ភាគច្រើននៃពួកយើងប្រហែលជាមិនធ្លាប់ដឹងទេថាក្រៅពីជួយបង្កើនឱជារសនៃអាហារហើយនោះ ម៉ាយូណេស ឬMayonnaise អាចត្រូវបានប្រើជាផលិតផលព្យាបាលបញ្ហាសម្រស់ផ្សេងៗ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) នេះក៏ព្រោះតែវាមានផ្ទុកសម្បូរទៅដោយវីតាមីន E វីតាមីន K ប្រូតេអ៊ីន និងអាស៊ីតខ្លាញ់អូមេហ្កា ៣ ដែលល្អសម្រាប់សុខភាពសក់ ស្បែក និងក្រចក។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីរូបមន្តប្រើប្រាស់ម៉ាយូណេសដោះស្រាយបញ្ហាសម្រស់ ៖
១. ព្យាបាលការរលាកស្បែកដោយសារកម្ដៅថ្ងៃ
អ្វីដែលអ្នកត្រូវធ្វើ គឺគ្រាន់តែលាបម៉ាយូណេសលើផ្ទៃស្បែកដែលមានបញ្ហា។ រងចាំសម្រាប់រយៈពេលពី ១៥ ទៅ ២០ នាទី សឹមលាងសម្អាតចេញជាមួយទឹកត្រជាក់។
២. រូបមន្តកម្ចាត់ចៃលើក្បាល
អ្វីដែលអ្នកត្រូវធ្វើ គឺលាបទឹកម៉ាយូណេសឲ្យពេញក្បាល និងសក់ ហើយពាក់មួកផ្លាស្ទិកងូតទឹកសម្រាប់រយៈពេលយ៉ាងហោចណាស់ពី ៣ ទៅ ៤ ម៉ោង សឹមកក់សម្អាតសក់ជាមួយសាប៊ូ រួចសឹមប្រើស្និតសិតតាមក្រោយ។ អនុវត្តឡើងវិញមួយសប្តាហ៍ក្រោយ។
៣. រូបមន្តជួយឱ្យសក់ភ្លឺរលោងនិងរលាស់
អ្វីដែលអ្នកត្រូវធ្វើ គឺគ្រាន់តែកិនលាយស្ត្របឺរីទុំខ្លាំងចំនួនពី ៧ ទៅ ៨ ផ្លែជាមួយម៉ាយូណេស (mayonnaise) ១ ស្លាបព្រាបាយរហូតក្លាយជាល្បាយខាប់ៗ។ លាបល្បាយពេញសក់និងស្បែកក្បាល។ ទុកចោលសម្រាប់រយៈពេលប្រហែល ២០ នាទី សឹមកក់សម្អាតចេញជាមួយសាប៊ូដូចធម្មតា។
៤. រូបមន្តផ្ដល់សំណើមនិងកម្ចាត់ស្បែកងាប់ៗ
អ្វីដែលអ្នកត្រូវធ្វើ គឺគ្រាន់តែលាបម៉ាស្សាម៉ាយូណេសឱ្យក្រាស់បន្តិចលើស្បែកនិងរងចាំសម្រាប់រយៈពេល ២៥ នាទី សឹមលាងសម្អាតចេញទឹកត្រជាក់។
៥. រូបមន្តសម្រាប់ពង្រឹងសុខភាពក្រចក
អ្វីដែលអ្នកត្រូវធ្វើ គឺគ្រាន់តែជ្រលក់ត្រាំម្រាមដៃក្នុងម៉ាយូណេសប្រមាណ ៥ នាទី សឹមលាងសម្អាតចេញជាមួយទឹកក្ដៅឧណ្ហៗ៕