ភាព​ជា​ស្ត្រី​មានគុណ​ប្រយោជន៍​នៃ​សុខភាព​យ៉ាង​ពិតប្រាកដ​មួយ​ចំនួន​,​ ប៉ុន្តែ​មិនមែន​ទាក់ទង​នឹង​ការ​ឈឺក្បាល​ ជា​ពិសេស​ដូច​ជា​ការ​ឈឺក្បាល​ប្រកាំង​នោះ​ទេ​។​ ជា​សំណាងល្អ​,​ វា​មាន​ជំនួយ​។​
កត្តា​ជា​ច្រើន​ផ្តល់​អោយ​មានការ​ឈឺក្បាល​សម្រាប់​អ្នក​ទាំង​ពីរ​ទាំង​បុរស​ និង​នារី​,​ ដែល​រួម​មាន​ប្រវត្តិ​គ្រួសារ​ និង​អាយុ​។​ ទោះជា​យ៉ាងណា​ក៏​ដោយ​,​ ជា​រឿយៗ​ស្ត្រី​បាន​សម្គាល់​ពី​ទំនាក់ទំនង​រវាង​ការ​ឈឺក្បាល​ និង​ការ​ផ្លាស់​ប្តូរ​អរ​ម៉ូ​ន​។​
អរ​ម៉ូ​ន​អ៊ឹ​ស្ត្រូ​សែន​ និង​ប្រូ​សេ​ស្តេ​រ៉ូ​ន​ ដែល​មានមុខ​ងារ​សំខាន់​ក្នុង​ការ​រក្សា​នូវ​វដ្ត​រដូវ​របស់​ស្ត្រី​ និង​ការ​មាន​ទម្ងន់​ អាច​ប៉ះពាល់​ទៅ​លើ​សារធាតុ​គីមី​ដែល​ទាក់ទង​នឹង​ការ​ឈឺក្បាល​នៅ​ក្នុង​ខួរក្បាល​។​ កម្រិត​អរ​ម៉ូ​ន​អ៊ឹ​ស្ត្រូ​សែន​កើនឡើង​អាច​អោយ​មាន​ភាព​ប្រសើរ​ឡើង​ដល់​ការ​ឈឺក្បាល​ នៅ​ពេល​ដែល​អរ​ម៉ូ​ន​អ៊ឹ​ស្ត្រូ​សែន​នេះ​ថយ​ចុះ​វិញ​អាច​ធ្វើ​អោយ​ការ​ឈឺក្បាល​កាន់តែ​អាក្រក់​ទៅៗ​។​
តែ​កម្រិត​អរ​ម៉ូ​ន​ចុះឡើង​អាច​ជះ​ឥទ្ធិពល​ទៅ​នឹង​គម្រូ​នៃ​ការ​ឈឺក្បាល​,​ អ្នក​មិន​ស្ថិត​នៅ​ក្នុង​ស្ថានភាព​នៃ​អរ​ម៉ូ​ន​របស់​អ្នក​យ៉ាង​ពេល​លេញ​នោះ​ទេ​។​ គ្រូពេទ្យ​អាច​ជួយ​ព្យាបាល​អ្នក​ ឬ​ការពារ​អ្នក​ពី​ការ​ឈឺក្បាល​។​
អំឡុង​ពេល​ធ្លាក់​ឈាមរដូវ​
តំនក់​នៃ​អរ​ម៉ូ​ន​អ៊ឹ​ស្ត្រូ​សែន​មុន​ពេល​មាន​ឈាមរដូវ​អាច​ផ្តល់​អោយ​មានការ​ឈឺក្បាល​។​ ការ​ឈឺក្បាល​គឺជា​រោគ​សញ្ញា​ទូទៅ​មួយ​នៃ​បណ្តុំ​រោគ​សញ្ញា​មុន​ពេល​មក​ឈាមរដូវ​ និង​ស្ត្រី​ជា​ច្រើន​ដែល​មានការ​ឈឺក្បាល​ប្រកាំង​មានការ​ឈឺក្បាល​មុន​ ឬ​អំឡុង​ពេល​ធ្លាក់​ឈាមរដូវ​នេះ​។​ អ្នក​អាច​ព្យាបាល​ការ​ឈឺក្បាល​ប្រកាំង​ដែល​ទាក់ទង​នឹង​ការ​ធ្លាក់​ឈាមរដូវ​ដោយៈ​
