ការប្រឈមមុខនឹងជំងឺលើសសម្ពាធឈាមនឹងកើនឡើងទៅតាមអាយុ ប៉ុន្តែការដែលមានទម្លាប់ហាត់ប្រានបានខ្លះអាចបង្កើតនូវភាពខុសគ្នាយ៉ាងធំធេងមួយ។ តើសម្ពាធឈាមអ្នកពិតជាឡើងខ្ពស់មែនទេ? បើអ៊ីចឹងមែន ការហាត់ប្រាណពិតជាអាចជួយគ្រប់គ្រងជំងឺនេះបានហើយ។ អ្នកមិនចាំបាច់ទៅហាត់ប្រានក្នុងក្លិប ឬរត់ម៉ារ៉ាតុងឡើយ។ អ្នកគ្រាន់តែអាចចាប់ផ្តើមធ្វើវាយឺតៗ ដើម្បីបង្កើនសម្មភាពរាងកាយជាប្រចាំកាន់តែច្រើន នោះអ្វីៗនឹងប្លែកហើយ។ ខាងក្រោមនេះខ្ញុំសូមណែនាំនូវលំហាត់ប្រាណ ៣យ៉ាងដែលអ្នកជំងឺលើសសម្ពាធឈាមគួរតែមានទម្លាប់ខ្លួនធ្វើវាឲ្យបានច្រើន៖
ជិះកង់
ការជិះកង់នៅពេលព្រឹកគឺជាផ្នែកមួយដ៏ធំនៃទម្លាប់របស់មនុស្សដែលចង់បានសុខភាពល្អ។ ពេលខ្លះ គ្រាន់តែជិះកង់ធម្មតាៗ ៣០ ទៅ៣៥នាទី ក៏អាចជួយធ្វើឲ្យបេះដូងលោតញ៉ាប់ បង្កើនសុខភាពបេះដូងសរសៃឈាម និងអាចជួយជាហេតុផលដែលអ្នកត្រូវការចេញទៅខាងក្រៅផ្ទះដែរ។ តាមការសិក្សាជាច្រើនបានបង្ហាញថា មនុស្សជាច្រើនដែលមានទម្លាប់ហាត់ប្រាណ រកឃើញថា ពួកគេមានសុខភាពបេះដូងល្អជាងអ្នកដែលមិនជិះកង់។ កាលណាបេះដូងមានសុខភាពល្អ សម្ពាធឈាមនឹងវិលមកធម្មតា ហើយក៏មិនងាយលើសសម្ពាធឈាមដែរ។
ហែលទឹក
ការហែលទឹកត្រូវបានគេរកឃើញថា ជាវិធីហាត់ប្រាណដ៏ល្អមួយ ហើយក៏មានការប៉ះពាល់ដល់បេះដូងតិចតួចដែរ ជាពិសេសមនុស្សចាស់តែម្តង។ ការសិក្សាមួយបានរកឃើញថា ការហាត់ប្រាណអាចជួយបន្ថយសម្ពាធឈាម Systolic បានជាមធ្យម ៩ លេខ ជាពិសេសមនុស្សចាស់អាយុ ៦០ឆ្នាំ ដែលធ្វើការហែលទឹកយ៉ាងហោចណាស់ ៣ ទៅ៤ដងក្នុងមួយសប្តាហ៍រយៈពេល ១២សប្តាហ៍។
ការដើរ
ការសិក្សាមួយដែលបានចុះផ្សាយក្នុងសារព័ត៌មាន Arteriosclerosis, Thrombosis, and Vascular Biology បានរកឃើញថា អ្នកដែលហាត់ប្រាណដោយការរត់ប្រើកម្លាំងខ្លាំង និងការដើរញ៉ាប់កម្រិតមធ្យមទៅខ្លាំង អាចទទួលបានប្រយោជន៍ស្រដៀងគ្នាក្នុងការបន្ថយសម្ពាធឈាមដែលឡើងខ្ពស់ ការប្រឈមនឹងជំងឺទឹកនោមផ្អែម និងលើសកូឡេស្តេរ៉ុល៕