មានមូលហេតុច្រើនណាស់ដែលបណ្ដាលឱ្យស្បែកប្រែជាស្រអាប់ខ្មៅមិនស្អាត ដូចជាការត្រូវពន្លឺព្រះអាទិត្យយូរៗជាប្រចាំ, ធូលីដី និងខ្យល់ពុល។ ញើស, ជាតិប្រេង និងផលិតផលតុបតែងមុខមួយចំនួនដែលជ្រាបចូលក្នុងរន្ធញើសនៃស្បែកផ្ទៃមុខអាចបង្កការរលាក, ភាពស្រអាប់ និងស្ងួតគួរឱ្យព្រួយបារម្ភ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) នៅពេលបច្ចុប្បន្ន ផលិតផលធ្វើឱ្យស្បែកសឆាប់រហ័សមានច្រើនមិនខ្វះឡើយ គ្រាន់តែមួយចំនួនធំមានផ្ទុកសារធាតុគីមី ហើយខ្លះទៀតមានតម្លៃថ្លៃ។ ប៉ុន្តែកុំបារម្ភ! ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីរូបមន្តបែបធម្មជាតិងាយៗ ប៉ុន្តែមានប្រសិទ្ធិភាពខ្ពស់ជួយធ្វើឱ្យស្បែកមុខរបស់អ្នកប្រែជាសស្អាតគ្មានផលប៉ះពាល់ ៖

១. យ៉ាអួរ

អ្វីដែលអ្នកត្រូវធ្វើ គឺគ្រាន់តែលាយយ៉ាអួរស្រស់ ១ ស្លាបព្រាបាយជាមួយទឹកឃ្មុំកន្លះស្លាបព្រាបាយ។ កូរឱ្យសព្វ សឹមលាបម៉ាស្សាល្បាយលើស្បែក។ រងចាំបាច់សម្រាប់រយៈពេលពី ២ ទៅ ៣ នាទីសិន សឹមលាងសម្អាតចេញជាមួយទឹកក្ដៅឧណ្ហៗ។ អ្នកអាចលាបម៉ាស្សាល្បាយលើស្បែកមុខនិងក ហើយរងចាំសម្រាប់រយៈពេលពី ១០ ទៅ ១៥ នាទី។​ លាងសម្អាតចេញជាមួយទឹកធម្មតា។

២. ក្រូច

ក្រៅពីទទួលទានទឹកក្រូចស្រស់ជាប្រចាំហើយនោះ អ្នកលាយទឹកក្រូចស្រស់ ២ ស្លាបព្រាបាយជាមួយម្សៅរមៀត ១ចិប។ កូរឱ្យសព្វ សឹមលាបម៉ាស្សាល្បាយលើស្បែក។ រងចាំសម្រាប់រយៈពេលពី ២០ ទៅ ៣០​នាទី សឹមលាងសម្អាតចេញ។

៣. ប៉េងប៉ោះនិងស្ករស

ដំបូងអ្វីដែលអ្នកត្រូវធ្វើ គឺបកសំបកប៉េងប៉ោះចេញសិន។ បន្ទាប់មកកិនវាឱ្យម៉ដ្ឋខាប់ៗ រួចលាយជាមួយស្ករសចំនួនសមល្មម។ កូរឱ្យសព្វ សឹមលាបម៉ាស្សាល្បាយលើស្បែកមុខថ្នមៗក្នុងចលនាបែបរង្វង់សម្រាប់រយៈពេលពី ២ ទៅ ៣ នាទី។ ទុកចោលសម្រាប់រយៈពេលពី ១៥ ទៅ ២០ នាទី សឹមលាងសម្អាតចេញជាមួយទឹកធម្មតា។ អនុវត្តជាប្រចាំរហូតទទួលបានលទ្ធផលគាប់ចិត្ត។

៤. ចេក

អ្វីដែលអ្នកត្រូវការ គឺចេកទុំ ទឹកឃ្មុំ និងទឹកដោះគោស្រស់។ អ្វីដែលអ្នកត្រូវធ្វើ គឺកិនលាយគ្រឿងផ្សំទាងអស់ចូលគ្នាឱ្យសព្វ សឹមលាបលើស្បែកមុខដែលបានលាងសម្អាតស្អាតហើយ។ ទុកចោលសម្រាប់រយៈពេល ៣០ នាទី សឹមលាងសម្អាតចេញជាមួយទឹកក្ដៅឧណ្ហៗជាការស្រេច។

