មាន​ស្ថានភាព​ជា​ច្រើន អាច​មាន​លក្ខណៈ​ស្រដៀង​គ្នា ទៅ​នឹង​សញ្ញា និង រោគសញ្ញា​នៃ​ការពុល វា​រួម មានដូចជា ការ​ប្រកាច់​, ការពុល​ស្រា​, ជំងឺ​ដាច់​ស​សៃឈាម​ក្នុង​ខួរក្បាល និង ប្រតិកម្ម​នៃ​អាំង​ស៊ុយ​លីន​។ ដូច្នេះ ស្វែងរក​នូវ​សញ្ញា និង រោគសញ្ញា​ដូចខាងក្រោម​នេះ ប្រសិនបើ​អ្នក​សង្ស័យថា មាន​ការពុល​កើត មាន​ឡើង នោះ​អ្នក​ត្រូវតែ​ប្រញាប់​ទាក់ទង ទៅ​ក្រុម​សង្គ្រោះបន្ទាន់ អោយ​បាន​ភ្លាមៗ​មុនពេល ដែល​អ្នក ផ្តល់​អ្វីមួយ ដល់​ជនរងគ្រោះ ។​

​សញ្ញា និង រោគសញ្ញា​នៃ​ការពុល​

     សញ្ញា  និង រោគសញ្ញា​នៃ​ការពុល ជាទូទៅ​មាន​ដូចជា​៖

·         មានការ​រលាក ឬ ឡើង​ក្រហម​នៅ​នឹង​មាត់ និង បបូរមាត់ បន្ទាប់ពី​បាន​ផឹក​របស់​ដែល​មាន​ជាតិ ពុល​ជាក់លាក់​ណាមួយ​។​

·         ខ្យល់​ដកដង្ហើម មាន​ធំក្លិន​ដូចជា​ជាតិគីមី មានដូចជា សាំង ឬ ទឹក​ថ្នាំ​លាប​ពណ៌ ។​

·         មានការ​រលាក​, មាន​ស្នាម និង ក្លិន​នៅជាប់​នឹង​ជនរងគ្រោះ​, នៅ​នឹង​សំលៀក​បំពាក់ , កំរាល​ឥដ្ឋ ឬ នៅជាប់​នឹង​វត្ថុ​អ្វីមួយ ដែល​មាន​នៅ​ជុំវិញ​នោះ​។​

·         មាន​សំបក​ថ្នាំ​ទទេរ ឬ ថ្នាំ​គ្រាប់​ជ្រុះ​រាយប៉ាយ​។​

·         ក្អួត​, ពិបាក​ដកដង្ហើម​, ងងុយ​គេង​, វង្វេងវង្វាន់ ឬ សញ្ញា​ដែល​ស្មាន​មិន​ដល់​ដទៃទៀត ។​

តើ​នៅពេល​ណា ដែល​អ្នក​ត្រូវ​ហៅ​រក​ក្រុម​សង្គ្រោះបន្ទាន់​?

     អ្នក​ត្រូវ​ប្រញាប់​ទាក់ទង ទៅកាន់​ក្រុម​សង្គ្រោះបន្ទាន់​អោយបាន​ភ្លាមៗ​ប្រសិនបើ ជនរងគ្រោះ​មាន​៖

·         សភាព​ងងុយគេង​ខ្លាំង ឬ បាត់បង់​ស្មារតី​។​

·         ពិបាក​ក្នុង​ការដកដង្ហើម  ឬ ឈប់​ដកដង្ហើម​។​

·         មិន​អាច​សម្រាក​បាន ឬ មានការ​ញ័រ​កន្ត្រាក់​ដងខ្លួន​។​

·         មានការ​ប្រកាច់ បែកពពុះមាត់ ។​

      ប្រសិន​បើ​ជន​រងគ្រោះ នៅ​មិនទាន់​មាន​សញ្ញា នៃ​ការពុល​នៅឡើយ តែ​អ្នក​មាន​ការសង្ស័យថា​ពួកគេ បាន​លេបថ្នាំ​ហើយ នោះ​អ្នក​ត្រូវ​ប្រញាប់​ទាក់ទង​ទៅកាន់ ក្រុម​សង្គ្រោះ​បន្ទាន់ ដើម្បី​សាកសួរ​ពី​ពត៌មាន ដែល​ទាក់ទង​នឹង​សញ្ញា​នៃ​ការពុល​, អាយុ និង ទំងន់ របស់​ជនរងគ្រោះ និង ប្រាប់​ពី​បរិមាណ និង រយៈពេល ដែល​ជនរងគ្រោះ​បាន​ប្រឈម​ទៅ​នឹង​វត្ថុ ដែល​មាន​ជាតិពុល​នេះ​។ អ្នក​គួរតែ​មាន​នូវ​សំបក​ថ្នាំ និង វត្ថុ​ដែល​ផ្ទុក​ជាតិពុល​នេះ នៅក្នុង​ដៃ​ពេល​អ្នក​កំពុង​រាយការណ៍ ប្រាប់​ពី​បញ្ហា​នេះ ។​

