​ស្ត្រី​គ្រប់រូប​ដឹង​ច្បាស់​ណាស់​អំពី​ការឈឺចាប់​នៅ​ពោះ ដែល​វា​កើត​ឡើង​ជា​ញឹកញាប់​ក្នុង​ពេល​ពួកគេ​មក​រដូវ​។ ប៉ុន្តែ​តើ​អ្នក​ធ្លាប់​លឺ​អំពី​ការឈឺចាប់​ក្នុងពេល​ជ្រុះ​អូ​វ៉ុល​ដែរ​ទេ​? មែន​ហើយ វា​មិនមែន​ជា​ការឈឺចាប់​ក្នុង​ពេល​មក​រដូវ​ឡើយ​។ វា​គឺជា​ការឈឺចាប់​នៅ​ពាក់កណ្តាល​នៃ​វដ្ត​រដូវ​ទៅវិញ​ទេ​។

​ការឈឺចាប់​ក្នុងពេល​ជ្រុះ​អូ​វ៉ុល​កើតឡើង​ដោយសារតែ ក្រពេញ​អូវ៉ែ​បញ្ចេញ​មេ​ជីវិត​ញី ហើយ​សម្បក​របស់​មេជី​វិត​ញី​នោះ​ទៅ​ជា​រហែក ដែល​ជាហេតុ​នាំឲ្យ​មាន​ការឈឺចាប់​ស្របគ្នា​នឹង​ការចេញ​កន្តួល​តិចតួច និង​ហូរ​ទឹករំអិល​តាម​ទ្វារមាស​ខ្លះៗ​។ នៅពេល​សម្បក​ពង​មេ​ជីវិត​ញី​ចេញ​ក្រៅ​ជញ្ជាំង​ក្រពេញ​អូ​វ៉ែ វា​អាច​នឹង​បង្ក​ជា​ស្នាម​ជាំ​លើ​ស្រទាប់​នោះ ដែល​ជាហេតុ​នាំ​ឲ្យ​ឈឺ និង​មិន​មាន​ផា​សុកភាព​។ ពេលខ្លះ ការឈឺចាប់​នៅ​ពាក់កណ្តាល​វដ្ត​រដូវ អាច​កើតឡើង​ជា​លក្ខណៈ​ឈឺ​បាត់ៗ​ជាមួយនឹង​ការ​ក្តៅខ្លួន​ស្ទិញៗ​ដែរ​។

ចំពោះ​ការឈឺចាប់​របស់​វា​វិញ អាច​មាន​លក្ខណៈ​តិចតួច ឈឺ​ដូច​គេ​យក​ម្ជុរចាក់ រហូត​ដល់​មិនមាន​ផា​សុកភាព​ធ្ងន់ធ្ងរ​។ ភាគច្រើន​មាន​អារម្មណ៍​ឈឺចាប់​តែ​មួយ​ចំហៀង​ពោះ តែ​អាច​មាន​ការប្រែប្រួល​ជា​រៀងរាល់​ខែ​។ បើសិន​ជា​មេ​ជីវិត​ញី​ចេញពី​ក្រពេញ​អូវ៉ែ​ខាងណា គឺ​ឈឺពោះ​ខាង​ហ្នឹង​។ ចំពោះ​រយៈពេល​វិញ​អាច​យូរ​បំផុត​ត្រឹម​ពីរ​បី​នាទី​ទៅ​ច្រើន​ម៉ោង ឬ​ខ្លាំង​បំផុត ២៤​ម៉ោង​៕