ្មារស្រស់លើស្នាមមុនក្រោយលាងសម្អាតមុខរួច។ ទុកចោលរយៈពេលប្រហែល ១០ នាទីសឹមលាងសម្អាតទឹកក្រូចឆ្មារចេញពីមុខជាមួយទឹកក្ដៅឧណ្ហៗ។ អនុវត្តឱ្យបានពី ៣ ទៅ ៤ ដងក្នុងមួយថ្ងៃ។ ទោះជាយ៉ាងណាត្រូវប្រាកដថាស្បែកមុខមិនត្រូវកម្ដៅថ្ងៃពេលលាបទឹកក្រូចឆ្មារ៕