អាហារក៏ជះឥទ្ធិពលលើសុខភាពស្បែកគួរឱ្យកត់សម្គាល់ផងដែរ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ថាតើអាហារនិងភេសជ្ជៈអ្វីខ្លះជួយឱ្យស្បែកស្រស់ថ្លាស្អាតបែបធម្មជាតិ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអាហារនិងភេស្ជៈទាំងនោះ ៖

១. ត្រីសម្បូរខ្លាញ់

ជាប្រភពដ៏ប្រសើរបំផុតមួយនៃអាស៊ីតខ្លាញ់អូមេហ្កា ៣។ ត្រីសម្បូរខ្លាញ់ក៏មានផ្ទុកសម្បូរទៅដោយប្រូតេអ៊ីន ប៉ុន្តែខ្លាញ់មិនល្អនិងជាតិសូដ្យូមទាបដែលល្អសម្រាប់សុខភាពស្បែកស្រស់ថ្លាស្អាត។ ការទទួលទានត្រីសម្បូរខ្លាញ់ជួយរក្សាសំណើមស្បែកពីខាងក្នុងទប់ស្កាត់ភាពការលេចឡើងនូវស្នាមជ្រីវជ្រួញ។

២. បន្លែបៃតង

ក្រៅពីមានផ្ទុកសម្បូរទៅដោយសារធាតុប្រឆាំងអុកស៊ីតកម្ម បន្លែបៃតងក៏ជាប្រភពដ៏ល្អបំផុតនៃជាតិរ៉ែ ព្រមទាំងវីតាមីនសំខាន់ៗរួមបញ្ចូលទាំងវីតាមីន E និងវីតាមីន D ដែលចាំបាច់សម្រាប់ការផលិតនិងបង្កើតកោសិកាស្បែកឡើងវិញ។ ដូច្នេះកុំភ្លេចរួមបញ្ចូលបន្លែក្នុងរបបអាហារប្រចាំថ្ងៃ។

៣. គ្រាប់ជី

មានផ្ទុកសម្បូរទៅដោយអាស៊ីតខ្លាញ់អូមេហ្កា ៣ ដែលជួយរក្សាភ្នាសកោសិកាការពារស្បែកដោយផ្ដល់ឱ្យស្បែកនូវជាតិសំណើមគ្រប់គ្រាន់។

៤. គ្រាប់ធញ្ញជាតិ

ក៏ជាប្រភពដ៏ប្រសើរនៃអាស៊ីតខ្លាញ់អូមេហ្កា ៣ និងអូមេហ្កា​ ៦ ដែលជួយស្បែកផលិតជាតិប្រេងដើម្បីរក្សាសំណើមទប់ស្កាត់បញ្ហាស្បែកស្ងួត។ មិនត្រឹមតែស្បែកប៉ុណ្ណោះទេ ប៉ុន្តែការទទួលទានគ្រាប់ធញ្ញជាតិក៏ល្អសម្រាប់ផ្នែកផ្សេងទៀតនៃរាងកាយផងដែរ។ អាស៊ីតខ្លាញ់ចាំបាច់ហៅថាអាស៊ីតអាមីណូក្នុងគ្រាប់ធញ្ញជាតិជួយទប់ស្កាត់ហានិភ័យនៃជំងឺផ្សេងៗ រួមបញ្ចូលទាំងជំងឺបេះដូង ក៏ដូចជាជំងឺដទៃទៀតដែលពាក់ព័ន្ធនឹងប្រព័ន្ធសសៃឈាមបេះដូង។ ទោះជាយ៉ាងណាមិនគួរទទួលទានច្រើនជាងមួយក្ដាប់ដៃក្នុងមួយថ្ងៃឡើយ។

៥. ផ្លែឈើប្រភេទ Citrus

រួមមានផ្លែក្រូច ទំពាំងបាយជូរ ក្រូចឆ្មារជាដើមមានផ្ទុកសម្បូរទៅដោយវីតាមីន C។ វីតាមីននេះជាសារធាតុប្រឆាំងអុកស៊ីតកម្មខ្លាំងក្លាបំផុតមួយដែលមិនត្រឹមតែជួយពង្រឹងប្រព័ន្ធភាពស៊ាំរាងកាយប៉ុណ្ណោះទេ ប៉ុន្តែក៏ចាំបាច់សម្រាប់សុខភាពស្បែកផងដែរ។ សម្រាប់អ្នកដែលចង់ឱ្យស្បែកសស្រស់ស្អាតជាងមុនកុំភ្លេចរួមបញ្ចូលផ្លែឈើប្រភេទ Citrus ក្នុងរបបអាហារប្រចាំថ្ងៃ។

៦. តែ

មិនថាតែខ្មៅ តែបៃតង ឬតែប្រភេទណានោះទេ គឺសុទ្ធតែមានផ្ទុកសម្បូរទៅដោយសារធាតុប្រឆាំងអុកស៊ីតកម្មដែលល្អសម្រាប់ស្បែក។ ខុសពីកាហ្វេដែលអាចបង្កអាការៈរលាកនិងបង្កើនការផលិតអាំងស៊ុយលីន។ ដូច្នេះអ្នកគួរព្យាយាមកម្រិតការទទួលទានកាហ្វេត្រឹម ១ ពែងក្នុងមួយថ្ងៃបានហើយ។

៧. ទឹក

ទឹកជួយរក្សាជាតិទឹកគ្រប់គ្រាន់ក្នុងរាងកាយ ហើយចាំបាច់ណាស់សម្រាប់រក្សាបាននូវសុខភាពល្អប្រសើរ ស្បែកស្រស់ថ្លា។ ដូច្នេះដើម្បីជាការប្រសើរចូរព្យាយាមទទួលទានទឹកឱ្យបានច្រើនគ្រប់គ្រាន់ក្នុងមួយថ្ងៃៗ៕