ថ្លើម គឺជាប្រព័ន្ធមុខងារដ៏សំខាន់មួយនៃរាងកាយ ហើយវាមានតួនាទីចម្បងក្នុងការកម្ចាត់ជាតិពុល និងសារធាតុគីមីគ្រោះថ្នាក់ផ្សេងៗចេញពីរាងកាយ ក៏ដូចជាសរីរាង្គដទៃទៀត។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ការសម្អាតថ្លើម គឺសំខាន់ណាស់ក៏ព្រោះរាងកាយបង្កើតជាតិពុលនិងសារធាតុបង្កជំងឺមហារីកជាច្រើនប្រភេទ ដូច្នេះប្រសិនបើថ្លើមគ្មានសុខភាពល្អ ឬទទួលបានការសម្អាតទេនោះ ថាតើវាអាចកម្ចាត់ជាតិពុល ឬសម្អាតកាកសំណល់ចេញពីរាងកាយបានយ៉ាងម៉េចទៅ។ អ្វីដែលយើងទទួលទានប្រចាំថ្ងៃ គឺមានឥទ្ធិពលដោយផ្ទាល់លើសរីរាង្គខាងក្នុងរបស់យើង ក៏ដូចជាថ្លើម។ ខាងក្រោមវេបសាយសុខភាព Health.com.kh នឹងបង្ហាញអោយដឹងនូវអាហារល្អៗមួយចំនួនដែលអ្នកគួរទទួលទានដើម្បីជម្រុញមុខងារថ្លើមដំណើរការតួនាទីបានកាន់តែប្រសើរ ៖

១. ក្រូចថ្លុង

ជាប្រភពដ៏ប្រសើរនៃវីតាមីន C និងលក្ខណៈសម្បត្តិប្រឆាំងអុកស៊ីតកម្មដែលជួយថ្លើមកម្ចាត់សារធាតុ carcinogens ដែលបង្កជំងឺមហារីកនិងជាតិពុលផ្សេងទៀតចេញពីរាងកាយ។

២. ខ្ទឹមស

ខ្ទឹមសមានផ្ទុកសម្បូរទៅដោយសារធាតុ allicin ដែលជួយសម្អាតថ្លើមបានយ៉ាងប្រសើរ។ ការទទួលទានខ្ទឹមស គឺជាមធ្យោបាយបែបធម្មជាតិល្អបំផុតដើម្បីសម្អាតថ្លើម។ ខ្ទឹមសមានផ្ទុកនូវសារធាតុប្រឆាំងនឹងបាក់តេរី រួមទាំងអុកស៊ីដង់ដែលល្អចំពោះសុខភាពថ្លើម។ ព្យាយាមទទួលទានខ្ទឹមស ដោយបន្ថែមវាចូលជាមួយរបបអាហារប្រចាំថ្ងៃរបស់អ្នក។ ក្រៅពីល្អចំពោះថ្លើម ខ្ទឹមសក៏មានប្រសិទ្ធិភាពជួយពង្រឹងប្រព័ន្ធភាពស៊ាំនៃរាងកាយផងដែរ។ ខ្ទឹមសថែមទាំងមានផ្ទុកនូវសារធាតុសេលេញ៉ូមដែលមានអត្ថប្រយោជន៍ណាស់ សម្រាប់ការបន្សាបជាតិពុល ហើយវាក៏ជួយបំពេញនូវកង្វះនៃសារធាតុចិញ្ចឹម និងសារធាតុរ៉ែដែលចាំបាច់ចំពោះសុខភាពរាងកាយទៀតផង។

៣. បន្លែបៃតង

ជាប្រភពដ៏ប្រសើរបំផុតនៃសារធាតុចិញ្ចឹមសំខាន់ៗដែលអ្នកគួររួមបញ្ចូលក្នុងរបបអាហារប្រចាំថ្ងៃ។ សារធាតុប្រឆាំងអុកស៊ីតកម្ម វីតាមីន និងជាតិរ៉ែក្នុងបន្លែបៃតងជួយពង្រឹងប្រព័ន្ធភាពស៊ាំរាងកាយប្រយុទ្ធប្រឆាំងបាក់តេរីទប់ស្កាត់ការរលាកក្នុងថ្លើម ព្រមទាំងមានប្រសិទ្ធភាពបន្សាបជាតិពុលផងដែរ។

