​ជំងឺ​ពុក​ឆ្អឹង​ច្រើនតែ​ទាក់ទង​នឹង​អាយុ​កាន់តែច្រើន ប៉ុន្តែ​បច្ចុប្បន្ន​នេះ​ក៏​កើត​មាន​លើ​មនុស្ស​វ័យក្មេង​ដែរ​។ អ្វី​ដែល​ជា​ចំណុច​កាន់តែ​អាក្រក់​នោះ​គឺថា វា​គឺជា​ជំងឺ​ដែល​គេ​កម្រ​នឹង​រកឃើញ ឬ​រក​ឃើញ​យឺត​ពេល​។ វា​ចាប់ផ្តើម​ជាមួយ​នឹង​ការឈឺចាប់​តិចតួច និង​មិន​សូវ​ចាប់អារម្មណ៍​រហូតដល់​អ្នកជំងឺ​ឧស្សាហ៍​មាន​បញ្ហា​បាក់បែក​ឆ្អឹង​។ បុរស​និង​ស្ត្រី​អាយុ​ចាប់ពី ៥០​ឆ្នាំ​ឡើង​ទៅ ហើយ​កង្វះ​ជាតិ​កាលស្យូម​ក្នុង​ខ្លួន​ទៀត​នោះ​គឺ​ប្រឈម​ខ្លាំង​នឹង​ការពុក​ឆ្អឹង​នេះ​តែម្តង​។ ក្រៅពីនេះ អ្នក​ដែល​មាន​ប្រវត្តិ​ជំងឺ​ពុក​ឆ្អឹង រាង​ស្គម និង​ញ៉ាំ​គ្រឿង​ស្រវឹង​ច្រើន ឬ​ជក់បារី និង​ស្ត្រី​រ៉ាំ​ង​រដូវ​ក៏​ងាយ​នឹង​កើត​ជំងឺ​ពុក​ឆ្អឹង​ណាស់ដែរ​។

​មនុស្ស​ជាច្រើន​តែង​ច្រឡំ​ថា​ជំងឺ​ពុក​ឆ្អឹង​គឺជា​ជំងឺ​រលាក​សន្លាក់ និង​រង​ចាំមើល​រោគសញ្ញា​របស់​វា​ដូចជា ឈឺចាប់ និង​ហើម​នៅ​សន្លាក់​សិន​មុន​ពេល​ទៅ​ជួប​ពេទ្យ​។ ប៉ុន្តែ​ការពិត​នោះ​គឺថា រោគសញ្ញា​ជំងឺ​នេះ​ក្រ​កើត​មាន​ណាស់​។ អ្នក​ដែល​មាន​រោគសញ្ញា​ជំងឺ​ពុក​ឆ្អឹង​ច្រើន​តែ​ឃើញ​មាន​លើ​អាការៈ​ជំងឺ​ធ្ងន់ធ្ងរ​ទៅ​ហើយ ដោយ​មាន​បង្ហាញ​ជា​ការឈឺចាប់​បែប​ងំ​នៅក្នុង​សាច់ដុំ និង​ឆ្អឹង ដែល​ជា​ទូទៅ​កើតមាន​លើ​ចង្កេះ ឬ​ក​។ ជាមួយគ្នានេះដែរ មនុស្ស​ម្នាក់​អាច​មាន​អា​ការៈឈឺចាប់​ភ្លាមៗ និង​ឈឺ​ដូច​គេ​ចាក់​គឺ​នៅពេល​អាការៈ​ជំងឺ​នេះ​ធ្ងន់ធ្ងរ​ទៅហើយ​។

ខាងក្រោម​នេះ​គឺជា​រោគសញ្ញា​ជំងឺ​ពុក​ឆ្អឹង​ដែល​អ្នក​ត្រូវ​ប្រុងប្រយ័ត្ន​៖

ឈឺ​ខ្នង​
ការឈឺ​ខ្នង​លើ​ជំងឺ​ពុក​ឆ្អឹង​ច្រើន​តែ​បណ្តាលមកពី​ការ​បាក់បែក​ឆ្អឹងខ្នង ហើយ​បង្ក​ជា​ការឈឺចាប់​ខ្លាំង​។ នេះ​ដោយសារ​តែ​ការ​បាក់បែក​ឆ្អឹង​កង​ខ្នង​ធ្វើឲ្យ​សង្កត់ដ​ល់​សរសៃប្រសាទ​។ រោគសញ្ញា​របស់​វា​អាច​មាន​លក្ខណៈ​ចាប់ពី តឹង​ឈឺ​នៅ​ខ្នង​រហូតដល់​ឈឺចាប់​ខ្លាំង តែ​វា​អាច​ស្រក​ស្រាន្ត​ទៅវិញ​ក្នុង​រយៈពេល​មួយ​សប្តាហ៍​។ ការឈឺចាប់​អាច​នឹង​ធ្ងន់​ទៅៗ​ក្រោយពី​ធ្វើ​សកម្មភាព​រាងកាយ​ដែល​ដាក់​សម្ពាធ​ទៅលើ​កន្លែង​ដែឡ​មាន​បញ្ហា ហើយ​បង្ក​ឈឺចាប់​រហូតដល់ ៣​ខែ​ក្រោយ​ទៀត​ឯណោះ​។

បាក់ឆ្អឹង​
នេះ​គឺជា​រោគសញ្ញា​ទូទៅ​បំផុត​នៃ​ឆ្អឹង​ដែល​ផុត ឬ​បាក់​ដោយសារតែ​ជំងឺ​ពុក​ឆ្អឹង​។ ជាធម្មតា មនុស្ស​ម្នាក់​នឹង​ដឹងថា គេ​មាន​ជំងឺ​ពុក​ឆ្អឹង​ក្រោយពី​ជួប​បញ្ហា​បាក់ឆ្អឹង​កង​ខ្នង សន្លាក់​ត្រគាក កំភួនដៃ​ជាដើម​។ ក្រៅពីនេះ គ្រាន់តែ​ដួល​បន្តិច​ក៏​អាច​បង្ក​ជាការ​បាក់ឆ្អឹង​បានដែរ​។

កោង​ខ្នង​
ករណីខ្លះ ការ​បាក់បែក​ឆ្អឹង​នៅ​តំបន់​ឆ្អឹង​កង​ខ្នង​បណ្តាលមកពី​ជំងឺ​ពុក​ឆ្អឹង និង​ធ្វើឲ្យ​អ្នកជំងឺ​ទៅ​ជា​កោង​ខ្នង រហូត​ដល់​ស្រុញ​កំពស់​ផងដែរ​។ អាការៈ​បែបនេះ​ច្រើន​តែ​មិន​បង្ក​ជា​ការឈឺចាប់​អ្វី​ទេ ប៉ុន្តែ​ការ​ស្រុញ​កម្ពស់​គឺជា​រឿង​អា​ការៈបញ្ជាក់​ច្បាស់​ថា​មាន​ជំងឺ​ពុក​ឆ្អឹង​ហើយ​៕