ទោះបីជាតេស្តូស្តេរ៉ូន (testosterone) ជាអ័រម៉ូនភេទប្រុស ប៉ុន្តែក៏មានក្នុងរាងកាយរបស់នារីផងដែរគ្រាន់តែតិចជាងបុរស។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ក្រៅពីអ័រម៉ូននេះរាងកាយក៏នៅមានផ្ទុកអ័រម៉ូនច្រើនផ្សេងទៀត ហើយការរក្សាឱ្យបាននូវកម្រិតអ័រម៉ូនប្រក្រតី គឺចាំបាច់ណាស់ដើម្បីចៀសផុតពីហានិភ័យនៃបញ្ហាសុខភាពផ្សេងៗ។ ចំពោះមនុស្សប្រុសវ័យជំទង់ ការឡើងខ្ពស់នៃកម្រិតអ័រម៉ូនតេស្តូស្តេរ៉ូនអាចជាសញ្ញានៃការចាប់ផ្តើមដំបូងនៃភាពពេញវ័យ ឬដុំសាច់នៅក្នុងពងស្វាស។ វាក៏អាចជាការចង្អុលបង្ហាញអំពីជំងឺក្រពេញទីរ៉ូអ៊ីតផងដែរ។ ចំពោះមនុស្សស្រីការឡើងខ្ពស់នៃកម្រិតអ័រម៉ូនតេស្តូស្តេរ៉ូនអាចជារោគសញ្ញានៃជំងឺ polycystic ovarian syndrome ឬដុំសាច់នៅក្នុងក្រពេញក្រពេញ adrenal ឬក្រពេញអូវ៉ែ។ គួរធ្វើបែបណាទៅដើម្បីអាចបន្ថយកម្រិតនៃអ័រម៉ូនតេស្តូស្តេរ៉ូន? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីគន្លឹះងាយៗជួយបន្ថយកម្រិតនៃអ័រម៉ូនតេស្តូស្តេរ៉ូន ៖

១. កាត់បន្ថយការទទួលទានសាច់

ប្រូតេអ៊ីនដែលមានប្រភពចេញពីសាច់សត្វអាចបង្កើនកម្រិតនៃអ័រម៉ូនតេស្តូស្តេរ៉ូនក្នុងរាងកាយបុរសនិងនារី។ ប៉ុន្តែនេះមិនមែនមានន័យថាអ្នកត្រូវឈប់ទទួលទានសាច់តែម្ដងឡើយដោយរាងកាយនៅត្រូវការជាតិប្រូតេអ៊ីនគ្រប់គ្រាន់ជាប្រចាំ។ អ្វីដែលអ្នកត្រូវធ្វើ គឺកម្រិត ឬកាត់បន្ថយការទទួលទានប្រូតេអ៊ីនដែលមានប្រភពចេញពីសាច់សត្វដូចជាសាច់គោ និងសាច់ជ្រូកដោយជំនួសមកវិញនូវការទទួលទានប្រូតេអ៊ីនដែលមានប្រភពចេញពីសណ្ដែក សណ្ដែកសៀងបន្លែបៃតង ផ្កាខាត់ណាខៀវ ពោត និងដំឡូងបារាំងជាដើម។

២. ទទួលទានសណ្ដែកសៀង និងផលិតផលអាហារផ្សំឡើងពីសណ្ដែកសៀង

ដូចបានលើកឡើងក្នុងចំណុចខាងលើ ការកាត់បន្ថយការទទួលទានប្រូតេអ៊ីនដែលមានប្រភពចេញពីសាច់សត្វ គឺចាំបាច់ណាស់ដើម្បីរក្សាកម្រិតប្រក្រតីនៃអ័រម៉ូនតេស្តូស្តេរ៉ូនក្នុងរាងកាយ។ ប៉ុន្តែដើម្បីប្រាកដថារាងកាយទទួលទានជាតិប្រតេអ៊ីនគ្រប់គ្រាន់ដើម្បីរក្សាសុខភាពសាច់ដុំ ឆ្អឹង ស្បែកនិងសក់បានប្រសើរនោះអ្នកគួរតែរួមបញ្ចូលសណ្ដែកសៀង និងផលិតផលអាហារផ្សំឡើងពីសណ្ដែកសៀងក្នុងរបបអាហារប្រចាំថ្ងៃ។ ក្រៅពីមានផ្ទុកសម្បូរទៅដោយប្រូតេអ៊ីនហើយនោះអាហារប្រភេទនេះជួយកាត់បន្ថយបរិមាណនៃអ័រម៉ូនតេស្តូស្តេរ៉ូនបានយ៉ាងមានប្រសិទ្ធភាព។

៣. បង្កើនការរួមបញ្ចូលបន្លែផ្លែឈើស្រស់ៗក្នុងរបបអាហារប្រចាំថ្ងៃ

បន្លែផ្លែឈើមានផ្ទុកសម្បូរទៅដោយវីតាមីននិងជាតិរ៉ែសំខាន់ៗដែលរាងកាយត្រូវការចាំបាច់ដើម្បីលូតលាស់ដោយសុខភាពល្អរឹងមាំ។ ការរក្សាបាននូវសុខភាពរាងកាយល្អប្រសើរជួយជម្រុញការផលិតអ័រម៉ូនផ្សេងៗរួមបញ្ចូលទាំងអ័រម៉ូនតេស្តូស្តេរ៉ូនក្នុងកម្រិតធម្មតា។ ទោះជាយ៉ាងណាក្មេងស្រីវ័យជំទង់គួរកម្រិតការទទួលទានបន្លែប្រភេទ cruciferous រួមមានផ្កាខាត់ណា ផ្កាខាត់ណាខៀវ ឆៃថាវ និងស្ពៃក្ដោបជាដើមដោយអាហារប្រភេទនេះអាចនាំឱ្យកម្រិតនៃអ័រម៉ូនតេស្តូស្តេរ៉ូនថយចុះខ្លាំង។

៤. កុំគេងច្រើនជាង ៨ ម៉ោងក្នុងមួយយប់ៗ

ការគេងច្រើនពេកលើសពី ៨ ម៉ោងក្នុងមួយយប់ គឺមិនល្អឡើងចំពោះសុខភាព។ វាក៏ជួយឱ្យកម្រិតនៃអ័រម៉ូនតេស្តូស្តេរ៉ូនឡើងខ្ពស់ផងដែរ។

៥. ព្យាយាមគ្រប់គ្រងស្ត្រេស

មិនមែនតែមនុស្សចាស់ឡើងដែលជួបប្រទះបញ្ហាស្ត្រេសខ្លាំង ប៉ុន្តែក្មេងវ័យជំទង់ក៏ដូចគ្នា។ នៅពេលស្ត្រេស ឬតានតឹងក្នុងអារម្មណ៍ខ្លាំងរាងកាយនឹងផលិតអ័រម៉ូនស្ត្រេស cortisol កាន់តែច្រើនឡើងដែលបណ្ដាលឱ្យកម្រិតនៃអ័រម៉ូនតេស្តូស្តេរ៉ូនកើនខ្ពស់ផងដែរ។ ដូច្នេះដើម្បីជាការប្រសើរចូរព្យាយាមគ្រប់គ្រងស្ត្រេសតាមរយៈសកម្មភាពផ្សេងៗដូចជាស្ដាប់ចម្រៀង គូររូប និងលេងកីឡាជាដើម៕