​ពិតណាស់ គ្មាន​នរណា​ចង់​លឺ ឬ​ចូល​ចិត្តការ​និយាយថា ទារក​លូតលាស់​យឺត​ក្នុងពេល​មាន​ផ្ទៃពោះ​ឡើយ​។ ការលូតលាស់​យឺត​នេះ ចង់​សម្តៅ​ទៅលើ​សុខភាព​ទារក​មិនល្អ​ខណៈពេល​ដែល​គេ​កំពុង​តែ​នៅក្នុង​ពោះ​ម្តាយ​នៅឡើយ​។

​យ៉ាងណាមិញ មាន​ហេតុផល​មួយចំនួន​ទំនង​ជា​ដើម​ហេតុ​នាំ​ឲ្យ​ទារក​ក្នុង​ផ្ទៃ​លូតលាស់​យឺត​៖

  • ​កង្វះ​អាហារូបត្ថម្ភ​៖ ការផ្គត់ផ្គង់​ជីវិត​មិន​បាន​គ្រប់គ្រាន់​ដល់​ម្តាយ ក៏​ផ្តល់​ផលប៉ះពាល់​ដល់​ការលូតលាស់​ទារក​ក្នុង​ផ្ទៃ​ដែរ​។​
  • ​ទម្លាប់​នៃ​របៀប​រស់នៅ​មិន​ផ្តល់​សុខភាព​៖ បើសិន​ជា​ម្តាយ​នៅតែ​បន្ត​ប្រើ​ថ្នាំ ញ៉ាំ​គ្រឿង​ស្រវឹង ឬ​ជក់បារី វា​ពិតជា​មាន​ផល​អវិជ្ជមាន​ច្រើន​ដល់​ការលូតលាស់​របស់​ទារ​ក​។​
  • ​លើស​សម្ពាធ​ឈាម​ដោយសារ​មាន​ផ្ទៃពោះ​៖ ស្ត្រី​មាន​ផ្ទៃពោះ​ប្រមាណ ៦ ទៅ​៨​ភាគរយ​អាច​នឹង​មាន​ជំងឺ​លើស​សម្ពាធ​ឈាម ដែល​ជាហេតុ​នាំ​ឲ្យ​ថយ​ចុះ​ដល់រ​បត់​ឈាម​ទៅ​ចិញ្ចឹម​ទា​រកបាន​។​
  • ​បញ្ហា​សុខភាព​របស់​ម្តាយ​៖ បើសិន​ជា​ម្តាយ​កំពុងតែ​មាន​ជំងឺ​បេះដូង ឬ​ជំងឺ​តម្រង​នោម វា​នឹង​ប៉ះពាល់​ដល់​ទារក​ក្នុង​ផ្ទៃ ជាពិសេស​ការលូតលាស់​មិន​គ្រប់លក្ខណៈ​តែម្តង​។​
  • ទឹកភ្លោះ​តិច​៖ ការលូតលាស់​របស់​សាច់ដុំ ដៃជើង និង​សួត​គឺ​មាន​ជាប់ទាក់ទង​នឹង​ទឹកភ្លោះ​ទាំងអស់​។
  • ​ភាពមិនធម្មតា​ផ្សេងៗ​ទៀត​៖ ភាពមិនធម្មតា​នៃ​ក្រូម៉ូសូម និង​ប្រដាប់​ភេទ​អាច​បន្ថយ​ការលូតលាស់​របស់​ទារ​ក​បាន​៕