ដោយយោងទៅតាមការសិក្សាស្រាវជ្រាវថ្មីមួយបានឲ្យដឹងថា គ្រូពេទ្យចាស់ៗទំនងជាមាននិន្នាការសម្លាប់អ្នកជំងឺរបស់ខ្លួនដោយសារតែជំនាញវេជ្ជសាស្ត្ររបស់ពួកគាត់មានការថយចុះ ឬមិនមានបច្ចុប្បន្នភាព។
លទ្ធផលនៃការស្រាវជ្រាវនេះគឺធ្វើឡើងក្រោយពី ធ្វើការសង្កេតលើអ្នកជំងឺប្រមាណ ០,៧៥លាននាក់ ហើយគេរកឃើញថា អ្នកជំងឺទាំងអស់នោះដែលព្យាបាលជំងឺក្នុងមន្ទីរពេទ្យដោយគ្រូពេទ្យអាយុចាប់ពី ៦០ឆ្នាំឡើងទៅ ត្រូវបានគេរកឃើញថា មានឱកាសស្លាប់ក្នុងរយៈពេលមួយខែ ខ្ពស់ជាងគ្រូពេទ្យដែលវ័យក្មេងអាយុតិចជាង ៤០ឆ្នាំ។
ធម្មតាទាំងប្រទេសយើង និងប្រទេសនានាជុំវិញពិភពលោកតែងតែមានជំនឿថា ឲ្យតែគ្រូពេទ្យចាស់ៗច្រើនតែផ្តល់ការថែទាំ និងព្យាបាលជំងឺល្អជាងគ្រូពេទ្យក្មេងៗដោយសារតែមានបទពិសោធន៍ច្រើនជាង។
ប៉ុន្តែ តាមការសិក្សាថ្មីដែលចុះផ្សាយក្នុងសារព័ត៌មាន British Medical Journal បានបញ្ជាក់ថា គ្រូពេទ្យដែលទើបតែជាប់ឈ្មោះជាគ្រូពេទ្យថ្មី និងគ្រូពេទ្យដែលស្ថិតក្នុងការរៀនសូត្របន្ថែមថ្មីៗ តែងតែមានការសម្រេចចិត្តប្រកបដោយសុវត្ថិភាពជាង។
ចំពោះលទ្ធផលនៃការស្រាវជ្រាវរបស់សាកលវិទ្យាល័យ Harvard វិញ បានរកឃើញថា រាល់អ្នកជំងឺ ៧៧នាក់ដែលត្រូវបានព្យាបាលដោយគ្រូពេទ្យអាយុចាប់ពី ៦០ឆ្នាំឡើងទៅ ឃើញថា មានអ្នកជំងឺតិចតួចណាស់ដែលស្លាប់ក្នុងរយៈពេលព្យាបាល ៣០ថ្ងៃ ហើយវាក៏ដូចគ្នានឹងចំនួនអ្នកជំងឺដែលត្រូវបានគ្រូពេទ្យវ័យក្មេងតិចជាង ៤០ឆ្នាំព្យាបាលដែរ។
ការសិក្សាថ្មីដែលធ្វើទៅលើស្ថានភាពធ្ងន់ធ្ងររបស់អ្នកជំងឺនោះ ក៏ត្រូវបានគេរកឃើញទៀតថា មានឱកាសស្លាប់ខ្ពស់ដែរ នៅពេលពួកគេត្រូវបានព្យាបាលដោយគ្រូពេទ្យអាយុចាប់ពី ៦០ឆ្នាំឡើង។
យ៉ាងណាមិញ សម្រាប់គ្រូពេទ្យចាស់ៗច្រើនតែមិនសូវមានចំណេះដឹង និងបទពិសោធន៍ច្រើន ហើយជំនាញតាមដានអាការៈជំងឺវិញក៏ប្រហែលជាមិនមានបច្ចុប្បន្នភាពដែរ។ ដូច្នេះលទ្ធផលនៃការស្រាវជ្រាវនេះ ចង់ណែនាំថា ការបន្តអប់រំខាងការងារវេជ្ជសាស្ត្រទៀតគឺជារឿងសំខាន់ណាស់សម្រាប់ជីវិតអាជីពជាគ្រូពេទ្យ ដោយមិនខ្វល់ពីអាយុ និងបទពិសោធន៍នោះទេ៕