ទម្លាប់នៃការរស់នៅរបស់យើង ជាពិសេសរបបអាហារ គឺជាកត្តាប្រឈមមុខដ៏សំខាន់មួយ របស់ជំងឺពុកឆ្អឹង។ មនុស្សភាគច្រើន ងាយនឹងមិនសូវញ៉ាំអាហារ ផ្តល់សុខភាពឡើយ ក្នុងពេលដែលពួកគេ ស្ថិតក្នុងវ័យលូតលាស់ ដែលជាហេតុនាំឲ្យខ្វះ ជាតិកាល់ស្យូមក្នុងខ្លួន និងធ្វើឲ្យឆ្អឹងទៅជាខ្សោយ នៅពេលឈានដល់អាយុខ្ទង់ ៤០ ឆ្នាំ។
ថ្វីបើរបបអាហារ ដើម្បីឆ្អឹងមានសុខភាពល្អ ប្រហែលជាមិនអាចជួយ សាងសង់ឆ្អឹងឡើងវិញបាន នៅពេលអ្នកមានជំងឺពុកឆ្អឹង ដោយសារតែអាយុច្រើនក៏ដោយ តែវាប្រហែលជាជួយបន្ថយ ភាពខូចខាតរបស់ឆ្អឹងបាន។ ខាងក្រោមនេះ គឺជារបបអាហារមួយចំនួនតូច ដែលអាចចាត់ទុកថា ជួយពង្រឹងដល់សុខភាពឆ្អឹង និងបង្ការជំងឺពុកឆ្អឹងបាន ៖
បង្កើនរបបអាហារសំបូរជាតិម៉ាញ៉េស្យូម និងប៉ូតាស្យូម
តើអ្នកមានដឹងទេថា ជាតិរ៉ែដូចជា ប្រភេទម៉ាញ៉េស្យូម និងប៉ូតាស្យូម អាចជួយបង្កើនការរក្សាទុក ជាតិកាល់ស្យូមក្នុងឆ្អឹងដែរទេ0x017d7 ប៉ូតាស្យូម ត្រូវបានគេស្គាល់ថា ជួយធ្វើឲ្យឆ្អឹងរឹងមាំ ប៉ុន្តែជាក៏ជួយដល់ ការសម្របសម្រួលសរសៃប្រសាទ និងសាច់ដុំ និងបញ្ចេញចោលនូវកោសិកាងាប់ៗដែរ។ ម៉ាញ៉េស្យូម ជាតម្រូវការយ៉ាងខ្លាំង ក្នុងការបង្កើតឆ្អឹង និងដើរតួនាទីសំខាន់ ក្នុងការថែរក្សាឆ្អឹង តាមរយៈការសម្របសម្រួល ពីអ័រម៉ូនប៉ារ៉ាទីរ៉ូអ៊ីត។ ដើម្បីទទួលបានជាតិម៉ាញ៉េស្យូមច្រើន ចូរព្យាយាមញ៉ាំស្ពៃស្ពីណាច បន្លែពណ៌បៃតង ប៉េងប៉ោះ ដំឡូងបារាំង ដំឡូងជ្វា និងគ្រាប់ផ្លែអាល់ម៉ុន។ ចំពោះប៉ូតាស្យូមវិញ អ្នកអាចញ៉ាំដំឡូងជ្វា ដំឡូងស យ៉ាអួរ និងផ្លែចេក។
កាត់បន្ថយការញ៉ាំជាតិកាហ្វេអ៊ីន និងគ្រឿងស្រវឹង
មិនមានមនុស្សច្រើនទេដែលដឹងថា ជាតិកាហ្វេអ៊ីនធ្វើឲ្យនោមច្រើនទេ ដូច្នេះ វាក៏បង្កើនការបញ្ចេញ ជាតិកាល់ស្យូមពីក្នុងឈាម ទៅតាមទឹកនោមច្រើនដែរ។ ដូច្នេះ អ្នកងាយនឹងខ្វះជាតិកាល់ស្យូមក្នុងខ្លួន ហើយពុកឆ្អឹងទៀត។ ដូច្នេះ ចូរកាត់បន្ថយការញ៉ាំភេសជ្ជៈបែបនេះ ដូចជា កាហ្វេ តេ និងភេសជ្ជៈមានជាតិហ្គាស។ ម្យ៉ាងវិញទៀត ការញ៉ាំគ្រឿងស្រវឹងច្រើនពេក អាចរំខានដល់សមត្ថភាព បឺតស្រូបជាតិកាល់ស្យូមក្នុងខ្លួន។ យ៉ាងណាមិញ ការញ៉ាំកាហ្វេច្រើនជាងពីរពែងក្នុងមួយថ្ងៃ អាចបង្កើនការបាត់បង់កំហាប់ឆ្អឹងបាន ព្រោះវាមានឥទ្ធិពលអវិជ្ជមានជាមួយនឹងវីតាមីន D។
បង្កើនការញ៉ាំជាតិកាល់ស្យូម និងវីតាមីន D
កាល់ស្យូមជួយសាងសង់ និងរក្សាសុខភាពឆ្អឹង ហើយវីតាមីន D ជួយដល់ការបឺតស្រូប ជាតិកាល់មចូលក្នុងឈាម។ ដូច្នេះហើយ ការបង្កើនការញ៉ាំផលិតផលដូចជា ទឹកដោះគោមានជាតិខ្លាញ់ទាប យ៉ាអួរ បន្លែពណ៌បៃតង និងប្រូខូលីរាល់ថ្ងៃ នឹងអាចមានជីវជាតិដូចខាងលើហើយ។ បើសិនជាអ្នកញ៉ាំបន្លែមិនបាន អ្នកអាចជ្រើសរើសការញ៉ាំត្រីសាឌីន និងសាល់ម៉ុន ព្រោះវាអាចជួយបង្កើន ជាតិកាល់ស្យូមក្នុងឈាមបានដែរ។ ចំពោះស្ត្រីអាយុចាប់ពី ៥០ ឆ្នាំឡើងទៅគួរតែញ៉ាំកាល់ស្យូមប្រហែល ១ ៥០០ មីលីក្រាមជារៀងរាល់ថ្ងៃ ដែលស្មើនឹងទឹកដោះគោប្រហែល ៤ កែវក្នុងមួយថ្ងៃ។ ចំពោះវីតាមីន D វិញ អ្នកអាចទទួលវាបានយ៉ាងងាយ តាមរយៈការហាលថ្ងៃ។
សរុបសេចក្តីមក កាលណាអ្នកមាន វិធានការបង្ការជំងឺនេះ បានកាន់តែលឿន ឆ្អឹងអ្នកក៏មានឱកាសរឹងមាំ កាន់តែល្អដែរ។ ដូច្នេះ មិនត្រូវមើលងាយរបបអាហារ និងការហាត់ប្រាណណា ដែលជួយបង្កើនកំហាប់ឆ្អឹងក្នុងខ្លួនឡើយ៕