​ទ​ម្លាប់ប្រចាំថ្ងៃមួយចំនួនអាចជះឥទ្ធិពលគួរឱ្យព្រួយបារម្ភចំពោះសុខភាពស្បែក។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ថាតើទម្លាប់ទាំងនោះមានអ្វីខ្លះទៅ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីទម្លាប់ដែលអ្នកគួរផ្លាស់ប្ដូរចេញដើម្បីរក្សាសុខភាពស្បែកល្អប្រសើរ ៖

១. ការបករោមញឹកញាប់ពេក

ការបករោមញឹកញាប់ពេកអាចបណ្ដាលឱ្យពកកន្ទួលលេចឡើងលើស្បែកនិងងាយឈឺចាប់។ អ្នកគួរផ្ដល់ពេលយ៉ាងហោចណាស់ ៣ សប្តាហ៍ដើម្បីឱ្យស្បែកស្ដារភាពល្អប្រសើរឡើងវិញ។ អ្នកក៏មិនគួរបករោមភ្លាមនៅពេលឃើញគ្រាន់តែសម្គាល់ឃើញថាវាជិតដុះ ឬលូតលាស់ដែរ។

២. ការប្រើប្រាស់ទូរសព្ទ

អ្វីក៏ដោយឱ្យតែអ្នកដាក់នៅជិតនឹងត្រចៀក ឬមាត់ គឺត្រូវតែស្អាតជានិច្ច។ ធ្លាប់ដឹងទេថាទូរសព្ទជាមធ្យមអាចមានផ្ទុកមេរោគច្រើនជាងចានបង្គន់ទៅទៀត។ នេះហើយទើបការប្រើប្រាស់ទូរសព្ទជាប្រចាំអាចបណ្ដាលឱ្យអ្នកឡើងមុនលើផ្ទៃមុខ។ ដើម្បីជាការប្រសើរចូរជូតសម្អាតអេក្រង់ទូរសព្ទជាមួយនឹងទឹកអាល់កុល។

៣. ការគេងលើស្រោមខ្នើយកខ្វក់

កោសិកាស្បែកងាប់ៗ ទឹកមាត់ និងធូលីដី អាចធ្វើឱ្យខ្នើយនិងស្រោមខ្នើយមានភាពកខ្វក់ពោរពេញដោយបាក់តេរី។ ត្រូវប្រាកដថាអ្នកបានបោកសម្អាតស្រោមខ្នើយរាល់ ២ សប្តាហ៍ម្ដង និងបោកសម្អាតខ្នើយឱ្យបានយ៉ាងហោចណាស់ ២ ដងក្នុងមួយឆ្នាំដើម្បីឱ្យស្បែករក្សាបាននូវសុខភាពល្អ។ កុំភ្លេចហាលខ្នើយឱ្យស្ងួត សឹមយកមកប្រើប្រាស់ដើម្បីទប់ស្កាត់ការឡើងផ្សិត។

៤. ទទួលទានអាហារកែច្នៃច្រើន

អាហារកែច្នៃមានផ្ទុកសម្បូរទៅដោយជាតិប្រៃ ឬអំបិលដែលអាចធ្វើឱ្យអ្នកមានអាការៈហើម។ អាហារប្រភេទនេះក៏ជាប្រភពនៃសារធាតុ nitrites ដែលបំផ្លាញកូឡាជែន និងភាពបត់បែនក្នុងស្បែកផងដែរ។ ការទទួលទានសាច់កែច្នៃក៏អាចធ្វើឱ្យស្បែកឆាប់ចាស់ជាងអាយុផងដែរ ដោយវាគ្មានផ្ទុកសារធាតុចិញ្ចឹមល្អៗដើម្បីទ្រង់ទ្រង់សុខភាពស្បែករក្សាភាពក្មេងជាងវ័យ។ ដូច្នេះដើម្បីជៀសផុតពីគ្រោះថ្នាក់ កុំទទួលទានអាហារកែច្នៃច្រើនពេក និងមិនត្រូវទទួលទានរាល់ថ្ងៃឡើយ។

៥. ទទួលទានស្ករច្រើ់នពេក

ការទទួលទានស្ករ ឬអំបិលច្រើនពេកសុទ្ធតែអាចជះផលប៉ះពាល់ចំពោះសុខភាពរាងកាយទាំងមូល ក៏ដូចជាស្បែក។ ដូច្នេះដើម្បីជាការប្រសើរ ចូរកម្រិតការទទួលទាន។

៦. ការជក់បារី

បារីមានផ្ទុកពោរពេញទៅដោយសារធាតុពិលរាប់ពាន់ប្រភេទដែលនៅពេលជក់វាអាចជ្រាបចូលក្នុងរាងកាយដែលមិនត្រឹមតែជះផលប៉ះពាល់ដល់សួតនិងបេះដូងប៉ុណ្ណោះទេ ប៉ុន្តែរួមបញ្ចូលទាំងកូឡាជែននិងភាពតឹងណែននៃស្បែកផងដែរ។

៧. ត្រូវពន្លឺព្រះអាទិត្យច្រើនពេក

ការដែលប៉ះត្រូវពន្លឺព្រះអាទិត្យច្រើនពេកអាចជះផលអាក្រក់ច្រើនជាងល្អ។ ពន្លឺព្រះអាទិត្យលើសលប់អាចបណ្ដាលឱ្យស្បែកឆាប់ចាស់ជាងវ័យនិងបង្កើនហានិភ័យនៃជំងឺមហារីកស្បែកផងដែរ។ នេះហើយជាមូលហេតុដែលអ្នកគួរប្រើប្រាស់ឡេការពារស្បែកពីពន្លឺព្រះអាទិត្យដែលមានផ្ទុក SPF យ៉ាងហោចណាស់ ៣០ នៅពេលចេញក្រៅក្រោយម៉ោង ១០ ព្រឹកនិងមុនម៉ោង ៤ ល្ងាច។

៨. ស្រេសពេក

ភាពតានតឹងក្នុងអារម្មណ៍អាចជះឥទ្ធិពលលើសុខភាពរាងកាយទាំងមូលរួមទាំងស្បែក! នៅពេលស្ត្រេសអ្នកងាយនឹងកើតរោគមុន ស្នាមដក់ខ្មៅក្រោមភ្នែក ព្រមទាំងបញ្ហាស្បែកស្រអាប់។ ដូច្នេះប្រសិនបើចង់រក្សាបាននូវសុខភាពស្បែកល្អប្រសើរ ចូរព្យាយាមគ្រប់គ្រងភាពស្ត្រេស៕