៥. ផ្លែល្ហុង

ផ្លែល្ហុង មានផ្ទុកអង់ស៊ីម papain ដែលមិនត្រឹមតែជួយធ្វើឱ្យស្បែកសស្រស់ថ្លា, ទន់ភ្លឺរលោង និងមានសំណើមប៉ុណ្ណោះទេ ប៉ុន្តែក៏ជួយទប់ស្កាត់ដោះស្រាយបញ្ហានៃរោគមុនផងដែរ។ អ្វីដែលអ្នកត្រូវធ្វើ គឺដំបូងត្រូវលាងសម្អាតមុខឱ្យស្អាតជាមុនសិន។ បន្ទាប់មកសឹមយកសាច់នៃផ្លែល្ហុងមកកិនឱ្យម៉ដ្ឋខាប់ៗ រួមលាបវាលើស្បែក ហើយទុកចោលសម្រាប់រយៈពេល ២០ នាទី សឹមលាងសម្អាតចេញជាមួយទឹកធម្មតា។ អ្នកគួរអនុវត្តន៍រូបមន្តនេះរៀងរាល់ថ្ងៃ រហូតដល់ទទួលបានលទ្ធផលគាប់ចិត្ត។

៦. ទឹកក្រូចឆ្មារ

អ្វីដែលអ្នកត្រូវធ្វើ គឺលាយទឹកក្រូចឆ្មារស្រស់មួយចំនួនជាមួយទឹកធម្មតា។ កូរឱ្យសព្វ សឹមយកដុំសំឡីជ្រលក់ចូលទឹកល្បាយនេះ ហើយលាបថ្នមៗលើផ្ទៃមុខរបស់អ្នក។ ទុកចោលសម្រាប់រយៈពេលពី ១០ ទៅ ១៥ នាទី សឹមលាងសម្អាតចេញជាមួយទឹកក្ដៅឧណ្ហៗ។

៧. រមៀត

រមៀត សឹងតែត្រូវបានគេប្រើជាទូទៅនៅក្នុងផលិតផលថែរក្សាសម្រស់ និងធ្វើឱ្យស្បែកប្រែជាសស្រស់ស្អាត នោះក៏ព្រោះតែបរិមាណនៃវីតាមីន C ដែលវាមានផ្ទុក។ អ្វីដែលអ្នកត្រូវធ្វើ គឺលាយម្ស៉ៅរមៀត ១ ស្លាបព្រាកាហ្វេ ជាមួយទឹកឃ្មុំ ១ ស្លាបព្រាកាហ្វេ និងទឹកក្រូចឆ្មារ ១ ស្លាបព្រាកាហ្វេ ចូរគ្នាឱ្យសព្វ។ បន្ទាប់មកលាបល្បាយលើផ្ទៃមុខ និងករបស់អ្នក រួចទុកចោលសម្រាប់រយៈពេល ៣០ នាទី សឹមលាងសម្អាតចេញជាមួយទឹកធម្មតា។ រូបមន្តនេះអាចប្រើប្រាស់សម្រាប់គ្រប់ប្រភេទនៃស្បែកមុខ និងសូម្បីតែស្បែកខ្លាញ់ក៏ដោយ។

៨. ប្រទាលកន្ទុយក្រពើ

អ្វីដែលអ្នកត្រូវធ្វើ គឺយកជែលប្រទាលកន្ទុយក្រពើស្រស់មកលាបលើស្បែកមុខដែលទទួលរងផលប៉ះពាល់ ហើយម៉ាស្សាសម្រាប់រយៈពេលពី ១០ ទៅ ១៥ នាទីសិន សឹមលាងមុខចេញជាមួយទឹកធម្មតា។ អ្នកអាចលាយទឹកក្រូចឆ្មារជាមួយម្ស៉ៅរមៀត និងជែលប្រទាលកន្ទុយក្រពើលាបលើផ្ទៃមុខក៏បាន។ អនុវត្តម្ដងក្នុងមួយថ្ងៃ សម្រាប់រយៈពេលពី ២ ទៅ ៣ សប្តាហ៍៕