-​    ​ដាក់​ទឹកកកៈ​ ដាក់​ថង់​ទឹកកក​ ឬ​កញ្ចប់​ទឹកកក​ដាក់​លើ​កន្លែង​ដែល​ឈឺ​លើ​ក្បាល​ ឬក​របស់​អ្នក​។​ រុំ​កញ្ចប់​ទឹកកក​ដោយ​កន្សែង​ដើម្បី​ការពារ​ស្បែក​របស់​អ្នក​។​
-​    ​ម៉ាស្សា​សាច់ដុំៈ​ ម៉ាស្សា​សាច់ដុំ​ដែល​តឹង​នៅ​នឹង​ក្បាល​,​ ក​ និង​ស្មា​។​
-​    ​លេបថ្នាំ​បន្ថយ​ការ​ឈឺចាប់​ដែល​លក់​តាម​ទីផ្សា​រៈ​ ដូច​ជា​ អា​សេ​តា​មី​ណូ​ហ្វេ​ន​ (​ទី​ឡេ​ណុ​ល​,​ ផ្សេង​ទៀត​)​ ឬ​ថ្នាំ​ប្រឆាំង​នឹង​ការ​រលាក​ដែល​មិនមែន​ជា​ស្តេ​រ៉ូ​អ៊ី​ត​ដូច​ជា​ថ្នាំ​អាស្ពីរីន​,​ ណា​ប្រូ​ហ្សែ​ន​(Aleve,​ ផ្សេង​ទៀត​)​ និង​អ៊ី​ប៊ុ​យ​ប្រូ​ហ្វេ​ន​(Advil,​ Motrin,​ ដទៃ​ទៀត​)​។​
-​    ​លេបថ្នាំ​ដែល​មាន​វេជ្ជបញ្ជា​ត្រឹមត្រូវ​អាច​ជួយ​អ្នក​បាន​ប្រសិនបើ​ថ្នាំ​ដែល​តាម​ទីផ្សារ​ ឬ​ការ​ផ្លាស់​ប្តូរ​របៀប​រស់នៅ​មិន​មាន​ប្រសិទ្ធភាព​នោះ​។​
ប្រសិនបើ​អ្នក​មានការ​ឈឺក្បាល​លើស​ពី​៣​ដង​ក្នុង​មួយ​ខែ​,​ គ្រូពេទ្យ​អាច​ណែនាំ​អោយ​ការ​ព្យាបាល​ការពារ​ជាមួយនឹង​ថ្នាំ​ដែល​មាន​វេជ្ជបញ្ជា​ ឬ​ថ្នាំ​ដែល​លក់​តាម​ទីផ្សារ​ដើម្បី​បន្ថយ​ការ​ឈឺចាប់​។​ ប្រសិនបើ​វដ្ត​រដូវ​របស់​អ្នក​ទៀត​ទាត់​,​ ជា​រឿយៗ​វា​មាន​ប្រសិទ្ធភាព​ខ្លាំង​បំផុត​ដើម្បី​លេបថ្នាំ​ការពារ​ឈឺក្បាល​២​ ឬ​៣​ថ្ងៃមុន​នឹង​ការ​ធ្លាក់​ឈាមរដូវ​ និង​បន្ត​លេប​ក្នុង​រយៈពេល​២​ ឬ​៣​ថ្ងៃ​ដំបូង​នៃ​ការ​ធ្លាក់​ឈាមរដូវ​។​ ប្រសិនបើ​អ្នក​មានការ​ឈឺក្បាល​ប្រកាំង​ទាំងស្រុង​នៃ​វដ្ត​រដូវ​របស់​អ្នក​ ឬ​ការ​ធ្លាក់​ឈា​រដូវ​របស់​អ្នក​មិន​ទៀងទាត់​,​ វា​អាច​ប្រសើរ​ឡើង​ក្នុង​ការ​លេបថ្នាំ​ការពារ​ជា​រៀងរាល់ថ្ងៃ​នោះ​។​
ប្រើប្រាស់​ថ្នាំ​គ្រាប់​ពន្យារកំណើត​
