ខាងក្រោមនេះ យើងខ្ញុំនឹងបង្ហាញអ្នកពីរឿងដែលអ្នកម្តាយមិនគួរធ្វើដាក់កូនដែលមិនទាន់គ្រប់១០០ថ្ងៃ។ តើមានអ្វីខ្លះទៅ?
- ក្រោយពេលដែលកូនទើបតែបៅរួច អ្នកម្តាយមិនគួរយោល ឬអង្រួនកូនចុះឡើងឡើយ ព្រោះអាចធ្វើឲ្យកូនក្អួតបាន។ ដូចនេះ អ្នកគួរតែប្រយ័ត្ន ទើបមិនធ្វើឲ្យទឹកដោះគោដែលកូនបៅចូលទៅចេញមកវិញអស់។
- នៅពេលដែលកូនមិនទាន់គ្រប់១០០ថ្ងៃ អ្នកម្តាយមិនគួរកោរសក់កូនឲ្យអស់នោះទេ ព្រោះនៅពេលដែលក្បាលកូនគ្មានសក់ អាចធ្វើឲ្យមូសខាំ ឬសត្វផ្សេងៗខាំបានយ៉ាងងាយ។ ជាពិសេស ក្នុងពេលដែលអ្នកកោរសក់ឲ្យកូន អាចធ្វើឲ្យស្បែកក្បាលកូនរបួសដោយមិនដឹងខ្លួន ថែមទាំងអាចធ្វើឲ្យប៉ះពាល់ដល់បង្ហើយរបស់កូនបានយ៉ាងងាយ។
- ប្រសិនជាកូនអ្នកមិនទាន់គ្រប់១០០ថ្ងៃ អ្នកមិនគួរឲ្យគេគេងខ្នើយទេ ព្រោះអាចធ្វើឲ្យឆ្អឹងកូនលូតលាស់មិនបានល្អ ដោយអាចធ្វើឲ្យកូនប្រឈមនឹងគ្រោះថ្នាក់។ ដូចនេះ អ្នកម្តាយគួរតែប្រយ័ត្នពីការប្រើខ្នើយ។
- កូនដែលមិនទាន់គ្រប់១០០ថ្ងៃ អ្នកម្តាយមិនគួរពរកូនបញ្ឈរឡើយ ព្រោះឆ្អឹងខ្នងកូនមិនទាន់លូតលាស់បានគ្រប់ជ្រុងជ្រោយឡើយ។ បើអ្នកតែងពរកូនបញ្ឈរ នោះនឹងធ្វើឲ្យខូចឆ្អឹងខ្នងកូនយ៉ាងងាយ៕