ភាគច្រើននៃពួកយើងដឹងត្រឹមថា ទឹកខ្មេះផ្លែប៉ោម គឺប្រើប្រាស់លើអាហារដើម្បីបន្ថែមរសជាតិ ប៉ុន្តែការពិតទៅវាមានអត្ថប្រយោជន៍ច្រើនជាងអ្វីដែលអ្នកធ្លាប់បានគិតទៅទៀត។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ទោះជាយ៉ាងណា ទឹកខ្មេះផ្លែប៉ោម អាចត្រូវបានគេប្រើសម្រាប់ដោះស្រាយបញ្ហាសុខភាព និងសម្រស់ បានយ៉ាងមានប្រសិទ្ធភាពមិនគួរឲ្យជឿ។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីគន្លឹះងាយៗក្នុងការប្រើប្រាស់ទឹកខ្មេះផ្លែប៉ោមដោះស្រាយបញ្ហាសម្រស់ ៖

១. បំបាត់រោគផ្សិតលើក្រចកជើង

អ្វីដែលអ្នកត្រូវធ្វើ គឺគ្រាន់តែលាយទឹកខ្មេះផ្លែប៉ោមស្មើរជាមួយនឹងទឹកធម្មតា ហើយត្រាំជើងក្នុងទឹកល្បាយនេះសម្រាប់រយៈពេលប្រហែល ១៥ នាទី។ អ្នកអាចអនុវត្ត ២ ដងក្នុងមួយថ្ងៃ។

២. សម្រាប់បញ្ហារលាកស្បែកដោយសារកម្ដៅថ្ងៃ

លក្ខណៈសម្បត្តិសម្លាប់មេរោគនៃទឹកខ្មេះនេះនឹងជួយការពារតំបន់ដែលទទួលរងផលប៉ះពាល់ពីការឆ្លងមេរោគ។ អ្វីដែលអ្នកត្រូវធ្វើ គឺលាយទឹកខ្មេះផ្លែប៉ោមជាមួយទឹកធម្មតា រួចបាញ់ល្បាយនេះលើស្បែកដែលរលាកនឹងកម្ដៅថ្ងៃ ឬចាក់ល្បាយលើកូនកន្សែងស្អាតមួយ ហើយជូតសើរៗថ្នមៗលើស្បែក។

៣. សម្រាប់រក្សាសុខភាពស្បែកក្បាលនិងសក់

អ្វីដែលអ្នកត្រូវធ្វើ គឺលាយទឹកខ្មេះផ្លែប៉ោមប្រមាណពី ២ ទៅ ៣ ស្លាបព្រាបាយជាមួយទឹកធម្មតា ១ ពែង។ កូរអោយសព្វសឹមប្រើប្រាស់ល្បាយនេះលាងសម្អាតសក់ក្រោយពេលកក់ជាមួយសាប៊ូរួច។ ទុកចោលសម្រាប់រយៈពេលពី​​​ ២ ទៅ ៣ នាទី សឹមលាងសម្អាតសក់ចេញម្ដងទៀតជាមួយទឹកត្រជាក់។ អនុវត្តសារឡើងវិញអោយបានពី ២ ទៅ ៣ ដងក្នុងមួយសប្តាហ៍។

៤. សម្រាប់សម្រកទម្ងន់

ការរួមបញ្ចូលទឹកខ្មេះផ្លែប៉ោម ១ ឬ ២ ស្លាបព្រាក្នុងរបបអាហារប្រចាំថ្ងៃនឹងជួយឱ្យអ្នកស្រកទម្ងន់។ នេះក៏ព្រោះតែទឹកខ្មេះផ្លែប៉ោមមានផ្ទុកអាស៊ីតអាសេទិក។

៥. សម្រាប់បំបាត់ស្នាមជាំខៀវលើស្បែក

អ្វីដែលអ្នកត្រូវធ្វើ គឺគ្រាន់តែស្អំទឹកខ្មេះផ្លែប៉ោមពីលើ។ ទឹកខ្មេះផ្លែប៉ោមជួយបង្កើនលំហូរឈាម និងរំលាយឈាមដែលប្រមូលផ្ដុំនៅក្រោមតំបន់ស្បែកដែលជាំខៀវ។

៦. សម្រាប់កម្ចាត់ដុំខ្លាញ់កូឡេស្តេរ៉ូលជុំវិញភ្នែក

អ្វីដែលអ្នកត្រូវធ្វើ គឺគ្រាន់តែប្រើប្រាស់ដុំសំឡីជ្រលក់ក្នុងទឹកខ្មេះផ្លែប៉ោម រួចពូតទឹកដែលលើសចេញខ្លះ បន្ទាប់មកដាកបិតលើដុំខ្លាញ់កូឡេស្តេរ៉ូលនោះសម្រាប់រយៈពេលពី ២ ទៅ ៣ ម៉ោង សឹមលាងសម្អាតចេញជាការស្រេច។ អ្នកអាចប្រើប្រាស់ស្កុត ឬបង់បិតដំបៅបិតពីលើដើម្បីកុំឱ្យជ្រុះ។

៧. សម្រាប់ជួយឱ្យធ្មេញសបែបធម្មជាតិ

អ្វីដែលអ្នកត្រូវធ្វើ គឺគ្រាន់តែលាយម្សៅ Baking soda ១ ស្លាបព្រាកាហ្វេ ជាមួយទឹកខ្មេះផ្លែប៉ោម ១ ស្លាបព្រាកាហ្វេ។ កូរឱ្យសព្វ សឹមដុសធ្មេញជា​​មួយល្បាយនិងខ្ពុរសម្អាតមាត់ជាមួយទឹកធម្មតាឱ្យបានច្រើនដង។ អ្នកមិនគួរអនុវត្តរូបមន្តខាងលើលើសពី ២ ទៅ ៣ ដងក្នុងមួយសប្តាហ៍សម្រាប់រយៈពេលច្រើនជាង ៥ សប្តាហ៍ឡើយ។

៨. ព្យាបាលមុនលើស្បែកក្បាល

អ្វីដែលអ្នកត្រូវធ្វើ គឺគ្រាន់តែលាយទឹកខ្មេះផ្លែប៉ោម ១ ស្លាបព្រាជាមួយទឹកធម្មតា ២ ស្លាបព្រា រួចកូរឱ្យសព្វ។ ក្រោយពេលកក់សក់និងប្រើក្រែមបន្ទន់សក់រួច ចាក់ម៉ាស្សាទឹកល្បាយដែលលាយរួចលើស្បែកក្បាល។ ទុកចោលសម្រាប់រយៈពេល ២ នាទីសឹមលាងសម្អាតចេញ៕