​នៅពេល​អ្នកពិគ្រោះ ជាមួយ​គ្រូពេទ្យ​អំពី​ជំងឺ​បាក់​ទឹកចិត្ត សំណួរ​ភាគច្រើនបំផុត ដែល​គ្រូពេទ្យ​សួរ​នោះ​តែងតែ​មាន​ថា តើ​អ្នក​គេង​គ្រប់គ្រាន់​អត់​? ឬ​មិន​ចូលចិត្ត​អ្វី ដែល​ធ្លាប់​ធ្វើ​ពីមុន​អត់​? ឬ​មាន​អារម្មណ៍​ថា ពិបាកចិត្ត​ជាប់​រហូត​អត់​?

​យ៉ាងណាមិញ តាម​ការសិក្សា​របស់​អង្គការ​សុខភាព​ពិភពលោក ចំពោះ​ទំនាក់ទំនង​រវាង​ការបាក់​ទឹកចិត្ត និង​រោគសញ្ញា​នៃ​ការឈឺចាប់​តែ​គ្មាន​របួស ឬ​ជំងឺ (Somatic Symptoms) បាន​រកឃើញថា អ្នកជំងឺ​ចំនួន ១ ១៤៦ នាក់ ដែល​មាន​បញ្ហា​បាក់​ទឹកចិត្ត គឺ​មាន​រោគសញ្ញា​ឈឺក្បាល ទល់​លាមក អស់កម្លាំង ឬ​ឈឺចង្កេះ រហូតដល់ ៦៩ ភាគរយ​ឯណោះ​។​
​បើសិន​ជា​អ្នក​ពិគ្រោះ​ជាមួយ​គ្រូពេទ្យ អំពី​រោគសញ្ញា​លើ​រាងកាយ​ដូចខាងក្រោម​នេះ មានន័យ​ថា​អ្នក​ទំនងជា​អាច​មានឱកាស កើត​ជំងឺ​បាក់​ទឹក​ចិត្តច្រើន​ហើយ​។ រោគសញ្ញា​រាងកាយ​ទាំងនោះ អាច​មាន​ដូចជា ៖

  • ​ឈឺ​ក្បាល​បែប​ប្រកាំ​ង​
  • ​មាន​បញ្ហា​ក្រពះ​ពោះវៀន​ដូចជា រាក​រូស ទល់​លាមក រលាក​ពោះវៀន​ជាដើម​
  • ​ឈឺ​សន្លាក់​
  • ​ឈឺ​ទ្រូង​
  • ​អស់កម្លាំង​
  • ​វិលមុខ​៕