៤. មើមឆៃថាវក្រហម

ប្រសិនបើចង់បន្សាបជាតិពុលពីក្នុងរាងកាយនោះកុំភ្លេចរួមបញ្ចូលមើមឆៃថាវក្រហមក្នុងរបបអាហារប្រចាំថ្ងៃឱ្យសោះ។ មើមឆៃថាវក្រហមជាប្រភពដ៏ល្អបំផុតមួយនៃសារធាតុ beta-carotene ក៏ដូចជា flavonoids ដែលគាំទ្រមុខងារនៃថ្លើមបន្សាបជាតិពុល។ 

៥. ផ្លែបឺរ

ជាប្រភពដ៏ប្រសើរនៃសារធាតុ glutathione រួមទាំងសារធាតុប្រឆាំងបាក់តេរីនិងអុកស៊ីតកម្មដែលជួយសម្អាតថ្លើម ក៏ដូចជាកម្ចាត់ជាតិពុល។ ផ្លែបឺរក៏ជួយថ្លើមក្នុងដំណើរការបន្សាបជាតិពុល ឬបញ្ចេញជាតិពុល ក៏ដូចជាសារធាតុគីមីគ្រោះថ្នាក់ចេញពីរាងកាយតាមរយៈទឹកនោមនិងលាមកផងដែរ។ ដូច្នេះដើម្បីជាការប្រសើរ ចូរព្យាយាមទទួលទានផ្លែឈើនេះជាប្រចាំ។

៦. តែបៃតង

សារធាតុ catechins នៃតែបៃតងជួយធ្វើអោយមុខងារថ្លើមកាន់តែប្រសើរឡើង ហើយការពារថ្លើមពីផលប៉ះពាល់នៃសារធាតុពុលផ្សេងៗ រួមមាន ស្រា ជាដើម។

៧. ប្រូខូលី ឬផ្កាខាត់ណាខៀវ

បន្លែនេះអាចជួយបង្កើនការផលិតសមាសធាតុ glucosinolate ក្នុងរាងកាយដែលជួយក្នុងការផលិតអង់ស៊ីមសម្រាប់ការរំលាយអាហារ។ ម្យ៉ាងវិញផ្កាខាត់ណាខៀវមានផ្ទុកសារធាតុ sulfur និងជាតិសសៃដែលជួយបន្សាបជាតិពុលពីក្នុងថ្លើមបានយ៉ាងប្រសើរគួរឱ្យកត់សម្គាល់។

៨. ក្រូចឆ្មារ

មានផ្ទុកវីតាមីន C ខ្ពស់ដែលជួយក្នុងដំណើរការរំលាយអាហារនិងកម្ចាត់ជាតិពុលចេញពីក្នុងរាងកាយ។

៩. រមៀត

រមៀតមានផ្ទុកសម្បូរទៅដោយសារធាតុប្រឆាំងអុកស៊ីតកម្ម ពិសេសសារធាតុ Curcumin ដែលជួយក្នុងការសម្អាតថ្លើម។ អ្នកអាចបន្ថែមម្ស៉ៅរមៀតទៅក្នុងអាហារផ្សេងៗប្រចាំថ្ងៃ ដើម្បីទទួលបានសុខភាពថ្លើមល្អ។

១០. ផ្លែប៉ោម

ផ្លែប៉ោមមានផ្ទុកនូវសារធាតុចិញ្ចឹមនិងជាតិរ៉ែល្អៗជាច្រើនសម្រាប់សុខភាពរួមបញ្ចូលទាំងវីតាមីន C សារធាតុប្រឆាំងអុកស៊ីតកម្មនិងបាក់តេរីដែលជួយសម្លាប់ពពួកបាក់តេរីអាក្រក់ ហើយបង្កើនចំនួនបាក់តេរីល្អជំនួសវិញដែលជួយឲ្យមុខងារថ្លើមកាន់តែល្អប្រសើរ។ ព្យាយាមទទួលទានផ្លែប៉ោមមួយថ្ងៃ ១ ផ្លែ ឬទឹកផ្លែប៉ោមស្រស់ ១ កែវដោយមិនបន្ថែមស្ករ៕