ក្លិនខ្យល់ដង្ហើម ឬក្លិនមាត់មិនល្អជាបញ្ហាទូទៅគួរឱ្យរំខានបំផុតមួយដែលកើតឡើងមិនថាចំពោះមនុស្សប្រុស ឬស្រីឡើយ។ ក្លិនមាត់មិនល្អជារឿងគួរអោយខ្មាសមួយដែលធ្វើឲ្យយើងបាត់បង់ទំនុកចិត្តមិនសូវហ៊ាននិយាយជាមួយអ្នកដទៃ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) មូលហេតុបង្កក្លិនមាត់មានច្រើនណាស់ ប៉ុន្តែជាទូទៅការមិនសម្អាតអណ្ដាតអោយបានស្អាតជាហេតុចម្បងបំផុត។ អណ្ដាតជាផ្នែកមួយក្នុងមាត់ដែលមានផ្ទុកមេរោគបាក់តេរីដល់ទៅ ៩០ ភាគរយ។ ទោះជាយ៉ាងណាក្លិនមាត់អាចបាត់ទៅវិញជាមួយ
នឹងគន្លឹះងាយៗមួយចំនួន ប្រសិនបើហេតុបង្កនៃបញ្ហានេះមិនមែនបណ្ដាលមកពីជំងឺណាមួយ។ ខាងក្រោមវេបសាយសុខភាព Health.com.kh នឹងបង្ហាញគន្លឹះជួយឱ្យអ្នករក្សាបាននូវក្លិនខ្យល់ដង្ហើមស្រស់ថ្លា ៖

១. ទទួលទានទឹកឱ្យបានច្រើនគ្រប់គ្រាន់

ពពួកបាក់តេរីក្នុងមាត់បញ្ចេញជាតិហ្គាសបង្កក្លិនមិនល្អ ហើយទឹកមិនត្រឹមតែជួយទប់ស្កាត់ការបញ្ចេញនេះប៉ុណ្ណោះទេ ប៉ុន្តែក៏កម្ចាត់បាក់តេរីផងដែរ។ ដូច្នេះប្រសិនបើអ្នកទទួលទានទឹកច្រើនប៉ុណ្ណា ក្លិនខ្យល់ដង្ហើមមិនល្អនឹងត្រូវកាត់បន្ថយប៉ុននោះ។ ប្រសិនបើអ្នកស្ងួតក្នុងមាត់ ចូរកុំស្ទាក់ស្ទើនឹងទទួលទានទឹក ១ កែវភ្លាម។

២. ដុសសម្អាតធ្មេញឱ្យបាន ២ ដងក្នុងមួយថ្ងៃជាប្រចាំ

ដើម្បីរក្សាសុខភាពធ្មេញចៀសផុតពីបញ្ហាពុកធ្មេញ ឬដង្កូវស៊ីប្រហោង ក៏ដូចជាការឡើងកំណកកំបោរ និងជំងឺអញ្ចាញធ្មេញ ព្រមទាំងក្លិនខ្យល់ដង្ហើមមិនល្ ចូរដុសសម្អាតធ្មេញឱ្យបាន ២ ដងក្នុងមួយថ្ងៃជាប្រចាំ (ពេលព្រឹក និងពេលយប់មុនពេលចូលគេង)។ អ្នកក៏គួរប្រើប្រាស់ខ្សែរ៉ូតសម្អាតធ្មេញផងដែរដើម្បីកម្ចាត់កំទេចកំទីអាហារដែលជាប់ចន្លោះធ្មេញ។

