អត់ឃ្លាន ប៉ុន្តែក្នុងពោះចេះតែបញ្ចេញសម្លេងគ្រូកៗមែនទេ? កុំរំលងអត្ថបទនេះ

ភាគច្រើននៃពួកយើងប្រហែលជាមិនធ្លាប់ដឹងទេថាសម្លេងកូរពោះ ឬសូរសម្លេងលាន់លឺក្នុងពោះសុទ្ធតែបណ្ដាលមកពីឃ្លានឡើយ ក៏ព្រោះពេលខ្លះអ្នកទទួលទានឆ្អែតហើយនៅតែអាចលឺ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) សម្លេងក្នុងពោះដែលលឺខ្លាំងនិងកើតមានញឹកញាប់ខុសធម្មតាអាចបណ្ដាលមកពីបញ្ហាពាក់ព័ន្ធនឹងប្រពន្ធរំលាយអាហារ។ ជួនកាលភាពស្ត្រេស បញ្ហាថប់បារម្ភ អារម្មណ៍អន្ធះសារ រំភើប ឬតានតឹងក៏អាចបង្កឱ្យលឺសម្លេងក្នុងពោះដែរ។ ទោះជាយ៉ាងណាថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីគន្លឹះទប់ទល់បញ្ហាលឺសម្លេងក្នុងពោះ ៖

១. ដើរបន្តិចក្រោយទទួលទានអាហារ

អ្នកគ្រាន់តែចំណាយពេលត្រឹមតែ ១៥ នាទីដើម្បីធ្វើចលនា ឬដើរ គឺល្អណាស់ហើយសម្រាប់សម្រួលដល់ការរំលាយអាហារ។ ការដើរ គឺមានប្រសិទ្ធភាពបំផុតដោយវាជួយឱ្យអាហារអាចធ្វើចលនាឆ្លងកាត់តាមក្រពះបានកាន់តែលឿន។ ប៉ុន្តែត្រូវប្រាកដថាអ្នកមិនធ្វើលំហាត់ប្រាណ ឬសកម្មភាពរាងកាយណាមួយខ្លាំងក្លាពេកក្រោយទទួលទានអាហារដើម្បីចៀសវាងបញ្ហាចង្អោរចង់ក្អួត។

២. ធ្វើលំហាត់ប្រាណឱ្យបានទៀងទាត់

ការអង្គុយច្រើនពេកពេញមួយថ្ងៃដោយសារការងារ ឬការសិក្សា រួមផ្សំជាមួយរបបអាហារគ្មានសុខភាពល្អ ព្រមទាំងភាពតានតឹងក្នុងអារម្មណ៍អាចបណ្ដាលឱ្យអ្នកប្រឈមមុខនឹងបញ្ហាពាក់ព័ន្ធជាមួយក្រពះ រួមបញ្ចូលទាំងបញ្ហាសម្លេងគ្រូកៗចេះតែលាន់លឺក្នុងពោះ។ ព្យាយាមប្រកាន់ខ្ជាប់នូវទម្លាប់រស់នៅល្អមួយដោយធ្វើលំហាត់ប្រាណ ឬសកម្មភាពរាងកាយឱ្យបានច្រើន។

៣. ទទួលទានទឹក

ទឹកនឹងជួយសម្រូលដល់ដំណើរការរំលាយអាហារ ដូច្នេះអ្នកអាចទទួលទានភេសជ្ជៈនេះកំឡុងពេល ឬក្រោយពេលអាហារ។ ទោះជាយ៉ាងណាអ្នកមិនគួរទទួលទានច្រើនពេកតែម្ដងឡើយ ក៏ព្រោះក្បាលពោះដែលពោរពេញទៅដោយទឹកនឹងធ្វើឱ្យសម្លេងគ្រូកៗលាន់លឺឡើង។

៤. ទទួលទានតែខ្ញី ឬតែជីអង្កាម

ភេសជ្ជៈ ២ ប្រភេទនេះនឹងជួយសម្រួលដល់ការរំលាយអាហារ ព្រមទាំងអាចផ្ដល់ភាពធូរស្រាលដល់សាច់ដុំពោះវៀនផងដែរ។ អ្នកអាចទទួលទានតែខ្ញី ឬតែជីអង្កាមក្រោយពេលអាហារ។

៥. ទទួលទានយឺតៗនិងទំពារឱ្យម៉ដ្ឋល្អ

ការទំពារលឿនពេកអាចបណ្ដាលឱ្យអ្នកលេបខ្យល់ចូលក្នុងពោះច្រើនកំឡុងពេលទទួលទាន ហើយក្រពះក៏ពិបាករំលាយបំបែកអាហារដែលធំពេក។ ជាលទ្ធផលសំលេងលាន់លឺក្នុងពោះនឹងលេចឡើង។

៦. កាត់បន្ថយការទទួលទានស្ករច្រើននិងអាហារសម្បូរខ្លាញ់

ពោះវៀនរបស់អ្នកអាចនឹងផលិតជាតិហ្គាស ឬឧស្ម័នកាន់តែច្រើននៅពេលព្យាយាមរំលាយស្ករបរិមាណធំ។ លើសពីនេះទៅទៀតវាអាចបង្កអាការៈរាគ និងសម្លេងគ្រីកគ្រូកក្នុងពោះគួរឱ្យកត់សម្គាល់។

៧. ទទួលទានខ្ទឹមស

ខ្ទឹមសមានផ្ទុកសារធាតុ allicin ដែលជួយដោះស្រាយបញ្ហាសម្លេងគ្រីកគ្រូកលាន់លឺក្នុងពោះបានយ៉ាងប្រសើរ។ សារធាតុ allicin ក៏ជួយបន្ថយការរលាកក្នុងក្រពះផងដែរ។ អ្នកអាចទទួលទានខ្ទឹមសឆៅមួយកំពឹសនៅពេលព្រឹកដើម្បីសម្រួលដល់ការរំលាយអាហារ។

៨. ទទួលទានតែបៃតងជំនួសកាហ្វេ

កាហ្វេជាអាហារមានផ្ទុកជាតិអាស៊ីតដែលអាចបណ្ដាលឱ្យក្រពះបញ្ចេញសម្លេងលឺៗ ដូច្នេះការទទួលទានតែបៃតងជំនួស គឺជាជម្រើសដ៏ល្អបំផុតមួយ៕