លុះត្រាតែអ្នកទទួលទានបន្លែ ផ្លែឈើ គ្រាប់ពូជ និងគ្រាប់ធញ្ញជាតិជាប្រចាំទើបអ្នកអាចរក្សាបាននូវជាតិសសៃគ្រប់គ្រាន់ដែលរាងកាយត្រូវការចាំបាច់សម្រាប់សុខភាពល្អប្រសើរ។ ថាតើជាតិសសៃមានសារៈសំខាន់យ៉ាងណាខ្លះទៅ? (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) អ្នកគួរដឹងជាមុនសិនថា ជាធម្មតាជាតិសសៃមានពីរប្រភេទ គឺជាតិសសៃរលាយនិងជាតិសសៃមិនរលាយ។ ខាងក្រោមវេបសាយសុខភាព 
Health.com.kh នឹងបង្ហាញឱ្យដឹងពីអត្ថប្រយោជន៍នៃការទទួលទានអាហារមានផ្ទុកជាតិសសៃ ៖

១. កាត់បន្ថយហានិភ័យនៃជំងឺបេះដូង

ជាតិសសៃមានលក្ខណៈសម្បត្តិកាត់បន្ថយកូឡេស្តេរ៉ូលមិនល្អ។ នេះហើយជាមូលហេតុដែលកង្វះជាតិសសៃក្នុងរាងកាយអាចបណ្ដាលឱ្យកូឡេស្តេរ៉ូលមិនល្អឡើងខ្ពស់។ ប្រសិនបើរបបអាហារគ្មានផ្ទុកជាតិសសៃគ្រប់គ្រាន់ទេនោះកម្រិតនៃកូឡេស្តេរ៉ូលមិនល្អប្រាកដជាអាចនឹងឡើងខ្ពស់ ហើយបង្កើនហានិភ័យនៃបញ្ហាសម្ពាធឈាម។ អ្វីដែលកាន់តែគួរឱ្យបារម្ភទៀតនោះ គឺកម្រិតនៃកូឡេស្តេរ៉ូលនិងសម្ពាធឈាមខ្ពស់អាចបង្កើនហានិភ័យនៃជំងឺបេះដូង។ ដូច្នេះដើម្បីកាត់បន្ថយហានិភ័យនៃជំងឺបេះដូង ចូរព្យាយាមរួមបញ្ចូលអាហារសម្បូរជាតិសសៃក្នុងរបបអាហារប្រចាំថ្ងៃ។

២. គ្រប់គ្រងកម្រិតនៃជាតិស្ករក្នុងឈាម

ជាតិសសៃរលាយអាចជួយពន្យឺតការស្រូបយកជាតិស្កររបស់រាងកាយ ហើយគ្រប់គ្រងកម្រិតនៃជាតិស្ករក្នុងឈាម។ ដូច្នេះហើយទើបជាតិស្ករក្នុងឈាមអាចនឹងឡើងខ្ពស់ ប្រសិនបើរបបអាហាររបស់អ្នកមានផ្ទុកជាតិសសៃទាប។ ដើម្បីជាការប្រសើរអ្នកគួរចាប់ផ្ដើមបង្កើនការទទួលទានជាតិសសៃនៅពេលជាតិស្ករក្នុងឈាមឡើងខ្ពស់។

៣. កាត់បន្ថយហានិភ័យនៃជំងឺដាច់សសៃឈាមខួរក្បាល

ការទទួលទានអាហារសម្បូរជាតិសសៃពិតជាអាចជួយកាត់បន្ថយហានិភ័យនៃជំងឺដាច់សសៃឈាមខួរក្បាលគួរឱ្យកត់សម្គាល់។ នេះក៏ព្រោះតែជាតិសសៃជួយគ្រប់គ្រងកម្រិតសម្ពាធឈាមមិនឱ្យឡើងខ្ពស់ខុសប្រក្រតី និងកាត់បន្ថយកម្រិតនៃកូឡេស្តេរ៉ូលមិនល្អដែលសុទ្ធតែជាមូលហេតុចម្បងបង្កជំងឺដាច់សសៃឈាមក្នុងខួរក្បាល។

៤. ព្យាបាលនិងទប់ស្កាត់អាការៈទល់លាមក

ធ្លាប់ដឹងទេថាអ្នកកំពុងទល់លាមកហើយប្រសិនបើឈឺបត់ជើងធំបានតិចជាង ៣ ដងក្នុងមួយសប្តាហ៍? ជាធម្មតាបញ្ហាទល់លាមកច្រើនតែកើតឡើងដោយសារកង្វះជាតិសសៃដើម្បីសម្រួលដល់ចលនាពោះវៀននិងការរំលាយអាហារ។ ដូច្នេះវាដល់ពេលដែលអ្នកគួរចាប់ផ្ដើមបង្កើនការញ៊ាំអាហារសម្បូរជាតិសសៃនិងទទួលទានទឹកឱ្យបានច្រើនគ្រប់គ្រាន់ដើម្បីព្យាបាល ក៏ដូចជាទប់ស្កាត់បញ្ហាទល់លាមក។

៥. សុខភាពប្រព័ន្ធរំលាយអាហារ

 បរិមាណខ្ពស់នៃជាតិសសៃក្នុងអាហារអាចជួយសម្អាតរាល់ជាតិពុលពីប្រព័ន្ធរំលាយអាហារដូច្នេះវានឹងអាចដំណើរការមុខងារបានកាន់តែប្រសើរ។ ការទទួលទានអាហារសម្បូរជាតិសសៃក៏ជួយរក្សាតុល្យភាពនៃបាក់តេរីសុខភាពល្អ ហើយសម្រួលដល់ដំណើរការនៃការរំលាយអាហារបានយ៉ាងប្រសើរ៕