ថូចិនមួយរកឃើញក្នុងប្រអប់ស្បែកជើងពុកផុយក្នុងដីឥដ្ឋក្នុងប្រទេសបារាំង គ្រោងនឹងក្លាយជាតារារះនៃការលក់ដេញថ្លៃរបស់ក្រុមហ៊ុន Sotheby’s នៅខែក្រោយនេះ។
អ្នកជំនាញបានកំណត់អត្តសញ្ញាណថូរកឃើញនេះថាជាថូប៉សឺឡែនដ៏ល្អឥតខ្ចោះ ផលិតឡើងសម្រាប់ព្រះចៅអធិរាជ ឈានឡុង នៃរជ្ជកាលឈីងសតវត្សរ៍ទី១៨ ហើយតម្លៃណែនាំសម្រាប់ការដេញថ្លៃរបស់ថូបុរាណនេះនៅថ្ងៃទី ១២ មិថុនា គឺចាប់ផ្តើមនៅតម្លៃ ៥០ ម៉ឺនអឺរ៉ូ (ជាង ៥៨ ម៉ឺនដុល្លារអាមេរិក)។
ថូនេះត្រូវបានរកឃើញដោយចៃដន្យក្នុងចំណោមវត្ថុបុរាណដទៃទៀតរបស់ជនជាតិចិនបុរាណ។
ម្ចាស់ថូ ដែលបានទាក់ទងមកក្រុមហ៊ុនដេញថ្លៃ Sotheby’s កាលពីបីខែមុន បាននិយាយថា “យើងមិនចូលចិត្តថូនោះទេ ហើយជីដូនជីតារបស់ខ្ញុំក៏មិនចូលចិត្តវាដូចគ្នាដែរ”។
ក្រុមហ៊ុន Sotheby’s និយាយនៅលើវេបសាយរបស់ខ្លួនថា “ប៉សឺឡែនដែលមានម៉ូតល្អប្រណីតបែបនេះគឺ កម្រមានណាស់នៅក្នុងចំណោមវត្ថុធ្វើពីប៉សឺឡែននារជ្ជកាលឈីង ហើយវាត្រូវបានតុបតែងជាមួយនឹងទេសភាពដ៏ពិសេស ជាមួយ សត្វក្តាន់និងសត្វក្រៀល”។
គេក៏និយាយដែរថា ថូនេះស្ថិតក្នុងស្ថានភាពល្អឥតខ្ចោះ៕
ប្រភព៖ rasmeinews.com