ស្ត្រី​មួយ​ចំនួន​ធ្លាប់​មានការ​ឈឺក្បាល​ក្នុង​រយៈពេល​ដំបូង​បន្ទាប់​ពី​ចាប់ផ្តើម​លេបថ្នាំ​គ្រាប់​ពន្យារកំណើត​ ឬ​ថ្នាំ​គ្រាប់​ដទៃ​ទៀត​ដើម្បី​រក្សា​ស្ថេ​រ​ភាព​នៃ​អរ​ម៉ូ​ន​។​ សម្រាប់​រឿង​ផ្សេង​,​ ថ្នាំ​គ្រាប់​ពន្យារកំណើត​ផ្លាស់​ប្តូរ​នូវ​គម្រូ​នៃ​ការ​មានការ​ឈឺក្បាល​ ជួនកាល​ធ្វើ​អោយ​ប្រសើរ​ឡើង​ ជួនកាល​ធ្វើ​អោយ​កាន់តែ​យ៉ាប់​ទៅៗ​ក៏​មាន​។​
ប្រសិនបើ​មធ្យោបាយ​នៃ​ការ​ពន្យារកំណើត​របស់​អ្នក​ហាក់ដូចជា​ធ្វើ​អោយ​ប៉ះពាល់​ដល់​ការ​ឈឺក្បាល​ ឬ​ធ្វើ​អោយ​យ៉ាប់​ទៅៗ​,​ សូម​ពិគ្រោះ​ជាមួយនឹង​គ្រូពេទ្យ​។​
អំឡុង​ពេល​មាន​ផ្ទៃពោះ​
កម្រិត​អរ​ម៉ូ​ន​អ៊ឹ​ស្ត្រូ​សែន​កើនឡើង​យ៉ាង​លឿន​ក្នុងអំឡុងពេល​មាន​ផ្ទៃពោះ​ដំបូង​ និង​សល់​នូវ​កម្រិត​ខ្ពស់​នេះ​ក្នុងអំឡុងពេល​មាន​ផ្ទៃពោះ​។​ ជា​រឿយៗ​ការ​ឈឺក្បាល​ប្រកាំង​មាន​ភាព​ប្រសើរ​ឡើង​ ឬ​បាត់​ទៅ​វិញ​អំឡុង​ពេល​មាន​ផ្ទៃពោះ​,​ ប៉ុន្តែ​ការ​ឈឺក្បាល​តឹង​ហាក់ដូចជា​មាន​ភាព​ប្រសើរ​ឡើង​តិច​។​ បន្ទាប់​ពី​សម្រាល​,​ ការ​ថយ​ចុះ​ភ្លាមៗ​នៃ​កម្រិត​អរ​ម៉ូ​ន​អ៊ឹ​ស្ត្រូ​សែន​ ដែល​ស្រប​ពេល​មាន​ស្ត្រេ​ស​,​ ទម្លាប់​នៃ​ការ​ញ៉ាំ​មិន​ទៀងទាត់​ និង​កង្វះ​នៃ​ការ​គេង​ អាច​ធ្វើ​អោយ​មានការ​ឈឺក្បាល​សារ​ជា​ថ្មី​វិញ​។​
ប្រសិនបើ​អ្នក​មានការ​ឈឺក្បាល​អំឡុង​ពេល​មាន​ផ្ទៃពោះ​,​ សូម​សួរ​គ្រូពេទ្យ​អំពី​ជម្រើស​នៃ​ការ​ព្យាបាល​ដែល​ល្អ​។​ ថ្នាំ​បន្ថយ​ការ​ឈឺក្បាល​ភាគច្រើន​អាច​មានការ​ប៉ះពាល់​ ឬ​មាន​ឥទ្ធិពល​ដែល​មិន​ត្រូវ​បាន​គេ​ដឹង​ទៅ​លើ​កា​រវិ​វត្ត​របស់​ទារក​នោះ​ទេ​,​ ជា​ពិសេស​ប្រសិនបើ​អ្នក​លេប​វា​អំឡុង​ពេល​ដែល​កំពុង​ចាប់កំណើត​នោះ​។​ ទោះជា​អ្នក​នឹង​មានការ​ហាមប្រាម​អំពី​ថ្នាំ​ឈឺក្បាល​អំឡុង​ពេល​បំបៅ​កូន​ដោយ​ទឹកដោះ​យ៉ាងណា​ក្តី​,​ អ្នក​នឹង​មាន​ជម្រើស​បន្ថែម​ទៀត​ជាង​អ្នក​ធ្លាប់​បាន​ធ្វើ​អំឡុង​ពេល​មាន​ផ្ទៃពោះ​។​
អំឡុង​ពេល​ជុំវិញ​ការ​អស់​រដូវ​ និង​អស់​រដូវ​
