ទម្លាប់​នៃ​ការ​ជក់បារី ឬ​ការ​ញ៉ាំ​អាហារ​ដែល​ធ្វើ​ឲ្យ​កើន​ខ្យល់​ក្នុង​ក្រពះ​គឺជា​ហេតុផល​ញឹកញាប់​បំផុត​នៃ​ការ​ហើមពោះ​។ ប៉ុន្តែ​ការ​ហើមពោះ​ជាប់​រហូត​មិន​ត្រឹមតែ​កត្តា​ប្រឈម​នឹង​ជំងឺ​ជា​ច្រើន​នោះ​ទេ តែ​បើសិនជា​អ្នក​ធ្លាប់​មាន​អាកា​រៈ​ហើមពោះ​ជាប់ ឬ​ធ្ងន់ធ្ងរ​មែន ហើយ​ស្រក​ទម្ងន់ និង​ឈឺពោះ​ទៀត​នោះ វា​អាច​ជា​បញ្ហា​ចំពោះ​សុខភាព​ណាមួយ​ជា​មិន​ខាន ដែល​តម្រូវ​ឲ្យ​អ្នក​ទៅ​ជួប​ពេទ្យ​ភ្លាម​។ ខាងក្រោម​នេះ​គឺជា​ជំងឺ​មួយ​ចំនួន​ដែល​បង្ក​ជា​ការ​ហើមពោះ​ធ្ងន់ធ្ងរ​។

ជំងឺថ្លើម
ជំងឺថ្លើម​ច្រើន​តែ​បណ្តាល​ឲ្យ​កើតជា​ការ​ទាច​ទឹក មាន​ន័យ​ថា ជា​ការ​ហើម​ឡើង​ជាតិ​ទឹក​ក្នុង​ប្រហោង​ពោះ និង​បង្ក​ជា​ការ​ហើមពោះ​តែ​ម្តង​។ ជំងឺ​ទាច​ទឹក ច្រើន​តែ​បណ្តាល​ឲ្យ​ឡើង​ទម្ងន់ និង​រីក​ទំហំ​ចង្កេះ​យ៉ាង​លឿន​។

មហារីក
ការ​ហើមពោះ​ជាប់​រហូត​ក៏​អាច​ជា​សញ្ញា​មួយ​នៃ​ជំងឺមហារីក​ដែរ​។ ជំងឺមហារីក​ខុស​ៗ​គ្នា​ជា​ច្រើន​ដូច​ជា មហារីក​ក្រពះ ក្រពេញ​អូ​វ៉ែ ឬ​ពោះវៀន​សុទ្ធតែ​នាំ​ឲ្យ​កើនឡើង​ជាតិ​ទឹក​ក្នុង​ពោះ និង​ហើមពោះ​បាន​ទាំងអស់​។ ១០​ភាគយ​នៃ​ការ​ទាច​ទឹក​អាច​បណ្តាល​មក​ពី​មហារីក​។ ការ​ហើមពោះ​ដែល​មាន​ជាប់​ទាក់ទង​នឹង​ការ​ឈឺក្រពះ ក៏​អាច​ដោយសារ​តែ​ដុំ​សាច់​ដុះ​សង្កត់​លើ​ពោះវៀន​ដែរ​។

រលាក​ក្រពះ​ពោះវៀន
ការ​ហើមពោះ​គឺជា​រោគ​សញ្ញា​ញឹកញាប់​មួយ​នៃ​ការ​រលាក​ក្រពះ​ពោះវៀន ឬ​អាច​និយាយ​បាន​ថា​មាន​សត្វល្អិត​ក្នុង​ពោះវៀន​។ រឿង​នេះ​ច្រើន​តែ​ទាក់ទង​នឹង​ការ​បង្ក​រោគ​ដោយ​វីរុស ឬ​បាក់តេរី​របស់​ក្រពះ និង​ពោះវៀន តែ​វា​នឹង​ធូរស្រាល​វិញ​នៅ​ពេល​ព្យាបាល​។

ការ​ស្ទះ​ពោះវៀន
ការ​ហើមពោះ​ជាមួយនឹង​ការ​ឈឺពោះ​ធ្ងន់ធ្ងរ ចង្អោ និង​ក្អួត ក៏​អាច​ជា​អាកា​រៈ​នៃ​ជំងឺ​ស្ទះ​ពោះវៀន​ដែរ​។ ការ​ស្ទះ​ពោះវៀន​គឺ​ឈឺចាប់​ខ្លាំង​ណាស់ ដោយសារ​តែ​វា​មិន​អាច​ធ្វើ​ចលនា​បាន​។ ការ​ឈឺចាប់​កើតឡើង​ដូច​រលង ឬ​ចង្វាក់​របស់​វា​ពោះវៀន​ដែល​រលាស់​អ​ញ្ចឹ​ង​។ បើសិនជា​មិន​មានការ​យកចិត្តទុកដាក់​ទាន់​ពេល​ទេ វា​អាច​បណ្តាល​ឲ្យ​មាន​ផលវិបាក​រហូត​ដល់​ធ្លាយ​ពោះវៀន​ផង​។

ទល់លាមក​រ៉ាំរ៉ៃ
វា​គឺជា​ការ​បន្ទោបង់​ដែល​តិច​ជាង ៣​ដង​ក្នុង​មួ​យស​ប្តា​ហ៍ ឬ​ច្រើន​ខែ​។ ដោយសារ​តែ​លាមក​ដែល​ស្ទះ ខ្យល់​ដែល​ស្ទះ​ក្នុង​ពោះវៀន​នោះ ទើប​ធ្វើ​ឲ្យ​ពោះ​ទៅ​ជា​ហើម​បាន​៕