៣. ប្រើប្រាស់ទឹកខ្ពុរមាត់មានផ្ទុកសមាសធាតុស័ង្កសីនិងគ្មានផ្ទុកជាតិអាល់កុល

ការរក្សាសំណើមក្ន​ងមាត់ គឺចាំបាច់ណាស់ដើម្បីទប់ស្កាត់បញ្ហាក្លិនខ្យលដង្ហើមមិនល្អ។ ដូច្នេះហើយទើបអ្នកគួរជ្រើសរើសប្រើប្រាស់ទឹកខ្ពុរមាត់គ្មានជាតិអាល់កុល ក៏ព្រោះសារធាតុនេះអាចបណ្ដាលឱ្យស្ងួតក្នុងមាត់បង្កើនការលូតលាស់បាក់តេរី។

៤. កាត់បន្ថយការទទួលទានកាហ្វេ បុន្តែបង្កើនការទទួលទានទឹកបន្លែស្រស់

ទឹកបន្លែស្រស់មានផ្ទុកជាតិអាស៊ីតទាបដែលខុសពីកាហ្វេមានផ្ទុកជាតិអាស៊ីតខ្ពស់ដែលផ្សារភ្ជាប់នឹងបញ្ហាក្លិនខ្យល់ដង្ហើមមិនល្អ។

៥. សម្អាតអណ្ដាត

ធ្លាប់ដឹងទេថាអណ្ដាតក៏ជាផ្នែកមួយសម្បូរទៅដោយបាក់តេរីមិនចាញ់ធ្មេញ និងអញ្ចាញឡើយ? ដូច្នេះរាល់ពេលដុសធ្មេញ កុំភ្លេចដុសសម្អាតអណ្ដាតផង។ ពិតណាស់ក្លិនមិនល្អក្នុងមាត់ក៏អាចបណ្ដាលមកពីការលូតលាស់នៃបាក់តេរីក្នុងពកល្អិតៗលើអណ្ដាតផងដែរ។ ដូច្នេះដើម្បីដោះស្រាយទប់ស្កាត់បញ្ហាក្លិនខ្យល់ដង្ហើមមិនល្អ ចូរព្យាយាមសម្អាតអណ្ដាតឱ្យបានត្រឹមត្រូវ។ បើប្រៀបធៀបនឹងច្រាសដុសធ្មេញ ប្រដាប់កោសអណ្ដាត គឺមានប្រសិទ្ធភាពជាងក្នងការសម្អាតអណ្ដាត។ ដូច្នេះកុំភ្លេចប្រើប្រាស់ឧបករណ៍រាល់ពេលសម្អាតក្នុងមាត់។

៦. ឈប់ជក់បារី

ក្រៅពីធ្វើឱ្យស្ងួតក្នុងមាត់ សារធាតុនីកូទីនក្នុងបារីក៏រារាំងការផលិតទឹកមាត់ផងដែរ។ នេះជាមូលហេតុដែលអ្នកគួរព្យាយាមផ្ដាច់បារី ប្រសិនបើចង់រក្សាបាននូវសុខភាពរាងកាយទាំងមូលល្អប្រសើរ ជាពិសេសក្លិនខ្យល់ដង្ហើមស្រស់ថ្លា។ ការជក់បារីក៏អាចបង្កើនហានិភ័យនៃបញ្ហាមាត់ធ្មេញផ្សេងៗគួរឱ្យព្រួយបារម្ភ។

៧. ពិនិត្យមាត់ធ្មេញ ២ដងក្នុងមួយឆ្នាំ

ទន្តពេទ្យជាអ្នកជំនាញជួយការពារសុខភាពមាត់ធ្មេញរបស់អ្នក ហើយអាចសម្គាល់ឃើញភាពមិនប្រក្រតីណាមួយបានទាន់ពេលទៀតផង។ លើសពីនេះទៅទៀតទន្តពេទ្យក៏ជួយសម្អាតធ្មេញទៀងទាត់ដែលធ្វើឱ្យអ្នកអាចជៀសផុតពីការជួបប្រទះបញ្ហាមាត់ធ្មេញធ្ងន់ធ្ងរផ្សេងៗ រួមបញ្ចូលទាំងបញ្ហាក្លិនខ្យល់ដង្ហើមមិនល្អ៕