សម្រាប់​ស្ត្រី​ជា​ច្រើន​,​ ការ​ឈឺក្បាល​ប្រកាំង​អាច​ក្លាយជា​រឿង​ញឹកញាប់​ និង​ធ្ងន់ធ្ងរ​អំឡុង​ពេល​ជុំវិញ​ការ​អស់​រដូវ​ ដែល​ជា​ឆ្នាំ​ដែល​នាំ​អោយ​ស្ត្រី​ជិត​អស់​រដូវ​ ដោយសារ​តែ​កម្រិត​នៃ​អរ​ម៉ូ​ន​ឡើង​ និង​ចុះ​មិន​ស្មើគ្នា​។​ ការ​ឡើង​ចុះ​នេះ​អាច​នាំ​អោយ​មានការ​ឈឺក្បាល​ប្រកាំង​។​
សម្រាប់​ស្ត្រី​ភាគច្រើន​,​ ការ​ឈឺក្បាល​ប្រកាំង​ប្រសើរ​ឡើង​វិញ​នៅ​ពេល​ដែល​ការ​ធ្លាក់​ឈា​រដូវ​របស់​ពួក​គេ​បាន​ចប់​ ប៉ុន្តែ​ជា​រឿយៗ​ការ​ឈឺក្បាល​ដែល​តឹង​កាន់តែ​អាក្រក់​ទៅៗ​។​ ការ​ព្យាបាល​ដោយ​អរ​ម៉ូ​ន​អាច​ប៉ះពាល់​ទៅ​លើ​ការ​ឈឺក្បាល​ផង​ដែរ​។​ ការ​ព្យាបាល​ដោយ​អរ​ម៉ូ​ន​ក្នុងអំឡុងពេល​អស់​រដូវ​ធ្វើ​អោយ​ការ​ឈឺក្បាល​កាន់តែ​អាក្រក់​ទៅៗ​ចំពោះ​ស្ត្រី​មួយ​ចំនួន​ និង​ធ្វើ​អោយ​ការ​ឈឺក្បាល​កាន់តែ​ប្រសើរ​ទៅ​វិញ​ចំពោះ​មនុស្ស​មួយ​ចំនួន​ទៀត​។​
ប្រសិនបើ​ការ​ឈឺក្បាល​នៅ​តែ​មាន​បន្ត​ជាប់​បន្ទាប់​ពី​អស់​រដូវ​,​ អ្នក​អាច​បន្ត​ប្រើប្រាស់​ថ្នាំ​ដដែល​ និង​កំនត់​នូវ​របៀប​នូវ​ការ​រស់នៅ​របស់​អ្នក​។​ ប្រសិនបើ​អ្នក​ជ្រើសរើស​ប្រើប្រាស់​អ៊ឹ​ស្ត្រូ​សែន​ដើម្បី​ដោះស្រាយ​រោគ​សញ្ញា​នៃ​ការ​អស់​រដូវ​នេះ​,​ គ្រូពេទ្យ​អាច​ណែនាំ​អោយ​ប្រើ​នូវ​បន្ទះ​ដែល​បិទ​លើ​ស្បែក​ដែល​មាននូវ​អរ​ម៉ូ​ន​អ៊ឹ​ស្ត្រូ​សែន​។​ បន្ទះ​ស្តើង​នោះ​ផ្តល់​អោយ​ថយ​ចុះ​ និង​ជំនួស​អោយ​មានការ​ផ្គត់ផ្គង់​នៃ​អ៊ឹ​ស្ត្រូ​សែន​ដែល​ហាក់ដូចជា​បន្ថយ​នូវ​ភាព​ធ្ងន់ធ្ងរ​នៃ​ការ​ឈឺក្បាល​។​
ស្ត្រី​គ្រប់​រូប​គឺ​ខុសៗ​គ្នា​
ស្ត្រី​មួយ​ចំនួន​គឺ​ងាយ​នឹង​ទទួល​ឥទ្ធិពល​នៃ​អរ​ម៉ូ​ន​។​ ប្រសិនបើ​ការ​ឈឺក្បាល​កំពុង​តែ​រំខាន​សកម្មភាព​ប្រចាំ​ថ្ងៃ​,​ ការងារ​ និង​ជីវិត​ផ្ទាល់ខ្លួន​របស់​អ្នក​,​ សូម​សួរ​គ្រូពេទ្យ​អំពី​ជំនួយ​។​ ការ​ព្យាបាល​គឺ​អាច​មាន​។