ការទទួលទានអាហារមានផ្ទុកជាតិស្ករខ្ពស់បង្កើនហានិភ័យនៃបញ្ហាសុខភាពច្រើន។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ? មានអ្វីខ្លះទៅ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីផលប៉ះពាល់នៃការទទួលទានអាហារផ្អែម ឬមានផ្ទុកជាតិស្ករខ្ពស់ ៖
១. ឈឺសន្លាក់
អាហារផ្អែមៗ ឬមានផ្ទុកជាតិស្ករខ្ពស់ងាយនឹងបណ្ដាលឱ្យសន្លាក់មានការឈឺចាប់។ នេះក៏ព្រោះតែជាតិស្ករបង្កការរលាកក្នុងរាងកាយ។
២. កើនទម្ងន់
អាហារដែលមានសម្បូរទៅដោយកាឡូរីក៏ច្រើនតែមានផ្ទុកជាតិស្ករខ្ពស់ផងដែរ។ ហើយអ្នកនឹងឡើងទម្ងន់ប្រសិនបើរាងកាយទទួលបានកាឡូរីលើសពីតម្រូវការ។ ជាលទ្ធផលនៃការកើនទម្ងន់ហួសប្រមាណ ឬធាត់ជ្រុល អ្នកប្រាកដជាប្រឈមមុខនឹងហានិភ័យនៃជំងឺជាច្រើន។
៣. ហានិភ័យនៃជំងឺពុកឆ្អឹង
ការទទួលទានអាហារផ្អែម ឬមានផ្ទុកជាតិស្ករខ្ពស់ច្រើនពេកផ្សារភ្ជាប់នឹងការរលាកក្នុងរាងកាយដែលបង្កើនហានិភ័យនៃបញ្ហាសុខភាពផ្សេងៗ រួមទាំងជំងឺពុកឆ្អឹង។
៤. ជំងឺបេះដូង
ភាគច្រើននៃពួកយើងសុទ្ធតែដឹងថា របបអាហារដែលមានផ្ទុកសម្បូរទៅដោយជាតិខ្លាញ់ឆ្អែត saturated និង កូឡេស្តេរ៉ូលខ្ពស់អាចបង្កហានិភ័យនៃជំងឺបេះដូង។ ប៉ុន្តែប្រហែលជាមិនបានចាប់អារម្មណ៍ទេថា ការទទួលទានអាហារសម្បូរទៅដោយជាតិស្ករច្រើនអាចបង្កើនហានិភ័យនៃបញ្ហាបេះដូងគួរអោយព្រួយបារម្ភដែរ។ វេជ្ជបណ្ឌិតជាច្រើននិយាយថា ការរលាក គឺជាអ្វីមួយដែលអាចបង្កជំងឺបេះដូង ហើយជាតិស្ករជាមូលហេតុបង្កើនការរលាកក្នុងរាងកាយ។
៥. ជំងឺធ្លាក់ទឹកចិត្ត Depression
ការស្រាវជ្រាវជាច្រើនបង្ហាញថា ការទទួលទានអាហារមានផ្ទុកសម្បូរទៅដោយជាតិស្ករខ្ពស់អាចបង្កើនហានិភ័យនៃជំងឺធ្លាក់ទឹកចិត្ត។ នោះក៏ព្រោះតែការរលាកដែលជាតិស្ករនាំមកបង្កបញ្ហាអតុល្យភាពនៃអ័រម៉ូន dopamine និង serotonin ក្នុងខួរក្បាល។
៦. ប្រព័ន្ធភាពស៊ាំចុះខ្សោយ
ក្រៅពីសុខភាពបេះដូង និងខួរក្បាល ការរលាកក៏ជះឥទ្ធិពលដល់ប្រព័ន្ធភាពស៊ាំរាងកាយគួរអោយព្រួយបារម្ភផងដែរ។ ហើយនៅពេលប្រព័ន្ធភាពស៊ាំចុះខ្សោយ នោះរាងកាយនឹងឆាប់ឆ្លងជំងឺផ្សេងៗដែលបង្កមកពីបាក់តេរី និងវីរុសជាក់ជាមិនខាន។
៧. មហារីក
បញ្ហាដ៏គួរអោយព្រួយបារម្ភខ្លាំងមួយទៀតនៃការរលាកក្នុងរាងកាយដែលបណ្ដាលមកពីការទទួលទានអាហារផ្អែម ឬជាតិស្ករច្រើន គឺហានិភ័យនៃជំងឺមហារីក។ នេះមានន័យថា ការទទួលទានអាហារផ្អែមច្រើនពេកយូរទៅនឹងបណ្ដាលអោយអ្នកប្រឈមមុខនឹងជំងឺមហារីកនៅថ្ងៃណាមួយ។ ជាតិផ្អែមនឹងបង្កើនទម្ងន់ ហើយកោសិកាខ្លាញ់ហួសប្រមាណក្នុងរាងកាយនាំអោយមានការបញ្ចេញអ័រម៉ូនបង្កជំងឺមហារីក។
៨. ជំងឺទឹកនោមផ្អែមប្រភេទទី ២
ការកើនឡើងនូវកម្រិតជាតិស្ករខ្ពស់នៅក្នុងឈាម គឺជាកត្តាចម្បងដែលបង្កហានិភ័យនៃជំងឺទឹកនោមផ្អែមប្រភេទទី ២។ ហើយការទទួលទានអាហារមានផ្ទុកសម្បូរទៅដោយជាតិស្ករច្រើន គឺជាមូលហេតុទូទៅបំផុតមួយដែលបង្កបញ្ហាជាតិស្ករក្នុងឈាមឡើងខ្ពស់។
៩. អស់កម្លាំងល្ហិតល្ហៃ
បើទោះជាអាហារផ្អែម ឬមានផ្ទុកជាតិស្ករខ្ពស់អាចជួយឱ្យឆាប់មានថាមពលក៏ពិតមែន ក៏ប៉ុន្តែតើអ្នកធ្លាប់ដឹងទេថាពេលខ្លះការទទួលទានស្ករច្រើនក៏អាចធ្វើអោយអស់កម្លាំងដែរ? នោះក៏ព្រោះតែថាមពលដែលរាងកាយទទួលបានមកពីជាតិស្ករ គឺមិនមានរយៈពេលយូរឡើយ។ នៅពេលជាតិស្ករក្នុងឈាមធ្លាក់ចុះនោះអ្នកនឹងមានអារម្មណ៍អស់កម្លាំងភ្លាម។
១០. ស្ទះសសៃឈាម
ការទទួលទានអាហារមានផ្ទុកជាតិស្ករខ្ពស់មិនត្រឹមតែធ្វើឱ្យធាត់ប៉ុណ្ណោះទេ ប៉ុន្តែក៏អាចបង្កបញ្ហាស្ទះសសៃឈាមផងដែរ។ ការទទួលទានអាហារផ្អែមច្រើនអាចបង្កើនកម្រិតនៃជាតិស្ករក្នុងឈាមដែលជាអ្វីមួយអាចបណ្ដាលឱ្យបញ្ហាស្ទះសសៃឈាមកើនមានឡើង៕