បញ្ឈប់ទម្លាប់អាក្រក់ទាំងនេះភ្លាម មុននឹងក្រពេញទីរ៉ូអ៊ីតកើតមានបញ្ហា

ថ្វីត្បិតតែក្រពេញទីរ៉ូអ៊ីត គឺតូចក៏ពិតមែន ប៉ុន្តែវាគ្រប់គ្រងត្រួតពិនិត្យលើដំណើរការជាច្រើនក្នុងរាងកាយ រួមទាំងការរំលាយអាហារផងដែរ។ នៅពេលក្រពេញទីរ៉ូអ៊ីតដំណើរការមុខងារមិនប្រក្រតី វាអាចបណ្ដាលឲ្យមានការផលិតអ័រម៉ូនលើសកម្រិត ឬតិចជាងតម្រូវការរាងកាយ។ (អាន ៖ ចេះតែអស់កម្លាំង ឈឺសាច់ដុំ ដេកមិនលក់ អារម្មណ៍រភិតភ័យអាចដោះស្រាយបាន)ហើយអតុល្យភាពនៃអ័រម៉ូនក្នុងរាងកាយអាចបណ្ដាលឲ្យកើតមានបញ្ហាសុខភាពផ្សេងៗគួរឲ្យព្រួយបារម្ភដូចជា ការប្រែប្រួលភ្លាមៗនៃទម្ងន់, អារម្មណ៍ប្រែប្រួល, បញ្ហាស្បែក និងសូម្បីតែជំងឺមហារីកសុដន់។ អត្ថបទខាងក្រោមនឹងបង្ហាញឲ្យដឹងពីទម្លាប់មួយចំនួនដែលអាចបង្កផលប៉ះពាល់ដល់ក្រពេញទីរ៉ូអ៊ីត ៖

១. ស្ត្រេសខ្លាំងពេក

ភាពតានតឹងក្នុងអារម្មណ៍ ឬស្ត្រេស ផ្ដល់ប៉ះពាល់អវិជ្ជមានជាច្រើនលើរាល់ប្រព័ន្ធផ្សេងៗក្នុងរាងកាយ រួមបញ្ចូលទាំងប្រព័ន្ធអង់ដូគ្រីន។ ប្រសិនបើអ្នកតានតឹងសឹងគ្រប់ពេល ក្រពេញទីរ៉ូអ៊ីតឈប់ដំណើរការមុខងារដូចប្រក្រតី ហើយវានឹងផលិតនូវអ័រម៉ូនច្រើន ឬតិចពេកជាមិនខាន។ ប្រសិនបើអ្នកកំពុងជួបប្រទះនូវបញ្ហាទាក់ទងជាមួយក្រពេញទីរ៉ូអ៊ីតស្រាប់ហើយនោះ ភាពតានតឹងក្នុងអារម្មណ៍នឹងបណ្ដាលឲ្យកើតមានភាពស្លន់ស្លោ ឬអសមត្ថភាពចំពោះការចងចាំរយៈពេលយូរថែមទៀតមិនខាន។ កង្វះនៃការគេង និងការងារដែលពោរពេញដោយភាពតានតឹង ក៏ជាកត្តាបង្កហានិភ័យខ្ពស់ផងដែរ។ ដូច្នេះចូរគេងឲ្យបានគ្រប់គ្រាន់, ធ្វើលំហាត់ប្រាណ ឬទៅជួបជាមួយពេទ្យចិត្តសាស្រ្ត ដើម្បីដោះស្រាយបញ្ហាស្ត្រេស។

២. ទទួលទានជាតិខ្លាញ់មិនបានគ្រប់គ្រាន់

ជាតិខ្លាញ់មិនមែនសុទ្ធតែផ្ដល់ផលអាក្រក់ចំពោះសុខភាពឡើយ ជាក់ស្ដែងជាតិខ្លាញ់ល្អៗដូចជា អាស៊ីតខ្លាញ់អូមេហ្គា ៣ និង អូមេហ្គា ៦ រួមទាំងជាតិខ្លាញ់ផ្សេងទៀតដែលមានផ្ទុកក្នុងប្រេងអូលីវ, ស៊ុត, ផលិតផលទឹកដោះគោ,សាច់, ត្រី និងស្រូវសាលី គឺចាំបាច់ណាស់សម្រាប់សុខភាពខួរក្បាល និងក្រពេញទីរ៉ូអ៊ីត។

៣. ទទួលទានផ្សំឡើងពីសណ្ដែងសៀងច្រើនពេក

បើទោះជាសណ្ដែងសៀងមានផ្ទុកសម្បូរទៅដោយវីតាមីន និងសារធាតុចិញ្ចឹមល្អៗសម្រាប់រាងកាយក៏ពិតមែន ប៉ុន្តែការទទួលទានផលិតផលផ្សំឡើងពីសណ្ដែកសៀងច្រើនពេក គឺមិនផ្ដល់ផលល្អសោះឡើយចំពោះសុខភាពក្រពេញទីរ៉ូអ៊ីត។ សណ្ដែកសៀងមានឥទ្ធិពលធ្វើឲ្យក្រពេញទីរ៉ូអ៊ីតដំណើរការយឺតខុសពីធម្មតា។ នៅពេលអ្នកទទួលទានផលិតផលផ្សំពីសណ្ដែកសៀងច្រើនពេក ក្រពេញទីរ៉ូអ៊ីតមិនអាចស្រូបយកអ៊ីយ៉ូតបានគ្រប់គ្រាន់ឡើយ ជាហេតុបណ្ដាលឲ្យក្រពេញទីរ៉ូអ៊ីតដំណើរការមុខងារខុសប្រក្រតី។

៤. ការជក់បារី

ការជក់បារី គឺមិនត្រឹមតែផ្ដល់ផលប៉ះពាល់ដល់សួតប៉ុណ្ណោះទេ ប៉ុន្តែក៏បង្កបញ្ហាចំពោះក្រពេញទីរ៉ូអ៊ីតផងដែរ។ សារធាតុ Tobacco ដែលមានក្នុងបារីធ្វើឲ្យក្រពេញទីរ៉ូអ៊ីតផលិតអ័រម៉ូនកាន់តែច្រើនឡើងៗ ជាហេតុនាំឲ្យកើតមានជំងឺក្រពេញទីរ៉ូអ៊ីត។

៥. ទទួលទានជាតិកាហ្វេអ៊ីនច្រើនពេក

កាហ្វេ និងតែខ្លាំងមានផ្ទុកជាតិកាហ្វេអ៊ីនច្រើនដែលបង្កើនបរិមាណអ័រម៉ូ​នស្ត្រេស cortisol ក្នុងរាងកាយ។ ហើយអ័រម៉ូនស្ត្រេសនេះបង្កផលប៉ះពាល់លើក្រពេញទីរ៉ូអ៊ីត និងការរំលាយអាហារ។ ដូច្នេះអ្នកមិនគួរទទួលទានភេសជ្ជៈ ឬអាហារដែលមានផ្ទុកជាតិកាហ្វេអ៊ីនច្រើនលើសកម្រិតពេកឡើយ៕