ភាគច្រើននៃពួកយើងប្រហែលជាមិនធ្លាប់ដឹងទេថាការរួមបញ្ចូលអាហារមួយចំនួនក្នុងរបបអាហារប្រចាំថ្ងៃអាចជួយបំបាត់ស្នាមមុនបានយ៉ាងប្រសើរ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ថាតើអាហារទាំងនោះមានអ្វីខ្លះ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអាហារដែលអ្នកគួរព្យាយាមទទួលទានដើម្បីបំបាត់ស្នាមមុន ៖

១. ល្ពៅ

ជាប្រភពដ៏ប្រសើរនៃសារធាតុ niacin សារធាតុ folate វីតាមីន A វីតាមីន B និងជាតិស័ង្កសីដែលចាំបាច់ណាស់ក្នុងការព្យាបាលមុនបន្ថយស្នាម ក៏ដូចជាគ្រប់គ្រងកម្រិតនៃអ័រម៉ូន ព្រមតាំងការផលិតជាតិប្រេង ឬខ្លាញ់។

២. ក្រូចឆ្មារ

ការរួមបញ្ចូលក្រូចឆ្មារក្នុងរបបអាហារប្រចាំថ្ងៃពិតជាអាចជួយប​ន្ថយស្នាមមុនគួរឱ្យកត់សម្គាល់។ អ្នកក៏អាចទទួលទានទឹកក្រូចឆ្មារក្ដៅឧណ្ហៗ ១ កែវរាល់ព្រឹក។

៣. ដំឡូងផ្អែម

អាហារមើមនេះមានផ្ទុកសារធាតុ retinol និងសារធាតុ beta-carotene។ រាងកាយបំលែងសារធាតុ beta-carotene ទៅជាវីតាមីន A ដែលជួយការពារស្បែក ទប់ស្កាត់ការរលាក និងការស្ទះរន្ធញើស ខណៈដែលសារធាតុ retinol មានប្រសិទ្ធភាពប្រយុទ្ធប្រឆាំងស្នាមសំលាក ឬស្នាមមុនបានយ៉ាងប្រសើរ។

៤. ល្ហុង

ជាប្រភពដ៏ល្អបំផុតមួយនៃសារធាតុ papain ដែលជួយខាត់កោសិកាស្បែកងាប់ៗចេញ ទប់ស្កាត់បញ្ហាស្ទះរន្ធញើស និងបន្ថយស្នាមមុនគួរឱ្យកត់សម្គាល់។ វាក៏ជួយរក្សាសំណើមស្បែកនិងទប់ស្កាត់មិនឱ្យឡើងមុនទៀត។

៥. ផ្កាខាត់ណា

ជាប្រភពដ៏ប្រសើរនៃវីតាមីន C និងអាមីណូអាស៊ីត histidine ។ Histidine ជួយការពារស្បែកពីពន្លឺព្រះអាទិត្យទប់ស្កាត់មិនឱ្យស្នាមដែលមានស្រាប់កាន់តែលេចច្បាស់។ រីឯវីតាមីន C មានប្រសិទ្ធភាពប្រយុទ្ធប្រឆាំងការខូចខាតទាំងឡាយដែលបណ្ដាលមកពីរ៉ាឌីកាល់សេរី ហើយជួយរាងកាយក្នុងការស្រូបយកជាតិដែកបានកាន់តែប្រសើរ និងពន្លឿនការព្យាបាលរបួស ព្រមទាំងស្នាមសំលាកនានា៕