​អ្វី​ដែល​អ្នក​ត្រូវ​ធ្វើ ក្នុងពេល​កំពុង​រង់ចាំ​ក្រុម​សង្គ្រោះបន្ទាន់​មកដល់​

    នេះ​គឺជា​អ្វី​ដែល​អ្នក​អាច​ធ្វើបាន សម្រាប់​ជួយ​ដល់​ជនរងគ្រោះ មុន​ពេល​ក្រុម​សង្គ្រោះ​មកដល់​៖

·         ប្រសិន​បើ​ជន​រងគ្រោះ បាន​ប្រឈម​ទៅ​នឹង​ជាតិពុល​ដែល​មាន​លក្ខណៈ​ជា​ផ្សែង​មានដូចជាៈ កាបូនម៉ូណូអុកស៊ីត នោះ​អ្នក​ត្រូវ​ប្រញាប់​យក​គេ ទៅកាន់​កន្លែង​ដែល​មាន​ខ្យល់​បរិសុទ្ធ វិញ​អោយ បាន​ឆាប់ៗ​។​

·         ប្រសិន​បើ​ជន​រងគ្រោះ បាន​លេប​នូវ​ជាតិពុល នោះ​អ្នក​ត្រូវ​យក​ចេញ​នូវ​អ្វី​ដែល​មាន​សេសសល់ នៅ​ក្នុង​មាត់​។​

·         ប្រសិនបើ​អ្នក​សង្ស័យថា​ជាតិពុល គឺជា​ទឹក​នៃ​គ្រឿង​សម្អាត​នៅក្នុង​ផ្ទះ ឬ សារជាតិ​គីមី​អ្វី​ផ្សេង ទៀត នោះ​អ្នក​ត្រូវ​អាន​នូវ​ផ្លាកសញ្ញា​ដែល​មាន​នៅ​លើ​ដប នឹង​អនុវត្ត​តាម​នូវ​ការណែនាំ ដែល​បាន សរសេរ​នៅលើ​នោះ ។ តែ​យ៉ាងណាក៏ដោយ អ្នក​ត្រូវ​តែ​ទាក់ទង ទៅកាន់​ក្រុម​សង្គ្រោះបន្ទាន់ ដើម្បី​ទទួលបាន​ជំនួយ​ផ្នែក​វេជ្ជសាស្ត្រ​អោយ​បាន​ភ្លាមៗ នោះ ។​

·         ប្រសិន​បើ​វត្ថុ​ដែល​មាន​ជាតិពុល បាន​កំពប់​នៅលើ​សំលៀក​បំពាក់​របស់​ជន​រងគ្រោះ នោះ​អ្នក​ត្រូវ ផ្លាស់​សំលៀកបំពាក់​នោះ​ចេញ ។ បើ​វា​មាន​នៅ​លើ​ស្បែក និង ភ្នែក​របស់​ជនរងគ្រោះ នោះ អ្នក​ត្រូវ​លាង​ចេញ​ជាមួយ​នឹង​ទឹក​ស្អាត ក្នុង​រយៈពេល ២០​នាទី ឬ រហូតដល់​ពេល​ក្រុម​សង្គ្រោះ បន្ទាន់​មកដល់​។​

·         ចូរ​ប្រាកដថា ជនរងគ្រោះ​នៅ​ដកដង្ហើម​។ ប្រសិនបើ​មិន​មាន​នោះទេ អ្នក​ត្រូវ​តែ​ប្រញាប់ ធ្វើ ចលនា​សង្គ្រោះ​បេះដូង អោយ​បាន​ភ្លាមៗ​។​

·         នាំយក​នូវ​សំបក​ថ្នាំ ឬ ដប​ថ្នាំពុល​នេះ​ទៅ​ជាមួយ​អ្នក ទៅកាន់​មន្ទីរពេទ្យ ៕